كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×

خالیدا خەلیل: هەكە 50 حكومەت ژی ل عێراقێ بهێنە پێكئینان مافێن ئێزدیان دابین ناكەن

خالیدا خەلیل، نوونەرا ئێزدیان د خولا بۆری یا پەرلەمانێ‌ عێراقێدا  لە چاڤپێكەڤتنەكێدا بۆ (باسنیوز) بەحسێ‌ نەدانا كورسیێن كۆتا ل پەرلەمانێ‌ عێراقی بۆ ئێزدیان كر و گۆت جۆداهی ناڤبەرا پێكهاتێن عێراقی دا هاتیە كرن بۆ دابینكرنا كورسیێن كۆتا ل پەرلەمانێ‌.

(باسنیوز) بۆجی ئێزدی خۆ مەغدور دبینن كورسیێن كۆتا یێن پەرلەمانێ‌ عێراقێدا؟

خالیدا خەلیل: "دەمێ‌ حكومەتا عێراقی كورسیێن كۆتا پەرلەمانێ‌ داناین جۆداهی د ناڤبەرا پێكهاتێن عێراقی دا هاتیە كرن. بۆ نموونە پێنچ كورسی داینە مەسیحیان لێ‌ بتنێ ئێك كورسی داینە ئێزدیان. هژمارا ئێزدیان نەكێمتر ژ هژمارا مەسیحیان ل عێراقێ یە، ئەم دشێن بێژن نوكە هژمارا ئێزدیان پترە ژی دعێراقێ دا لەورا ئەم خۆ مەغدور دبینن. مە داخوازا كورسیا كۆتا یا ئێزدیان بۆ پارێزگەها دهۆكێ‌ كر چونكو گەلەك ئێزدی ل سنورێ‌ پارێزگەها دهۆكێ‌ هەنە. هەتا سەرژمێریا گشتی ل عێراقێ هێتە ئەنجامدان لێ‌ مخابن ل پەرلەمانێ‌ عێراقێ ناكوكی لسەر چێبوون و كورسی نەدان كو بەغدا هەردەم هەول دەت ناڤبەرا ئێزدیان و پارتی دیموكراتی كوردستان نەخۆش كەت لەورا غەدرێ ل ئێزدیان دكەت".

(باسنیوز) ئەڤە چەند حكومەت ل عێراقێ هاتنە پێك ئینان وەزارەت بۆ ئیزدیان ناهێنە دان د حكومەتا داهاتی یا عێراقێ دا. هوون چ داخوازێ دكەن؟

خالیدا خەلیل: "دەمێ‌ وەزارەت حكومەتا عێراقێ دا هێنە دانان ئێزدی هێنە بێ‌ بەهركرن وەزارەت ناهێنە دان بۆ ئێزدیان دهەمبەر بۆ پێكهاتێن دی‌ یێن عێراقی وەزارەت هێنە دان، دەمێ‌ كازمی خولا بۆری دا سەرەدانا پەرلەمانێ‌ عێراقێ كر ئەڤ داخوازیا مە ژی كر لێ‌ بجه نەهات دەمێ‌ ئێزدیان وەزارەت نەبیت ل بەغدا ئەم دێ‌ داخوازی ژ پارتی دیموكراتی كوردستانێ‌ كەین حكومەتا داهاتی یا عێراقێ دا وەزارەتەكێ‌ بۆ ئێزدیان مسۆگەر بكەن چونكو دەنگێن ئێزدیان یێن  پارتی نە، حكومەتا عێراقێ بۆ ئێزدیان ناكەت هەكە 50 حكومەت ژی ل عێراقێ بهێنە پێك ئینان مافێن ئێزدیان دابین ناكەن بەردەوام ئێزدی عێراقێ دا مەغدورن".

(باسنیوز) چ پرۆژە هەبوویە تە دایە پەرلەمانێ‌ عێراقێ بۆ ئیزدیان ورازیبوون لسەر نەهاتیە كرن؟

خالیدا خەلیل: "پرۆژەیێ‌ قانوونا جینۆسایدا ئێزدیان دەستێ‌ مە دابوو مە بتنێ ئێك خواندن ل سەر كریە هاتیە پاشخستن. ئەڤ قانوونا مایە بۆ خولا نوو یا پەرلەمانێ‌ عێراقێ. هیڤدارین ئەڤ قانوون بهێتە پەسەندكرن چونكو قانوون گرێدایێ‌ مافێن ئێزدیانە كو قانوونێ‌ دا ئیزدی بهێنە قەرەبوو كرن و تیرۆرستێن داعش بهێنە سزادان لێ‌ ئەڤ پرۆژە هاتیە پاشخستن چونكو هندەك لایەنێن سیاسی ناڤ عێراقێ دا، نە دگەل دابوون هەر قەبوو نەكرن ئەڤ قانوون بهێتە بەحسكرن لێ‌ كوتلا پارتی دیموكراتی كوردستان رۆلەكێ‌ مەزن هەبوو د خواندنا ئێكێ یا قانوونا جینۆسایدا ئێزدیان دا وبەردەوام پەرلەمانتارێن پارتی ل بەغدا كار كرن ئەڤ قانوونا ئیزدیان بهێتە پەسەندكرن هەكە ئەز جارەكا دی‌ چووبامە پەرلەمانێ‌ دێ‌ ل سەر ڤێ‌ قانوونێ‌ كاركەم".

 (باسنیوز) هەكە ئاوارێن شنگال خۆ ل هیڤیا بەغدا بگرن دێ‌ ڤەگەرن؟

خالیدا خەلیل: "هەكە ئاوارێن شنگال خۆ ل هیڤیا بەغدا  بگرن یا زەحمەت بەغدا بۆ چارەسەركرنا رەوشا شنگال كاربكەت. ئەز باوەرناكەم تشتەكێ‌ بۆ ئیزدیان بكەن شنگال یا داگیركریە پەكەكە و حەشدا شەعبی ناڤ شنگال دانە ناهێلن رەوشا شنگال چارەسەرببیت. گەلەك جاران مە داخواز كریە شنگال بۆ خەلكێ‌ شنگال ڤەگەریت وخەلكێ بیانی شنگال چۆل بكەن".