ئەمڕۆ چوارەمین ساڵوەگەڕی داستانی سحێلایە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

ئەمڕۆ چوارەمین ساڵوەگەڕی داستانی سحێلایە

سەرۆك بارزانی لە كتێبی (بۆ مێژوو)دا: شه‌ڕى سحێلا یه‌كێكه‌ له‌ گه‌وره‌ترین نه‌به‌ردییه‌كانى مێژووى نوێى گه‌لى كوردستان

ئەمڕۆ چوارەمین ساڵوەگەڕی تۆماركردنی داستانی سحێلایە، كە هێزی پێشمەرگەی كوردستان لەو داستانەدا بەرگرییەكی سەختی دژی چاوتێبڕانی ئەزموونی هەرێمی كوردستان كرد و دوژمنی ناچار بە كشانەوە كرد.

ئەمڕۆ 26/10/2021 چوار ساڵ بەسەر ساڵوەگەڕی تۆماركردنی داستانی سحێلادا تێدەپەڕێ، كە لەو رۆژەدا هێزی پێشمەرگەی كوردستان بە درێژایی رۆژ وەڵام و بەرپەرچی سەختی هێرشە یەك لە دوای یەكەكانی میلیشیا عێراقییەكان و هێزەكانی دیكەی عێراقی دایەوە، كە بە پاڵپشتیی و ڕێنوێنیی شارەزایی ئەفسەر و پلەدارانی وڵاتێكی دیكە بە نیازی لەباربردنی ئەزموونی هەرێمی كوردستان هێرشەكانیان بۆ ئەو دەڤەرەی هەرێمی كوردستان دەست پێ كردبوو.

لەو داستانەدا، دەیان ئۆتۆمبێل و زرێپۆش و تانك و ئامێری سەربازیی دوژمن تێك شكێنران و ژمارەیەكی زۆریش لە میلیشیا و هێزە  هێرشبەرە هاوشانەكانیان كوژران و بە ناچاری پاشەكشەیان پێ كرا و نەبەردی و خۆڕاگریی كەموێنەی پێشمەرگە، خەیاڵی هێرشی دیكە و پێشڕەویی دوژمنی بەرەو هەرێمی كوردستان لە چاڵ نا.

ئەو داستانە مەزنە، بە خوێنی پیرۆزی چەند پێشمەرگە و فەرماندەیەكی سەربازی تۆمار كرا.

سەرۆك بارزانی، لە كتێبی "بۆ مێژوو"ـدا، باسی وردەكارییەكانی داستانی سحێلا و مەحموودییە و دەكا و دووپاتی دەكاتەوە، هێرشەكان بۆ مەبەستی دەستبەسەرداگرتنی پیشخابوور بووە، ئاشكراشی دەكا بە هۆی بەرگریی سەختی پێشمەرگەوە، مل بۆ دانوستان درا.

سه‌رۆك بارزانى له‌باره‌ى داستانى مه‌زنى مه‌حمودییه‌ و سحێلاوە، له‌ لاپه‌ڕە‌ 117ـی كتێبی (بۆ مێژوو)ـدا، ئاماژه‌ى به‌وه‌ كردووه‌، كه‌ له‌ 26ى ئۆكتۆبه‌ری 2017ـدا، له‌ به‌ره‌ى مه‌حمودییه‌ و سحێلاوە، هێزه‌كانى عێراق و حه‌شد به‌ هاوكارى هێزه‌كانى ئێرانى و حزبوڵڵاى لوبنان و به‌ فه‌رمانده‌یى راسته‌وخۆی ئه‌فسه‌رێكى پاسدارانى ئێرانى به‌ ناوى سه‌ید موختار (كه‌ له‌و شه‌ڕه‌دا برینداریش بووه‌) به‌ مه‌به‌ستى گرتنى پیشخابوور په‌لامارى سه‌نگه‌ره‌كانى پێشمه‌رگه‌یاندا، به‌ڵام دووچارى شكستێكى زۆر گه‌وره‌ بوونه‌وه‌. سه‌رۆك بارزانى ئاماژه‌ى بۆ ئه‌وه‌ش كردووه،‌ كه‌ شه‌ڕى سحێلا یه‌كێكه‌ له‌ گه‌وره‌ترین نه‌به‌ردییه‌كانى مێژووى نوێى گه‌لى كوردستان، دواى ئه‌و شكه‌سته‌ گۆڕانى به‌ سه‌ر هاوكێشه‌كاندا هێنا و دانوستانى ده‌ستى پێكرد.

سه‌رۆك بارزانى دەشنووسێت "عه‌بادى لوتبه‌رز و مه‌غرور بوو، ئاماده‌ى دانوستانى سیاسیی نه‌بوو و داواى كردبوو كه‌ تیمه‌ فه‌نییه‌ سه‌ربازییه‌كان دانوستان بكه‌ن، ئاماژەشى به‌وه‌ كردووه‌ كه‌ له‌ یه‌كه‌م گه‌ڕى دانوستاندا نوێنه‌رانى هێزه‌ عێراقییه‌كان و نوێنه‌رى سوپاى پاسداران و حزبوڵڵاى لوبنان ئاماده‌ى بوون و له‌ دانوستانه‌كه‌دا عێراقییه‌كان به‌ پێى قسه‌ و فرمانى نوێنه‌رانى ئێران و حزبولڵا ده‌جووڵانه‌وه‌ و ئه‌وه‌ش ئه‌وپه‌رى سووكایه‌تى كردنى عه‌بادى بوو به‌ سه‌روه‌ریی عێراق، كه‌ خه‌ڵكى بیانى بێت و بڕیار له‌ سه‌ر هێڵه‌كانى ته‌ماس بده‌ن، بۆیه‌ وەك هەرێمی كوردستان، بڕیاریان داوە چیتر دانوستانیان لەگەڵدا نەكەن.