دووكەڵ و بۆنی زبڵ و خاشاك خەڵکی کەرکووکی هەراسان کردووە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

دووكەڵ و بۆنی زبڵ و خاشاك خەڵکی کەرکووکی هەراسان کردووە

"شارەوانی بەپێی پێویست زبڵ و خاشاك کۆ ناکاتەوە"

جیا لەوەی بۆنێكی ناخۆش كە هاوشێوەی بۆنی غاز بە ژمارەیەك گەڕەكی كەركووك بڵاو دەبێتەوە، ئێستا دیاردەیەكی تر لە شارەكەش سەری هەڵداوەتەوە كە ئەویش ئاگر تێبەردانە لە زبڵ و خاشاك لەناو گەڕەكەكان كە دووكەڵەكەی هاووڵاتییانی هەراسان كردووە.

بەهۆی كەڵەكەبوونی زبڵی زۆر و بەتایبەتی بە شەوان ئاگر لە زبڵ بەر دەدرێت، بەهۆی ئەوەی شارەوانی كەركووك زبڵ و خاشاكی شارەكە بەپێی پێویست کۆ ناكەنەوە، هەروەها پاككەرەوەكان ناگەنە چەند شوێن و گەڕەكێكی شارەكە و بەشێك لە هاووڵاتییان زبڵ و خاشاكەكانیان لە كۆڵان و شوێنە گشتییەكان فڕێ دەدەن و بەهۆی كەڵەكەبوونی زبڵی زۆر و بەتایبەتی شەوانە ئاگر لە زبڵ و خاشاكەكان بەر دەدرێت كە دووكەڵێكی زۆر پیس لە چەند گەڕەكێكی شارەكە و بەتایبەت لە گەڕەكەكانی پەنجاعەلیی، ڕزگاری، دەروازە و شۆراوی كەركووك بڵاو دەبێتەوە و ئەمەش بووەتە دیاردە و خەڵکی هەراسان کردووە.

لەلایەكی ترەوە ماوەیەكە بۆنێكی ناخۆش لە كەركووك بڵاو بووەتەوە كە كەركووكییەكانی هەراسان كردووە و تاكوو ئێستا لایەنە پەیوەندیدارەكان نەگەیشتوونەتە سەرچاوەی بۆنە ناخۆشەكە و كەركووكییەكان دادوبێدادیانە بەدەست ئەو بۆنە ناخۆشەوە، هەروەها دووكەڵی پیس كە پسپۆڕانی پزیشكی ئاماژە بۆ ئەوە دەكەن ئەو بۆن و دووكەڵانە سەرچاوەی سەرەكین بۆ نەخۆشیی جۆراوجۆر.

(باسنیوز) لەبارەی ئەم پرسەوە چەند جارێك پەیوەندیی بە فەرەیدون وەیس، بەڕێوەبەری شارەوانیی كەركووكەوە كرد، بەڵام وەڵامی پەیوەندییەكانی نەدایەوە.

بۆ هەمان مەبەست (باسنیوز) پەیوەندی بە دلێر شوانی، ئەندامی شانەی قەیرانەكانی كەركووكەوە كرد و گوتی: "دەبێ لە شارەوانی پرسیار بکرێت كە ئەم شارە بۆ پیسە، هەموو شتێك بۆ شارەوانی كراوە، دەبێ خەمی ئەو دیاردەیە بخوات".

ئەندامی شانەی قەیرانەكانی كەركووك ڕاشیگەیاند: "بەرپرسانی شارەوانی دەڵێن، ئەو پارەیەی كە تەرخان كراوە، بەتەواوەتی بەشی پاككردنەوەی شارەكە ناكات، بەڵام دەتوانن هەموو هەوڵێك بدەن بۆ پاككردنەوەی شارەكە و شارەكە پیسە و پاك ناكرێتەوە".

هەر لەم بارەوە فەرهاد قادر، هاووڵاتییەكی دانیشتووی گەڕەكی پەنجاعەلی-ی كەركووك بە (باسنیوز)ی ڕاگەیاند: "بەڕاستی كەس نییە خەمی خەڵكی كەركووك بخوات، جگە لەوەی لە گەڕەكەكەی ئێمە و چەندین گەڕەكی تر هیچ خزمەتگوزارییەكی بۆ ناكرێت، تەنیا داوا دەكەین كە نەجاتمان بدەن لە بۆنی دووكەڵ و غاز كە بەڕاستی ژیانمان زۆر ناخۆش بووە و ئەم هاوینەمان بە زۆر تێپەڕاندووە كە هەر موبەڕیدەمان دەكردەوە زیاتر بۆنی غاز و دووكەڵی پیس دەهاتە ژوورەوە".

بەهۆی دووكەڵ و بۆمی زبڵەوە خەڵک شەوان ناتوانن بێنە دەرەوە

فەرهاد قادر گوتیشی: "ئەوانەی كە ئاگر لە زبڵ و خاشاك بەر دەدەن، زیاتر كەسانێكن كە دەڕۆن بە پارە زبڵ و خاشاكی ماڵەكان كۆ دەكەنەوە و دواتر دەیهێننە دەروازەی شارەكان، یاخود سنووری گەڕەكەكان، ئاگری تێ بەر دەدەن، ئەمەش دووكەڵێكی زۆر پیس دروست دەكات كە ژینگەی شارەكە پیس دەكات و خەڵك لەبەر ئەو دووكەڵە و بەتایبەت لە شەواندا ناتواننن بێنە دەرەوە".

هەر لەم پێوەندییەدا ئەمڕۆ دووشەممە 25/10/2021 فەلاح خەلیل یایچی، قایمقامی ناوەندیی كەركووك، بە (باسنیوز)ی ڕاگەیاند: "دیاردەیەكی زۆر ناشارستانییە كە ئاگر لە زبڵ بەر بدرێت، چونكە كاریگەریی نەرێنی دەکاتە سەر ژینگە و تەندروستیی هاووڵاتییان، بەڵام هۆكارەكەی بۆ ئەوە دەگەڕێتەوە كە ئەو بڕە پارەیەی بۆ شارەوانیی كەركووك تەرخان كراوە بۆ هەڵگرتنی زبڵ و خاشاك كەمە، بۆیە خەڵكیش زبڵەكە بەو شێوەیە فڕێ دەدات".

ڕاشیگەیاند: "پێویستە هاووڵاتییان هۆشیار بكرێنەوە لەسەر ئەوەی كە ئاگر لە زبڵ بەر نەدەن، بۆیە رۆژانە ئێستا سكاڵای هاووڵاتییانمان لەمەڕ ئەو دیاردەیەوە پێ دەگات، چونكە ژیان لە چەند گەڕەكیك بەهۆی ئەو دووكەڵەوە ناخۆش بووە".