وه‌زاره‌تی دارایی له‌باره‌ی لێخۆشبوون له‌بڕه‌ قه‌رزێكی سه‌ر هاووڵاتییان ڕوونكردنه‌وه‌ی دا
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

وه‌زاره‌تی دارایی له‌باره‌ی لێخۆشبوون له‌بڕه‌ قه‌رزێكی سه‌ر هاووڵاتییان ڕوونكردنه‌وه‌ی دا

لەبارەی بڕیارێكی لێخۆشبوونی قەرز روونكردنەوە دەدرێت

بەرپرسێکی وەزارەتی دارایی ڕای دەگەیەنێت، هیچ بڕە پارەیەكی لێخۆشبوونی 15%ی پێشینەكانی خانووبەرە و سندووقی نیشتەجێكردن لە كەس وەرنەگیراوەتەوە.

هەندێك زانیاری بڵاوكراونەتەوە، گوایە حكوومەت لە لێخۆشبوونی 15%ی پێشینەی خانووبەرە، كە تاوەكوو مانگی حەوتی ئەمساڵ هەبووە، پەشیمان بووبێتەوە و ئەوانەی پێشووتر لێخۆشبوونیان بۆ كرابێت، پارەی لێخۆشبوونەكەیان لێوەرگیرابێتەوە، به‌ڵام شیرین حوسێن، بەڕێوەبەری گشتیی بانكە پسپۆڕییەكان لە وەزارەتی دارایی هەرێمی کوردستان به‌ وه‌كاله‌ت، بە (باسنیوز)ی ڕاگەیاند: "بە هیچ جۆرێك پارەی لێخۆشبوونی 15%ی پێشینەی خانووبەرە و نیشتەجێكردن لە هیچ كەسێك وەرنەگیراوەتەوە".

ئەو بەرپرسەی بانك گوتیشی: "بڕیاری لێخۆشبوونی 15% بۆ ماوەیەکی دیاریکراو بوو، دوای ئەوە بڕیاری دیکە بۆ ئەو مەبەستە دەرنەکراوە و بڕیارەکەش ئەوانەی نەگرتەوە، کە یەک ساڵ قەرزار بوون، ئەگەر بە ھەڵە ئەوانە لێخۆشبوونی 15%یان بۆ کرابێت، دەخرێتەوە سەر بڕی قەرزەکە، بەڵام هیچ كەسێك نەهاتووە پارەی لێخشبوونی لێوەربگیرێتەوە".

بڕیاری لێخۆشبوونەكە پێشینەكانی خانووبەرە، نیشتەجێكردن، گەشتوگوزار، پێشینەی كشتوكاڵی‌ و پیشەسازی دەگرتەوە و بەپێی بڕیارەكە، لە هەر یەک ملیۆن دینارێك، بڕی 150 هەزار دینار بۆ هاووڵاتی دەگەڕاوە.

بەڕێوەبەری گشتیی بانكە پسپۆڕییەكان ئاشکراشی کرد، داوایان كردووە جارێكی دیکە  لێخشبوونی 15% بكرێتەوە، بەڵام تاوەكوو ئێستا هیچ بڕیارێك دەرنەچووە.

شیرین حوسێن، پێشووتر داوای کردبوو، ئەو كه‌سانەی پێشینەیان وەرگرتووه، پابەند بن بە گەڕانەوەی ئەو قەرزانەی لە ئەستۆیاندایە و سوود لەو لێخۆشبوونە وەربگرن: "تا زووتر قەرزەکان بگەڕێننەوە بۆ خۆیان باشترە، بەپێچەوانەوە، سوودی دواکەوتن دەچێتە سەریان و دواتر دەبێ هەموو قەرزەکە و سوودەکەشی بدەن".

 

بەپێی ئاماری وەزارەتی دارایی، لە سەرەتای دابەشكردنی پێشینەكانەوە تاوەکوو 31/12/2013، بڕی چوار ترلیۆن و 171 ملیار دینار بۆ پێشینەكان خەرج كراوە و زیاتر لە 620 هەزار كەسیش سوودمەند بوونە.