كەركووك.. ئەو بۆنە ناخۆشەی بە چەند گەڕەكێكی شارەكەدا بڵاو بووەتەوە هێشتا چارەسەر نەكراوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

كەركووك.. ئەو بۆنە ناخۆشەی بە چەند گەڕەكێكی شارەكەدا بڵاو بووەتەوە هێشتا چارەسەر نەكراوە

"خەڵكی هەراسان كردووە"

ماوەیەكە بۆنێكی ناخۆش، كە لە شێوەی بۆنی غازە بە چەند گەڕەكێكی كەركووكدا بڵاو بووه‌ته‌وه‌ و خەڵكی هەراسان كردووە، لایەنە پەیوەندیدارەكانی كەركووكیش هێشتا نەگەیشتوونەتە سەرچاوەی ئەو بۆنە.

بەپێی زانیارییەكانی په‌یامنێری (باسینوز)، لایەنە پەیوەندیداركانی كەركووك، لێكۆڵینەوەی جدییان بۆ دۆزینەوەی شوێنی بۆنە ناخۆشەكە نەكردووە و كەركووكییەكان باس لەوە دەكەن ئەو شوێنەی كە بۆنە ناخۆشەكەی لێوە دێت، كارگەیەكە و هی بەرپرسانە، بۆیە كۆنتڕۆڵی ناكەن.

ئەو گەڕەكانەی كەركووك، كە زیاتر بۆنە ناخۆشەكەی تێدا تەشەنەی كردووە بریتین لە گەڕەكەكانی، پەنجاعەلی، ڕزگاری، ئەسراومەفقودین و قادسییە.

لەم بارەوە، ئەمڕۆ پێنجشەممە 21/10/2021، فەلاح یایچی، قایمقامی ناوەندیی كەركووك، بە (باسنیوز)ی ڕاگەیاند: ئەو بۆنە ناخۆشە كه‌ له‌ چەند گەڕەكێكی كەركووك بڵاو بووەتەوە، هێشتا چارەسەر نەكراوە، دوای پێكهێنانی لیژنەیەك بۆ دۆزینەوەی شوێنی ئەو بۆنە ناخۆشە هێشتا هەر نەگەییشتوونەتە ئەنجام، بۆیە ئێمە سكاڵای یاساییمان لە دژی چەند كۆمپانیا و كارگەیەك تۆمار كرد، كە پێدەچێ لەو شوێنانەوە ئەو بۆنە بڵاو بێتەوە، بەڵام تاكوو ئێستا بە دیاریكراوی كام كۆمپانیا، یان كارگەیە، كە ئەو بۆنە ناخۆشەی لێوە دەردێت، دەستنیشان نەكراوە.

گوتیشی: لە ڕێگەی فەرمانگەی ژینگەی كەركووكیشەوە لێكۆڵینەوەكانمان بۆ دۆزینەوەی شوێنی دەرهێنانی بۆنە ناخۆشەكە دەست پێكردووە و ئێمە بەردەوامین لە بەدواداچون و بۆ دۆزینەوەی شوێنی بۆنەكە و هەر ئەمڕۆ بەدواداچونی تر بۆ ئەو بابەتە دەكەین.