ژبەر رێگری‌ ل زڤرینا ئیدارا شەرعی زیانەكا مەزن گەهشتییە شنگال
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

ژبەر رێگری‌ ل زڤرینا ئیدارا شەرعی زیانەكا مەزن گەهشتییە شنگال

جێگرێ پارێزگارێ‌ نەینەوا: پشتی هەلبژارتنان پێدڤییە ئیدارا شەرعی بزڤرتە شنگال

پشتی هەلبژارتنان دبیت ئیدارا شەرعی بزڤرتە شنگال بۆ دانانا قایمقامێ‌ ژی دێ‌ هەماهەنگی ناڤبەرا حكومەتا هەرێما كوردستانێ‌ و عێراقێ دا هەبیت.

 عومەر عەلی، جێگرێ پارێزگارێ‌ نەینەوا بۆ كارۆبارێن ئاواران دیدارەكی دا بۆ (باسنیوز) راگەهاند كو: "زۆر یا گرنگە حكومەتا بهێت یا عێراقێ پووتەی كێشەیا شنگال بدەت ب تایبەتی ژی وارێ زڤرینا ئاواران بۆ شنگال و دابینكرنا تەناهی و قەرەبووكرنا خەلكێ‌ شنگال یێن ژلایێ‌ تیرۆرستێن داعش ڤە سالە 2014ێ‌ تووشی زیانی بووین، هەروەسا كار بهێتە كرن بۆ زڤرینا ئیدارا شەرعی بۆ شنگال چونكو هەتا ئیدارا شەرعی نەزڤرتە شنگال ئاڤەدانی ل شنگال دەست پێ‌ ناكەت هەروەسا ژی ئاوارە ژی نەشێن ڤەگەرن".

جێگرێ پارێزگارێ‌ نەینەوا بۆ كارۆبارێن ئاواران، ئاشكەرا كر كو: "دبیت حكومەتا هەرێما كوردستانێ‌ و عێراقێ  رێكەفتنێ ل سەر دانانا كەسەكێ‌ بكەن بۆ پۆستێ‌ قایمقامێ‌ شنگال. ئەز دبینم پشتی هەلبژارتنان دێ‌ ئیدارا شەرعی زڤرتە شنگال".

عومەر عەلی گۆت ژی: "نەزڤرینا ئیدارا شەرعی بۆ شنگال زیانەكا مەزنە، ب هەر شێوەیەكێ‌ هەبیت پێدڤیە ئیدارا شەرعی بزڤرتە شنگال چونكو شنگال ئاڤەدان نابیت هەكە ئیدارا شەرعی نەزڤرتە شنگال. ئەڤە پێنچ سالن ئیدارا شەرعی نەچوویە شنگال دئەنجامدا ژی پرۆژە نەهاتینە بجه ئێنان وئاڤەدانی نەهاتیە كرن وئاواران ژی نەشیاینە ڤەگەرن. هەر دەمێ‌ ئیدارا شەرعی زڤریە شنگال دێ‌ بۆ ئاواران ژی باوەری دروست بیت و دێ‌ دەلیڤێن كاركرنێ‌ پەیدابن دێ‌ خەلك زڤرنە شنگال".

گۆتژی: "شنگال ناهێتە ئاڤەدانكرن ژبەر نەزڤرینا ئیدارا شەرعی بۆ شنگال هەر دەمێ‌ ئیدارا شەرعی هاتە ناڤ شنگالدا دێ‌ رێكخراو ژی قەستا شنگال كەن بۆ ئاڤەدانی و دابینكرنا پرۆژان".

عومەر عەلی، ئاشكەرا كر كو: "هەتا نوكە پتر ژ 140 هزار ئاوارێن شنگال ناڤ كەمپاندا ل سنورێ‌ پارێزگەها دهۆكێ‌ ماینە ژبلی ئاوارێن ناڤ هەیكەل وژدەرڤەی كەمپان دژین. هەتا نوكە پتریا خەلكێ‌ شنگال ئاوارەنە و چاڤەرێنە پشتی هەلبژارتنان كێشەیان شنگال چارەسەرببیت وئیدارا شەرعی بزڤرتە شنگال".

باپیر خدر حەجی، رێڤەبەرێ‌ باژێرڤانیا شنگال بۆ (باسنیوز) راگەهاند كو: "80% شنگال ژلایێ‌ تیرۆرستێن داعش ڤە هاتیە وێرانكرن، گەلەك جاران مە هەولدان كرن بزڤرینە شنگال لێ‌ هێزێن نەیاسایی‌ رێگریێ‌ ل زڤرینا ئیدارا شەرعی كرن، ئەڤە بوویە ئەگەر ئەم نەشێن چوو پرۆژەیێن خزمەتگوزاری ل شنگال ئەنجام بدەن".

ئاشكەرا كر كو: "ئەڤە پتر ژ پێنج سالان ب تایبەتی ژی پشتی 16 ئۆكتۆبەرا سالا 2017ێ‌ مە نەشیاینە زڤرینە شنگال بۆ دەستپێكرنا ئاڤەدانی و گەهاندنا پرۆژەیێن خزمەتگوزاری چونكو رێگریێ‌ ل زڤرینا ئێدارا شنگال هاتیە كرن. ئەگەر رێگری نەهاتبا كرن ئەم چووباینە شنگال نوكە پتر 40% شنگال هاتبوو ئاڤەدانكرن لێ‌ مخابن ئەڤە چەند سالن ئەم نەچووینە شنگال ژبەر ئالۆزیێن هێزێن نەیاسایی‌".