مەسرور بارزانی: لەگەڵ وڵاتانی ئەورووپا لە گفتوگۆداین و دەمانەوێ بازاڕێك بۆ بەرهەمەكانی كوردستان بدۆزینەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

مەسرور بارزانی: لەگەڵ وڵاتانی ئەورووپا لە گفتوگۆداین و دەمانەوێ بازاڕێك بۆ بەرهەمەكانی كوردستان بدۆزینەوە

کاتژمێر 4:30ی ئێوارەی ئەمڕۆ چوارشەممە مەسرور بارزانی، سەرۆکی حکوومەتی هەرێمی کوردستان بەشداری لە دوا پانێڵی دیداری ئینستیتیوتی ڕۆژهەڵاتی ناوەڕاست بۆ توێژینەوە (MERI - مێری) کرد و تێیدا چەند پرسێکی لەبارەی ڕوانگەکانی حکوومەتی هەرێمی کوردستان ڕوو بە ئایندە و ستراتیژ و بەربەستەکانی خستە ڕوو.

مەسرور بارزانی، سەرۆکی حکوومەتی هەرێمی کوردستان لە دوا پانێلی دیداری ئینستیتیوتی ڕۆژهەڵاتی ناوەڕاست بۆ توێژینەوە (MERI - مێری) بە ناونیشانی (حكوومەتی هەرێم ڕوو بەرەو ئاییندە: ستراتیژەكان، بەربەست و دەرفەتەكان) بەشداریی کرد و اشکاوانە و شەفاف وەڵامی پرسیارەکانی بەڕێوەبەری پانێل و بەشداربوانی دایەوە و هەندێک پرسی گرنگ و هەستیاری خستە ڕوو.

حكوومەتی عێراق قەرزاری فەرمانبەرانی هەرێمی كوردستانە

مەسرور بارزانی سەرەتا گوتی: "لەبارەی ئەوەی كردوومانە لە ڕابردوو، دەمەوێ بتانگەڕێنمەوە بۆ ئەو كاتەی كە دەستمان پێكرد، كە ئەم كابینەیەمان دەست پێكرد، گوتمان چاكسازی دەكەین و دەچینە پێشەوە. بە داخەوە پاش ئەوەی ئۆفیسەكەم وەرگرت، ڕووبەرووی چەندین ئاڵنگاری بووینەوە، كۆڤید 19 پەیدا بوو و نرخی نەوت دابەزی و بابەتی ئاسایش و كێشەی ئەمنیش لە ناوچەكە هەبوو، سەرەڕای ئەوەش هەوڵماندا چاكسازی بكەین و بەسەر كێشەكان زاڵ بین. بە دلنیاییەوە توانیمان سەركەوتوو بین و دۆخەكەش لە هەرێمی كوردستان باشتر بكەین".

سەرۆکی حکوومەتی هەرێمی کوردستان گوتیشی: "سەرەتا كۆڤید 19 و قەرزێكی زۆریشمان لەسەر بوو، چەندان قەیران هەبوو، لە سەروویانەوە بڕینی بودجەی كوردستان، جارێكیتر لە 2014 تا 2017 حكوومەتی فیدڕالی مووچەی فەرمانبەرانی هەرێمی كوردستانی نەدەدا و بودجەی بڕیبوو، شەڕ هەبوو ئەویش تێچووی هەبوو، دوو ملیۆن ئاوارە روویان لە هەرێمی كوردستان كرد و كێشەی ئابووری هەبوو".

مەسرور بارزانی ڕاشیگەیاند: "لە 2020 شەش مانگی مووچەی فەرمانبەرانی حكوومەتی هەرێمی كوردستان نەدرا. بەغدا دواتر 383 ملیۆن دۆلاری دا وەك بەشێك لە مووچە، بەڵام شەش مانگ ئەو پارەیەی نەدا. ئەگەر لێكی بدەیتەوە ئەوە دەبێتە دوو ملیار و 298 ملیۆن دۆلار".

توانیمان بەسەر ئالنگارییەکاندا سەربکەوین

سەرۆکی حکوومەتی هەرێمی کوردستان باسی لەوەش کرد: "حكوومەتی عێراق قەرزاری فەرمانبەرانی هەرێمی كوردستانە، بەڵام ئێمە چاكسازیمان كرد بە بڕینی خەرجیی زیادە و دابینكردنی داهاتی زیاتر. راستە نەمانتوانیوە هەموو مانگێك پارەی تەواو بدەین، بەڵام توانیومانە هەموو مانگێك مووچەیەك بدەین. داوامان كردووە لە وەبەرهێنەران پرۆژە بكەن و كردیان، ئەمە هاوكارێكی باش بوو. لە كۆتاییدا توانیمان پرۆژەی زۆر باشیش بكەین، بەتایبەتیش لە بواری ئاسایشی خۆراك بكەین. ئێمە توانیمان بەسەر ئاڵنگارییەكاندا سەربكەوین و كاری باش ئەنجام بدەین".

لە درێژەی ئەم باسەدا ڕاشیگەیاند: "چەندین كەرت هەبووە كە بتوانین بیانكەینە كەرتی تایبەت، هەروەها یاسایەكی تایبەت بە (پی پی پی) كە هاوبەشیكردنی كەرتی تایبەت و گشتییە. ژمارەی پێدانی كاتژمێرەكانی كارەبامان زیاد كرد و تێچووەكەمان كەم كردەوە".

دۆزینەوەی بازاڕ بۆ بەرهەمەکانی هەرێمی کورردستان

ئەمڕۆ باسی كارەبا و زیادكردنی كاتژمێرەكانی پیدانی كارەبامان كرد. ئێستا گفتوگۆ لەسەر ئەوە دەكەین كە كارەبا بە كەرتی تایبەت بدەین. پرۆژەكانی خۆراك لە توانایاندایە یەك ملیار و 200 هەزار تەن گەنم وەربگرێت، ئەمە كەرتی تایبەتە، جگە لەوەی حكوومەتیش پرۆژەی خۆی هەیە كە دەتوانێت بەرهەمەكان وەربگرێت. ئێمە لە گفتوگۆین لەگەڵ وڵاتان و ئەورووپا، دەمانەوێ بازاڕێك بۆ بەرهەمەكانی كوردستان بدۆزینەوە و خۆشحاڵم كە لە هەندێك ڕووەوە سەركەوتوو بووە.

پارەمان بۆ 147 پرۆژە تەرخان كردووە كە تێكڕا دەكاتە هەشت ملیار و 748 ملیۆن دۆلار بۆ كەرتەكانی بازرگانی و كشتوكاڵ و پەروەردە و تەندروستی و خزمەتگوزارییەكان و هونەریش دەگرێتەوە. ئەمانە ئەو پرۆژانەن كە حكوومەت بودجەی بۆ تەرخان كردوون و زۆربەیان جێبەجێ كراون.

ئێمە مۆڵەتمان بە 714 پرۆژە داوە كە 969 ملیار دۆلار گوژمەكەیانە و لە هەموو ناوچەكانی كوردستان جێبەجێ دەكرێن. ئەمانە بوارە جۆراوجۆرەكان دەگرنەوە بە دروستكردنی بەنداویشەوە.

مەسرور بارزانی لەبارەی بەرهەمەکانی هەرێمی کوردستانەوە ڕاشیگەیاند: "پێش ئەم كابینەیە تەنیا 25 هەزار تەن گەنمەشامی بەرهەم دەهات، بە چاكسازییەكان و پرۆژەكان كە جێبەجێمان كردووە، هەرێمی كوردستان توانای بەرهەمهێنانی 400 هەزار تەن گەنمەشامی هەیە كە ئەمە جێی دڵخۆشیی هەموانە و دەرئەنجامی هاندانی جووتیارانە تاوەكوو نەترسن لەوەی بەرهەمەكانیان چیان لێ دێت".

گەندەڵیمان بە ڕێژەیەكی بەرچاو كەم كردۆتەوە

سەرۆکی حکوومەتی هەرێمی کوردستان لەمەڕ پرسی گەندەڵی ڕایگەیاند: "ئێمە یاسایەكمان هەیە بۆ رووبەرووبوونەوەی گەندەڵی، باوەڕم بەوەیە كە گەندەڵیمان بە ڕێژەیەكی بەرچاو كەمكردۆتەوە. ناتوانم بڵێم بە تەواوی بنبڕمان كردۆتەوە، بەڵام خەڵكێك هەیە كە رێگری لە چاكسازی دەكەن و نایانەوێ وەك ئەوەی هەیە جێبەجێ بكرێت، من دەڵێم دەتوانین گەندەڵی كەم بكەینەوە. هەندێك كەیسی دیاریكراو هەن و دراونەتە دادگاش".

لەم كابینەیەدا بەرهەمی غاز زیادی كردووە، پلان هەیە كە زۆر كێڵگەی غازی سرووشتیی خۆمان بەكار بهێنین. خواستی من ئەوەیە كە پترۆكیمیاویش گرنگی پێ بدەین و سەرچاوە سروشتییەكانی دیكەش بخەینە پڕۆسەوە كە زۆر گرنگن بۆ خەڵكی كوردستان.

پەیوەندییەكی باشمان لەگەڵ توركیا هەیە كە هاوكار بووە لە هەناردەكردنی نەوتی كوردستان. ئێمە ئامادەین بۆ دانوستان لەگەڵ هەر كەس پێی خۆش بێت كە غازی هەرێمی كوردستان بكڕێت.

لە دەستووردا دیاری كراوە ئەگەر لێكدانەوەیەكی تەواوی بۆ بكرێت، دەردەكەوێ كە ئێمە بەپێی یاسا و دەستوور كار دەكەین.

داعش بەتەواوی تێک نەشکاوە

لەبارەی داعشەوە، داعش هەڕەشەیەكی سەرەكییە بۆ ئاسایشی كوردستان و عێراق و ناوچەكە و جیهانیش. بە تەواوی تێك نەشكاوە، راستە خاكی بەدەستەوە نەماوە، بەڵام هێشتا ماون و دەتوانن خۆیان رێك بخەنەوە و لە دزی هێزەكانی عێراق و پێشمەرگە ئۆپەراسیۆن بكەن. داعش لێكەوتە و بەرهەمهاتووی كێشەی دیكە بوو، كاتێك تیرۆریزم هەیە، دەبێ بزانی كە چ كێشەیەك بۆتە هۆی سەرهەلدانی تیرۆر. نادادپەروەری و گەندەڵی و هۆكاری دیكە بووە هۆی دەركەوتنی تیرۆر، بۆ لەناوبردنی تیرۆر راستە دەبێ هێزە ئەمنییەكان ئۆپەراسیۆن ئەنجام بدەن، بەڵام دەبێ بزانین رەگ و ڕیشەی دروستبوونی تیرۆر لە چییەوە هاتووە، ئەگەر باسی عێراق بكەین، دەبێ هەموومان بزانین چۆن بتوانین نادادپەروەری و نایەكسانی لە عیراق نەهێڵین و ژینگەیەك دروست بكەین كە خەڵك هەست بە نائارامی بكەن و بچن بیر لە بەدیلێك بكەنەوە بۆ ئەوەی تۆڵە لە حكوومەت بكەنەوە.

دروستکردنی دوو لیوای هاوبەش

دەبێ چاومان لە هۆكاری سەرهەڵدانی تیرۆر بێ و ڕووبەڕووی ببینەوە تاوەكوو خەڵكی چیتر بۆ پاراستنی خۆیان، هەماهەنگی لەگەڵ تیرۆریستان نەكات.

دەبێ كۆمەڵگەی نێودەوڵەتی و حكوومەتی فیدراڵ و هەموومان هاوكار بین بۆ نەهێشتنی ئەم كێشەیە. لەم رووەوە ئێمە چەندین بیرۆكەمان بە بەغدا داوە، هەندێك هەنگاو هەیە بۆ نەهێشتنی كەلێنەكان لە ناوچە كێشە لەسەرەكان، نەبوونی هیزەكانی فیدراڵی و پێشمەرگە لەبەر هۆكاری سیاسی بووە، دەبێ ئەو كەلێنانە پڕ بكرێنەوە. لە ئەنجامدا بڕیارمان داوە دوو لیوای هاوبەش دروست بكەین تاوەكوو ئەو ناوچانە بپارێزن كە ئێستاش ئەم پرۆسەیە بەڕێوە دەچێت.

بەشێکین لە چارەسەر

ئێمە هەموو كات ویستوومانە هۆكارێك بین بۆ سەقامگیری و بەشێك بین لە چارەسەر، ئەگەر گرژی هەبێ لە نێوان ئەمریكا و ئێران، دەمانەوێ لەو كێشانە دوور بین، دەبێ ئەوانیش رێز لە سەروەریی عێراق و ناوچەكە و خەڵكیش بگیرێت، بە دلنیاییەوە دەبێ ڕێز لە هەرێمی كوردستانیش بگیرێت. ئەوانەی لە دەرەوەی یاسا كار بكەن، دەمانەوێ حكوومەتی عێراق بە بەرپرسیاریان بزانێت.

پشتیوانیی نێودەوڵەتی بۆ عێراق

گفتوگۆی ستراتیژیی ئەمریكا و عێراق بەڕێوە چوو، حكوومەتی هەرێمی كوردستان بەشێك بوو لەم گفتوگۆیە، ئێمە پێزانینمان هەیە بۆ هاوكارییەكانی ئەمریكا و هاوپەیمانانیش، دەمانەوێ ئەو پەیوەندییە باشانە لەگەڵ ئەمریكا و هەموو هاوپەیمانان بەردەوام بێت. هێشتا هەڕەشەی داعش ماوە و مانەوەی هاوپەیمانیی نێودەوڵەتی لێرە زۆر گرنگە و دەبێ قسەی لەسەر بكرێ لە چوارچێوەی گفتوگۆی ستراتیژیی ئەمریكا و عێراق. پێمانوایە كە عێراق پێویستی بە پشتیوانیی نێودەوڵەتی هەیە بە تایبەتیش ئەمریكا كە هاوكارییەكانیان كاریگەر بوون.

پێوەندی و بەرژەوەندیی درواوسێیەتی

لەبارەی ئێران، ئەو وڵاتە دراوسێیە و وەك هەموو دراوسێكانیتر دەمانەوێ پەیوەندیمان لەسەر بەرژەوەندی و دراوسێیەتی باش هەبێت. پەیوەندییەكانمان لەگەڵ ئەمریكا لەسەر حیسابی ئێران نییە و دەمانەوێ لەگەڵ ئەمریكا و ئێرانیش پەیوەندییەكی باشمان هەبێت.

لە بواری یەكخستنەوەی پێشمەرگە كاری باش كراوە و چاكسازییەكان بە باشی بەڕێوە دەچێت. لە دوو ساڵی رابردوودا بەرەوپێشچوونی باش هەبووە و هەندێك یەكە یەكیان گرتۆتەوە، یەكەكانی حەفتا و هەشتا رازی بوون لەژێر چەتری وەزارەتی پێشمەرگە ڕێك بخرێنەوە. بودجەكانیان خراوەتە سەر وەزارەتی پێشمەرگە و بەرەوپێشچوونی باش هەیە بۆ ئەوەی هەموو هێزەكان لەژێر چەتری وەزارەتی پێشمەرگەدا رێك بخرێنەوە.

کابینەیەکی گشتگیر

ناكۆكییەكانی سلێمانی لە نێو حزبێكی دیاریكراو بوو، وەكوو حكوومەت دەمانەوێ دوور لەو بابەتە راوەستین. كابینەیەكی گشتگیرمان هەیە لە یەكێتی و پارتی و گۆڕان و لایەنەكانیتر. دەمانەوێ وەك حكوومەت كار بكەین.

خەڵک پاداشتی پارتی کردووە

هەڵبژاردن بریاردانی خەڵكە، خەڵكی سەیری ئەدای لایەنەكان دەكەن. خۆشحاڵم كە پارتی بردییەوە و خەڵكی خەڵاتی پارتی كرد، چونكە پارتی هەمیشە لە ریزی پێشەوە بووە و پرۆژەكانی پێشكەش كردووە، سەرۆكی حكوومەت لە پارتییە و هەندێك پرەنسیپی دیكە هەبوون كە پارتی سازشی لێ نەكردوون، خەڵكی پاداشتی پارتی كردووە لەم ڕووەوە. كوردستانیش بۆتە ناوچەیەكی ئارام بۆ هەموو ئەوانەی لە ناوچەكانیان هەڵاتوون و هاتوونەتە هەرێمی كوردستان.

ئەم پاداشتكردنە بۆ پارتی گرنگە، هێنانی ئەو هەموو دەنگە كە پارتی هێناویەتی گرنگە و پارتی وەك لایەنێكی براوەیە، دواتر خۆمان دیاریدەكەین كە چ پۆستێك وەردەگرین.

پێوەندییەکانمان لەگەڵ تورکیا فرە ڕەهەندن

پەیوەندییەكانمان لەگەڵ توركیا فرە ڕەهەندن، پەیوەندییەكی زۆر فراوانمان هەیە، لەڕووی بازرگانی و ئێمە دراوسێین و نیگەرانیی ئەمنیشمان هەیە پێكەوە، ئەم پەیوەندییە بۆ هەردوولا بەسوود بووە. بوونی پەكەكە لە ناوچەكانی ئێمە بابەتێكی هەستیارە كە سەروەریی عێراق پێشێل كراوە، لایەنێكی ئەمنی هاتووە كە نەدەبوو بێت. پەكەكە وەكوو پەنابەر نەهاتۆتە ئێرە، وەكوو بەدیلی دامەزراوە دەستوورییەكان خۆیان نیشان دەدەن كە خەڵكی هەڵیبژاردوون. پەكەكە ڕێگە دەگرێ لەوەی خەڵكی بگەڕێنەوە ناوچەكانی خۆیان. ئەمە كێشەیەكی ئەمنی و ئابووریشە. بەهۆی بوونی پەكەكە 800 گوند تا ئێستا بە چۆڵكراوی ماونەتەوە و نەمانتوانیوە خزمەتگوزارییەكانیان پێ بگەیەنین. هەبوونی پەكەكە لەو ناوچانە هۆكارێك بووە بۆ راكێشانی توركیا. ئەگەر پەكەكە لەو ناوچانە نەبوایە زۆر ئەستەم بوو بۆ ئەوەی توركیا پاساوێك بدۆزێتەوە و بێتە ئەو ناوچانە. پەكەكە هەموو كارێكی لە بەرژەوەندیی توركیا كردووە، ئێمە نامانەوێ باجی ئەو ململانێیە بدەین، خەڵكی ئێمە باجەكەی دەدەن.

دەستێوەردان لە بابەتی ناوخۆیی هیچ وڵاتێک ناکەین

كاتێك باسی بابەتی ناوخۆیی توركیا دەكەین، شتێكە دەبێ رێزی لێ بگرین، دەستێوەردان لە بابەتی ناوخۆیی هیچ وڵاتێك ناكەین، وەك ناشمانەوێت خەڵكیتر دەستیوەردان لە بابەتی ناوخۆییمان بكەن. ئێمە دەستێوەردان ناكەین مەگەر بانگهێشت بكرێین. پێمان باشە هەموان بە ئاشتی بژین.

ئێمە ڕێككەوتنمان لەگەڵ حكوومەتی فیدرالی لە بەغدا هەیە كە پێی دەڵێن رێككەوتنی شنگال، بەپێی ڕێككەوتنەكە دەبێ هێزە نایاساییەكان ناوچەكە بۆ سوپای عێراق جێبهێڵن. دەبێ كوردستان و عێراق رێگە بدەن ئاسایشی ناوچەكە بۆ خەڵكی خۆجێیی جێبهێڵن. پێشمەرگە و سوپای عێراق ئاسایشی دەرەوەی ناوچەكە بپارێزن. بەداخەوە ڕێككەوتنەكە جێبەجێ نەكراوە. دەكرا ئەمە دەروازەیەك بێت بۆ ناوچەكانی دیكەش.

دەبێ پەکەکە لە شنگال بچنە دەرەوە

پەكەكە و هەندێك هێزی نزیك لە پەكەكە ناوچەكەیان كۆنتڕۆڵ كردووە و هەندێك هێزی لە یاسادەرچووش هەن كە پاڵپشتی لێ دەكەن. پەكەكە هیچ رێگەیەكی نییە بچێتە شنگال مەگەر لە سووریاوە بێن. پەكەكە بۆچی لە شنگالن؟ دەبێ پەكەكە بچنە دەرەوە. كاندیدەكانیش رێگرییان لێكرا بچنەوە لە شنگال بانگەشەی هەڵبژاردن بكەن. پەكەكە ڕێگری لێ كردن. لایەنێكی نایاسایی رێگری دەكات لە خەڵك و كاندیدی شەرعیی یاسایی ناوچەكە بۆ بانگەشەكردن، ئەمە مانای زۆرە. هانی حكوومەتی عێراق دەدەین بە كردار تەنیا لایەنە دەستووری و یاساییەكان لە شنگال بن و رێككەوتنی شنگالیش بە زوویی جێبەجێ بكرێت.

 پاڵپشتی ئازادیی ڕادەربڕین و ڕاگەیاندن

زۆر پاڵپشتی ئازادیی راگەیاندن و رادەربڕین دەكەین و حكوومەت هیچ ئاستەنگێك دروست ناكات، بەڵام هەندێك لایەن ئەمە بەكار دەهێنن بۆ هێرشكردنە سەر حكوومەت. ئێمە دادگامان هەیە و دادگا بڕیاری داوە كە چارەنووسی ئەو كەسانەی ئەم كارە دەكەن چۆن بێت. ئێمە ئینكاری ناكەین كە كەموكوری هەیە، داوامان كردووە هەموان هاوكاریمان بكەن. بە تەواوی متمانەوە دەڵێم ئەم حكوومەتە زۆر پشتیوانی لە ئازادیی رادەربڕین دەكات. هەندێك تۆمەت پێویستییان بە لێكۆڵینەوەی یاسایی هەیە. هەندێك لایەنی ئۆپۆزسیۆن، یان نەیار دەیانەوێ پاساوێك بدۆزنەوە بۆ هێرشكردنە سەر حكوومەت.

كەسێكی راشكاوم و ئەوەی مەبەستمە دەیڵێم

ئێمە ڕێزێكی زۆرمان بۆ مافەكانی مرۆڤ هەیە و هەموو كات پشتیوانی مافەكانی مرۆڤمان كردووە. ئەگەر سەیری هەموو چالاكوانان و رۆژنامەنووسان بكەیت، دەبینین لە بەشەكانی دیكەی ناوچەكەوە دێنە هەرێمی كوردستان و لێرە هەست بە ئاسایش و ئازادی دەكەن.

من پێموانییە كەسێكی هەستیار بم، دەبێ ئەو بەڕێزانە پێم بڵێن، من كەسێكی جددی و پابەندم بە پرەنسیپەكان. كەسێكی راشكاوم و ئەوەی مەبەستمە دەیڵێم، دەمەوێ زۆر بە جددی كار لەسەر ئەو ئەركە بكەم كە پێم سپێردراوم. هیچ كاتێك لە ڕووبەڕووبوونەوەكان نەترساوم.

 لە حكوومەتی ئێمە هیچ مووچەیەك پاشەكەوت نەكراوە لەم كابینەیە، ئەوەی پێشتریش پاشەكەوت كراوە كەس نەیگوتووە مافی هاووڵاتییان و مووچەخۆران دەخورێت. با واز لە عاتیفە بهێنین، حكوومەت چەند پارەی هەیە و دەتوانیت چەند پارە بداتەوە؟ هیوادارم لە دەسەڵاتی بەغدا ئەم پرسیارە بكرێت. لە 2014 تا 2017 حكوومەتی عێراق هیچ پارەیەكی بۆ كوردستان نەنارد و حكوومەتی هەرێم ناچار بوو قەرز لەو كۆمپانیایانە بكات كە نەوت لە هەرێمی كوردستان دەكڕن.

بە هیچ شێوەیەك بەرنامەی حكوومەت نەبووە پارەی مووچەخۆران نەدات

من داوا دەكەم هەموومان داوای مافی خۆمان لە بەغدا بكەین كە ئەو مووچانەی پاشەكەوت كراون یان نەدراون، حكوومەتی بەغدا ناچار بكرێت ئەو پارەیە بۆ مووچەخۆران بگەڕێنێتەوە. ئەوەی پێمان كراوە كردوومانە. بە هیچ شێوەیەك بەرنامەی حكوومەت نەبووە پارەی مووچەخۆران نەدات.

ئێمە ملیۆنێك و نزیكەی 200 هەزار مووچەخۆرمان هەیە، چەند هاووڵاتیمان هەیە؟ شەش بۆ حەوت ملیۆن هاووڵاتی بە ناوچە دابڕێندراوەكانیشەوە هەن. ئایا حكوومەت تەنیا حكوومەتی مووچەخۆرە یان هەموو هاووڵاتییانە؟ ئایا ئەوانەی مووچەخۆر نین مافی ئەوەیان نییە خزمەتگوزارییە جۆراوجۆرەكانیان بۆ دابین بكرێت؟ ناتوانین پێنج ملیۆن كەس بكەینە قوربانیی ملیۆنێك مووچەخۆر؟ لە هەمانكاتدا ئەولەویەتمان بە مووچە داوە، ئەركی حكوومەتە مووچە بدات، بەڵام مافی مووچەخۆران لەلایەن حكوومەتی فیدراڵەوە راگیراوە و نەدراوە، لە لایەكی دیكەشەوە كاری حكوومەتە مافی هەموو هاووڵاتییان بدات بە مووچەخۆر و نامووچەخۆریشەوە.

 لەبارەی ئاسایشی خۆراك، كاتێك چووین و پرۆژەكەی هەولێرمان كردەوە، ئەوكاتە بوو كە وەزیرێك باسی ئەو جۆرە ئاردەی كرد كە هاوردە دەكرا، هەندێك لە بازرگانەكان ماددەیەكیان تێ دەكرد كە مەرغوبترە و سپیترە، ئەمە مەقبوول نەبوو، ئێمە لێژنەیەكمان پێك هێناوە لەگەڵ ئەو بازرگانانە، ئەگەر بە مەبەست بووبێت دەبێ ئیجرائاتیان لەگەڵ بكرێ. ئەو ئاردەی لە كوردستان بەرهەم دێ هیچ ماددەیەكی تێ ناكرێ و هەمووی سرووشتییە. بۆیە هاووڵاتییانی كوردستان دەتوانن دڵنیا بن.

هیچ بەربەستێک نییە کە ئافرەت بە باڵاترین توانای خۆی بگات

لەبارەی ئافرەت رێزێكی زۆرم بۆ ئافرەت هەیە و وەك ئافرەت هەموو مافێكی هەیە. كە ئافرەت داوای كۆتا دەكات دان بە راستییەكی تاڵدا دەنێت كە ئافرەت یەكسان نییە بە پیاو. پێویستە هەموو كەسێك ئافرەت بێ یان پیاو بە مافی خۆی بگات و دروستكردنی هەلی یەكسان ئەركی حكوومەتە، بۆ ئەوەی ئافرەت هیچ بەربەستێكی نەبێت، ئەمە باشترە بۆ ئەوەی ئافرەت بە باڵاترین توانای خۆی بگات. لەم كابینەیەدا سێ وەزیری ئافرەت هەن و لە بەشەكانی حكوومەتیش زۆر سوودمان لە ئافرەت وەرگرتووە.

پەرەدان بە کەرتی گەشتوگوزار بەشێکە لە بەرنامەی حکوومەت

لەبارەی گەشتوگوزار، ئێمە كە گوتمان دەمانەوێ ئابووریمان هەمەجۆر بكەین، بەشێكی گەشتوگوزارە، لەم دوو ساڵەی رابردوو كۆرۆنا بووە كێشەیەكی گەورە، زۆر لەو گەشتیارانەی ویستوویانە بێن و سەردانی كوردستان بكەن، نەیانتوانی، هەرچەندە لەم دواییە خەڵكێكی زیاتر هاتن، بەڵام پەرەپێدان بە كەرتی گەشتوگوزار بەشێكە لە بەرنامەی هەمەجۆركردنی داهات و لەسەری دەوەستین.

دەمانەوێ بەرەیەکی کوردستانی هەبێ

ئێمە ئەجێندایەكمان هەیە بۆ كوردستان، پارتی، نەمانگوتووە پارتی بە تەنها نوێنەرایەتیی هەموو كوردستان دەكات، پارتی سوورە لەسەر ئەوەی قسە لەگەڵ هەموو لایەنەكانی كوردستان بكات بۆ ئەوەی بەرەیەكی كوردستانیی گشتگیر دروست بكات. بە تەنها دانوستان ناكەین و لەسەر ئەجێنداكە گفتوگۆ دەكەین. ژمارەیەكی زۆر لە ماددە دەستوورییەكان جێبەجێ نەكراون. چاوەڕێ دەكەین بزانین شیعەكان خۆیان لەسەر چی رێك دەكەون، سووننەكانیش بە هەمان شێوە.

 دەمانەوێ بەرەیەكی كوردستانیمان هەبێ و پارتی دەستپێشخەری كردووە و چۆتە لای لایەنە سیاسییەكان تاوەكوو پێكەوە لەگەڵ شیعە و سوننەكان و ئەوانەی دیكە گفتوگۆ بكەن و حكوومەتیكی گشتگیر دروست بكرێ كە ڕێز لە دەستوور و جێبەجێ بكرێ. هەر لایەنیك هاتە پێشەوە و بەڵێنی دا دەستوور جێبەجێ بكات، بە دلنیاییەوە پشتیوانیی هەرێمی كوردستانیشی دەبێ.

ڕێز لە ژینگە بگرین

لەوەتەی من كابینەكەم وەرگرتووە، داوام لە وەزیرەكان و وەزیری شارەوانی كردووە كە پرۆگرامێك دابنێن بۆ ئەوەی كۆمپانیا نێودەوڵەتییەكان بهێننە هەرێمی كوردستان بۆ كۆكردنەوەی خۆڵ و خاشاك. ئەمڕۆ كۆبوونەوەم لەگەڵ لێژنەكە هەبووە و ئەوان كاری باشیان كردووە. حكوومەت دەیەوێ زبڵ و خاشاك كۆ بكات و دووبارە ریسایكلین بكرێت، نامانەوێ هەر كۆی بكەینەوە و دووبارە لە شوێنێكیتر فڕێی بدەینەوە. ئێمە داوامان لە چەندین وڵات كردووە و تیمەكانمان ناردووە تا بزانین لە وڵاتان چۆن ئەمە چارەسەر كراوە؟ بە زووییەوە ئەو كۆمپانیایانە بانگهێشت دەكرێن. لێرەشەوە داوا دەكەم هەموو كۆمپانیاكان پێشنیازی خۆیان بكەن بۆ ئەوەی ئەو خۆڵ و خاشاكە كۆ بكرێتەوە و ڕیسایكلین بكرێت.

بەڵام یەك شت هەیە، ئەمە بەرپرسیارێتیی هاووڵاتییان و تاكەكانە، دەبێ ژینگەكەی خۆمان بپارێزین، دەبێ بزانین چۆن ئاسمان و ئاو و زەویی خۆمان بە خاوێنیی ژینگەمان بپارێزین. داوا لە هەموو هاووڵاتییان دەكەین ڕێز لە ژینگە بگرن.