لە هەفتەیەکدا زیاتر لە 700 هاووڵاتی سەردانی ئەنجوومەنی وەزیرانیان كردووە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

لە هەفتەیەکدا زیاتر لە 700 هاووڵاتی سەردانی ئەنجوومەنی وەزیرانیان كردووە

ئومێد سەباح: سەرۆک وەزیران لە کۆی بابەتەکان ئاگادار دەکەینەوە

ئەگەر پێشووتر و ئێستاش جارجار هەندێك لە وەزیرەكان رۆژێكی هەفتەیان هەبووە بۆ ئەوەی راستەوخۆ خەڵك و موراجیعەكان ببینن، بەڵام ئێستا ئەنجوومەنی وەزیران لە ئاستێكی باڵادا هەفتەی رۆژێكی هەیە، هەموو خەڵك و چین و توێژەكان دەبینێت و داواكاری و كێشەكانیان وەردەگرێت و بەدواداچوونیان بۆ دەكات و كێشەكانیان چارەسەر دەكات و تەنیا لە هەفتەی یەکەمی سەردانی هاووڵاتییاندا 700 کەس سەردانی ئەنجوومەنی وەزیرانیان کردووە.

دوو ژمارە تەلەفۆن بۆ پەیوەندی بەردەست کراون

د. ئومێد سەباح، سەرۆكی دیوانی ئەنجوومەنی وەزیرانی كوردستان بە (باسنیوز)ی راگەیاند: "لە چوارچێوەی كارەكانی كابینەی نۆیەمی حکوومەتی هەرێمی کوردستان، كە خزمەتكردنە بە هەموو خەڵك، رۆژانی سێشەمەی هەموو هەفتەیەك لە کاتژمێر 10 بۆ 12ی نیوەڕۆ بۆ وەرگرتنی داواكاری و سكاڵای هاووڵاتییان و فەرمانبەران لە پێشوازیدا دەبین".

روونیشی كردەوە: "بۆ ئەوەی ناوی خەڵك تۆمار بكرێت، ژمارە تەلەفۆنێك داندراوە و ئەوان وەڵام دەدەنەوە و كاتی سەرانكردنیان دیاری دەكرێت و ئێمەش خزمەتیان دەكەین".

بۆ ناوتۆمارکردن، هاووڵاتی دەتوانێت پەیوەندی بە ژمارە تەلەفۆنی (٠٧٥١٤٣٤١٠٩٩)ەوە بکات، لە فەرمانگەی کارگێڕی و دارایی و فەرمانگەش کاتی چاوپێکەوتن و سەردانی هاووڵاتییەکە رێک دەخات.

دوای ئەوەی هاووڵاتی سکاڵا و داواکارییەکەی گەیاندە سەرۆکی دیوانی ئەنجومەنی وەزیران، دەتوانێت بەدواداچوون بۆ ئەو داواکاری و سکاڵایەی بکات، بۆ ئەوەی بزانێت چی بەسەر هاتووە و گەیشتووەتە کوێ. ژمارە تەلەفۆنەکەش بریتییە لە (٠٧٥١٨٠٢٠٥٥١).

"سەرۆک وەزیران لە کۆی بابەتەکان ئاگادار دەکەینەوە"

ئومێد سەباح روونی كردەوە، بەشی سكاڵای ئەنجوومەنی وەزیران كار لەسەر سكاڵاكان دەكەن و پەیوەندی بە وەزارەتە پەیوەندیدارەكانەوە دەكەن، بۆ جێبەجێكردنی داوا و داخوازییەكان.

هەندێك پێیان وابوو: "ئەو بابەتە لە دوای هەڵبژاردن نامێنێت"، بەڵام سەرۆكی دیوانی ئەنجوومەنی وەزیران دەڵێت: "بە دڵنیاییەوە ئەو كارە بۆ خزمەتكردنی خەڵك بەردەوام دەبێت".

فەرمانگەی کارگێڕی و دارایی ئەنجوومەن و بەشی سکاڵا لە فەرمانگەی هەماهەنگی و بەدواداچوونی ئەنجوومەنی وەزیران لەو بابەتە رۆڵێكی سەرەكییان هەیە".

د. ئومێد سەباح، جەختیشی كردەوە: "پێویستە بەدەر لە کاری کارگێڕیی خۆمان، گوێ لە خەم و داواکارییەکانی خەڵک بگرین و خزمەتیان بکەین".

سەبارەت بە چارەنووسی ئەو داواکاری و سکاڵایانەی هاووڵاتییان ڕاستەوخۆ دەیگەیەننە ئەنجوومەنی وەزیران، د. ئومێد سەباح باسی لەوەش کر: "ئەوەی لە چوارچێوەی دەسەڵاتەکانی ئێمەدا بێت، کارەکانیان بۆ ڕایی دەکەین و ئەوەی پەیوەندیشی بە وەزارەتەکانەوە هەبێت، بۆ ئەوانی ڕەوانە دەکەین، تا کاری لەسەر بکەن و دواتریش جەنابی سەرۆک وەزیران لە کۆی بابەتەکان ئاگادار دەکەینەوە".

تەنیا هەفتەی یەكەمی بینینی خەڵك، زیاتر لە 700 هاووڵاتی سەردانی ئەنجوومەنی وەزیرانیان كردووە و داواکارییەکانیان پێشکەش کردووە.

 فەرمانگەی کارگێڕی و دارایی ئەنجوومەنی وەزیران ڕاسپێردراوە، تا میکانیزمی سەردانی هاووڵاتییان و ناوتۆمارکردنیان ڕێک بخات و هیچ هاووڵاتییەک لە یاد نەکرێت و هەر کەسێک کێشە و سکاڵا و داواکارییەکی هەبێت، بێ گرفت بتوانێت سەردانی ئەنجوومەنی وەزیران بکات.

لەڕێگەی وەزارەتەكانیشەوە بەداواچوون دەكرێت

لای  خۆیەوە خەندان رەمزی مستەفا، بەرپرسی بەشی سكاڵا لە فەرمانگەی هەماهەنگی و بەدواداچوون لە ئەنجوومەنی وەزیرانی كوردستان، بە (باسنیوز)ی راگەیاند: "لە ئەنجوومەنی وەزیران وەكوو ئەندامێك دەستنیشان كراوم بۆ بەدواداچوونی سكاڵا، وەكوو فەرمانگەی هەماهەنگی و بەدواداچوون، رۆڵی ئێمە دروستكردنی هەماهەنگییە لە نێوان سەرۆكایەتیی ئەنجوومەنی وەزیران و وەزارەتەكان، ئەو داواكاری و سكاڵایانەی بۆ ئەنجوومەنی وەزیران دێن، لەنێو خۆیان چارەسەر دەكرێن، بەڵام هەندێك داواكاری و كێشە دەدرێنە وەزارەتەكان، ئێمە دەتوانین لەگەڵ وەزارەتەكان بەدواداچوون بكەین".

ئەوەشی خستە ڕوو: "لەڕێگەی وەزارەتەكانەوە بەدواداچوون بۆ ئەو كێشە و داواكارییانەی خەڵك و فەرمانبەران دەكەین و وەڵامیان بۆ وەردەگرینەوە".

جەختیشی كردەوە: "ئەو دوو ژمارەیەی بۆ پەیوەندی داندراون، یەكیان بۆ وەرگرتنی داواكارییەكان و دانانی كاتی چاوپێكەوتنە و ژمارەكەی دیکەیش بۆ بەدواداچوون و زانینی بەئەنجامگەیشتنی داواكاری و سكاڵاكانە".