خوێندنی کوردی لە سنووری کەرکووک ئەمساڵ لە چ دۆخێکدایە؟
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

خوێندنی کوردی لە سنووری کەرکووک ئەمساڵ لە چ دۆخێکدایە؟

مامۆستایەك: با واز لەو بیركردنەوەیە بهێنرێت كە پێیان وایە خوێندنی عەرەبی لە كوردی باشترە

ناونووسین بۆ وەرگرتنی قوتابیانی پۆلی یەكەمی سەرەتایی لە كەركووك بەردەوامە و مامۆستایەك داوا لە دایكان و باوكان دەكات كە منداڵەكانیان بخەنە بەر خوێندنی كوردی، هاوکات سەرپەرشتیاری خوێندنی كوردی لە كەركووك ڕایگەیاند، ئەمساڵ وەزارەتی پەروەردەی حكوومەتی هەرێمی كوردستان پەرتووكی زۆری بۆ خوێندنی كوردی لە كەركووك دابین كردووە.

واز لەو بیركردنەوەیە بهێنرێت كە پێیان وایە خوێندنی عەرەبی لە كوردی باشترە

لەم بارەوە شێركۆ مەجید مامۆستای خوێندنی کوردی لە كەركووك، بە (باسنیوز)ی ڕاگەیاند: "داواکارم دایكان و باوكانی كورد لە كەركووك منداڵەكانیان بخەنە بەر خوێندنی كوردی و واز لەو بیركردنەوەیە بهێنن كە دەڵێن خوێندنی عەرەبی باشترە و خۆمان هەر كوردین و فێری زمانی خۆمان بە خوێندن و نووسین دەبین، چونكە منداڵ مافی خۆیەتی بە زمانی زگماكی خۆی بخوێنێت، پاشان گەورە بوو با خۆی فێری زمانی تر بكات".

گوتیشی: "ئەوەی كە تێبینی دەكرێ لە كەركووك ساڵانە دایكان و باوكانی كورد كەمتر منداڵەكانیان دەخنە بەر خوێندنی عەرەبی كە ئەوەش كێشەیە و ڕۆژێك دادێ لەناو گەڕەكە كوردییەكان خوێندنی كوردی نەمێنێت و قوتابخانەكان لە خوێندنی كوردییەوە بكرێن بە عەرەبی كە ئەوەش كێشەیەكی گەورەیە".

لەم بارەوە ئەمڕۆ سێشەممە 26/10/2021 شێرزاد ڕەشید، بەڕێوەبەری خوێندنی كوردی لە كەركووك، بە (باسنیوز)ی ڕاگەیاند: “پرۆسەی وەرگرتنی قوتابییان بۆ پۆلی یەكەمی سەرەتایی لە كەركووك بەردەوامە تاكوو ڕۆژی دەستپێكردنی خوێندنی ساڵی نوێ كە بڕیارە لە یەكی مانگی داهاتوودا پرۆسەی خوێندن دەست پێ بكات و پێشوازییەکی باش بۆ خوێندنی كوردی هەیە و خەڵك منداڵەكانیان دەخەنە بەر خوێندنی كوردی، بەڵام لە بەرانبەردا خەڵكی تریش هەیە كە كوردن و منداڵەكانیان دەخەنە بەر خوێندنی زمانەكانی تر، ئەوە لە هەرێمی كوردستانیش هەیە كە منداڵەكانیان دەخنە بەر خوێندنی ئەهلی، بەڵام زۆربەی هاووڵاتییانی كورد منداڵەكانیان دەخەنە بەر خوێندنی كوردی".

ڕاشیگەیاند: "یەكی مانگی داهاتوو ڕێورەسمی ساڵی نوێی خویندن بەڕێوە دەچێت و بەو شێوە و میكانزمەی كە وەزارەتی پەروەردەی حكوومەتی عێراق دایناوە دەوام دەست پێ دەکات، هەموو ئەو ڕێنوێنیاانەشمان بڵاو كردووەتەوە كە لەناو قوتابخانەكان بۆ خۆ پارێزی لە پەتای کۆرۆنا چۆن مامەڵە دەكرێت".

خەڵك ئەو پێشوازییەی جارانی بۆ خوێندنی كوردی نەماوە

هەر لەبارەی ئەم پرسەوە ئەسعەد عەزیز، سەرپەرشتیاری خوێندنی كوردی لە كەركووك، بە (باسنیوز)ی ڕاگەیاند، بۆ ئەمساڵی خوێندن وەزارەتی پەروەردەی حكوومەتی هەرێمی كوردستان كتێبی زۆری بۆ خوێندنی كوردی لە كەركووك دابین كردووە، بەڵكوو لە ساڵانی پێشوو زیاتر كتێببی دابین كردووە و سەبارەت بە خوێندنی كوردی لە كەركووك لێتان ناشارمەوە كەوا تا ڕادەیەك خەڵك ئەو پێشوازییەی جارانی بۆی نەماوە، هەرچەندە هەر بەردەوامە و لە گەڕەكە كوردییەكان منداڵەكانیان دەخەنە بەر خوێندنی كوردی، ئەمساڵ رێژەیەكی زۆر لە قوتابییان ناونووس كراون بۆ وەرگرتنیان بۆ پۆلی یەكی سەرەتایی كە ئەو پرۆسەیە هێشتا هەر بەردەوامە".

ڕوونیشی كردەوە: "ئێمە ئەگەر ئامارێك وەربگرین، ساڵ بەساڵ ڕێژەی قوتابییانمان وەكوو ڕێژە زیاد دەكات، بەڵام ئەگەر وەكوو دانیشتووان سەیری بكەین كەمترە".

بۆ ساڵی نوێی خوێندن هەموو ئامادەكارییەك كراوە

سەرپەرشتیاری خوێندنی كوردی لە كەركووك گوتیشی: "هەموو ئامادەكارییەك بۆ ساڵی نوێی خوێندن كراوە و لە هەمانكاتدا خوێندنی كوردی بێ كێشە نییە و یەكێكی تر لە كێشەكان كە هەمانە لە كەركووك ساڵانە خوێندنی عەرەبی گێچەڵمان پێ دەكەن بۆ ئەوەی باڵەخانەی خوێندنی كوردی وەربگن بۆ خوێندنی عەرەبی، بەڵام ئێمە ڕێگەمان نەداوە".

لە كەركووك 92 هەزار قوتابی لە بەشی خوێندنی كوردی هەیە، جیا لەوانەی كە ئەمساڵیش قوتابیانی تر بۆ پۆلی یەكەمی سەرەتایی وەردەگیرێن، هەروەها زیاتر لە 500 قوتابخانە و 37 باخچەی ساوایانی خوێندنی كوردی هەیە.

حەوت هەزار و 600 مامۆستا و هەزار و 400 فەرمانبەری سەر بە وەزارەتی پەروەردەی حكوومەتی هەرێمی كوردستان لە كەركووك دەوام دەكەن.