شارەوانی هەولێر ئاشكرای دەكات دوای تەواو بوونی ماوەی یاسایی گرێبەستی پێدانی زەوی لەلایەن سەرۆکایەتیی شارەوانی هەولێر، لەژێر چاودێری سەرۆکایەتی حکوومەتی هەرێمی کوردستان و وەزارەتی شارەوانی و گەشتووگوزار، بۆماوەی سێ ساڵی دیکە بۆ گرێبەستی کونسوڵخانەی ئەمەریکا لە هەولێر نوێکرایەوە.
سەرۆکایەتیی شارەوانی هەولێر لە راگەیاندراوێكدا لە هەژماری فەرمی خۆی لە تۆڕی کۆمەڵایەتیی (فەیسبووک) بڵاویكردووەتەوە: "ئەمڕۆ سێشەممە 19/10/2021، سەرۆکی شارەوانی هەولێر، پێشوازیکرد لە لویس یۆسۆ، بەڕێوەبەری خزمەتگوزاری لە کونسوڵخانەی گشتی ئەمریکا لە هەرێمی کوردستان و شاندی یاوەری، وێڕای بەخێرهاتنیان سوپاسی کونسوڵخانەی گشتی ئەمریکای کرد بۆ پاڵپشتی و هاوکار و هەماهەنگیان".
ئاماژە بەوەش دراوە : "دوای تەواو بوونی ماوەی یاسایی گرێبەستی پێدانی زەوی لەلایەن سەرۆکایەتیی شارەوانی هەولێر، لەژێر چاودێری سەرۆکایەتی حکوومەتی هەرێمی کوردستان و وەزارەتی شارەوانی و گەشتووگوزار، بۆماوەی سێ ساڵی دیکە بۆ گرێبەستی کونسوڵخانەی ئەمریکا لە هەولێر نوێکرایەوە".
لە راگەیاندراوەكە ئەوەش خراوەتە روو: "بەڕێوەبەری خزمەتگوزاری لە کونسوڵخانەی گشتی ئەمریکا لە هەرێمی کوردستان ڕایگەیاند، کارەکانی دروستکردنی پاشکۆی کونسوڵخانەی گشتی ئەمریکا بەخێرایی دەڕوات و لە داهاتوو کارەکان تەواو دەکرێن".
لەکۆتاییدا هەردوولا دووپاتیان کردەوە لە هەماهەنگیی و کاری هاوبەشی نێوان سەرۆکایەتیی شارەوانی هەولێر و کونسوڵخانەی گشتی ئەمریکا لە هەرێمی کوردستان.