فەرماندەیەکی پێشمەرگە چەند زانیارییەکی سەروبەندی خیانەتی ١٦ی ئۆکتۆبەر ئاشکرا دەکات
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

فەرماندەیەکی پێشمەرگە چەند زانیارییەکی سەروبەندی خیانەتی ١٦ی ئۆکتۆبەر ئاشکرا دەکات

"گروپی خیانەتی ١٦ی ئۆکتۆبەر کە زانیان هێزێکی پارتی لەوێن و شەڕ دەکەن بە پیلان هێزەکەیان گواستەوە"

فەرماندەیەکی پێشمەرگە کە لە سەروبەندی رووداوەکانی خیانەتی ١٦ی ئۆکتۆبەردا لە سەنگەرەکانی بەرگریدا بووە لە سنووری کەرکووک تیشک دەخاتە سەر ساتەکانی روودانی خیانەتەکە و باس لەوە دەکات کە گرووپی خیانەتكاری نێو یەكێتی کە زانیویانە هێزێکی پارتی دەبێتە هۆی ئەوەی بەرگری بکرێت و ڕووبەڕووبوونەوە لەگەڵ هێزە عێراقییەکان ڕووبدات بە پیلان هێزەکەیان گواستووەتەوە، دەشڵێ فەرماندە و پێشمەرگەکانی یەکێتی لەلایەن بەرپرسانیانەوە تەلەفۆنیان بۆ کرا کە دەبێت بە زووترین کات سەنگەرەکانیان چۆڵ بکەن.


پێیان گوترا دەبێت بکشێنەوە

لیوا حەمە رێگر، فەرماندەی فەرماندەیی کەرکووکی هێزی پێشمەرگەی کوردستان، بە (باسنیوز)ی راگەیاند: "لە سەروبەندی رووداوەکانی خیانەتی ١٦ی ئۆکتۆبەر، دەڤەری کەرکووک بەسەر چەند میحوەرێکدا دابەش ببوو، میحوەری چوار و پێنجی رۆژئاوای کەرکووک کە پارتی دیموکراتی کوردستان لێی بەرپرس بوو و بەسەرپەرشتی د.کەمال کەرکووکی بوو و منیش جێگر بووم،ئێمە چەند لیوایەکی پێشمەرگەمان لەلابوو کە هاوبەش بوون لەنێوان پارتی و یەکێتی و دوو لیوای پێشمەرگەی یەکێتیشمان لەلابوو، بە گشتی فەرماندە و پێشمەرگەکان بە ورە بوون بەڵام تەلەفۆنیان بۆ کرا کە دەبێت بکشێنەوە و سەنگەرەکان چۆڵ بکەن".

پیلان لە دژی هێزی پارتی

لە درێژەی باسکردنی رووداوەکانی خیانەتی ١٦ ئۆکتۆبەردا، لیوا حەمە رێگر، روونیکردەوە: "چونکە گروپی خیانەتکارانی ١٦ی ئۆکتۆبەر بڕیاریاندابوو خیانەت بکەن،کە زانیان یەک لیوا لە سنووری میحوەری چوار هەیە و نیوەیان پارتین و بەرگری دەکەن چەند رۆژێک پێشتر هێزەکەیان گواستەوە بۆ رێگای لەیلان - تازە، بۆ ئەوەی کەس نەمێنێ بەرگری بکات و تەقە لە هێزە عێراقییەکان بکات، دواتر رێگاکان لە ریاز و رەشاد و تازە چۆڵکران و هێزەکان لە هەموو شوێنێکەوە هاتنە ناوەوە و ئەوانەی سنووری میحوەری ئێمەش هەموو فەرماندەکانیان تەلەفۆنیان بۆ کرا کە دەبێت سەنگەرەکان بە زووترین کات چۆڵ بکەن".

ئەو فەرماندەیەی پێشمەرگە دەڵێ: "ئەوکات هەواڵمان پێگەیشت کە لە دواوە مەترسیمان لەسەر هەیە و لیوای ٩ی دژەتانک دێن و بەرەو هەولێر دەچن و پشتمان لێدەگیرێت بۆیە ئێمە بۆ شوێنێک گەڕاین کە بتوانین بەرگری لێبکەین و هێزەکانمان کۆکردەوە و لە پردێ سەنگەرەکانمان توندوتۆڵ کرد و ئەو پێشمەرگە و فەرماندانەی کە لەو سەنگەرانەدا مانەوە خاوەنی بیروباوەڕ و ورەیەکی پۆڵایین بوون و کە دواتر داستانی پردێی لێ بەرهەم هات كە سەرۆك بارزانی لە نزیكەوە سەرپەرشتیی داستانەكەی كرد و بەر لە هێرشەکە گیرا و بووە ئومێدیش بۆ شوێن و میحوەرەکانی دیکەش".


هێزی پێشمەرگە بڕیاری بەرگریکردنی دابوو و لەو پەڕی ئامادەیی بوو

دوای خیانەتی ١٦ی ئۆکتۆبەر ژمارەیەک لە بەرپرسانی باڵای نێو یەکێتی بە ئاشکرا رایانگەیاند کە خیانەت کراوە، ئەوسا كۆسرەت ڕەسووڵ، جێگری یەكەمی سكرتێری ئەوكاتی یەكێتی، لە بەیاننامەیەكدا ئەو خیانەتكارانەی بە ”كاڵفام“ ناوبرد و رایگەیاند ”ئۆباڵی كارەساتەكانی كەركووك و خورماتوو، لە ئەستۆی كاڵفامەكانی ناو یەكێتییە“.

لەمبارەیەوە ئەمڕۆ شەممە ١٦ی١٠ی٢٠٢١، د. هێمن میرانی، مامۆستای زانكۆ و راگری پێشووی كۆلێژی یاسا و پەیوەندییە نێودەوڵەتییەكان لە زانكۆی سۆران، وێنەیەكی خۆی لەگەڵ كۆسرەت ڕەسووڵ عەلی و د. ماریانا خاروداكی بڵاو كردووەتەوە و ئاماژەی بەوە داوە كە ئەو دیدارەیان لە 12ی نیسانی 2018 بە ئامادەبوونی شاڵاو كۆسرەت ڕەسووڵ ئەنجام داوە و نووسویەتی كە كۆسرەت ڕەسووڵ لە سەردەمی ڕووداوەكانی 16ی ئۆكتۆبەردا بەرپرسی سیاسی و عەسكەریی هێزەكانی پێشمەرگە بووە و ”كۆسرەت ڕەسووڵ لە دیدارەكەدا گوتی، ئەگەر خیانەتکاران لە 16ی ئۆکتۆبەر بەبێ گەڕانەوە بۆ سەرکردایەتی، کەرکووکیان تەسلیم نەکردبوایە، هەرگیز هێزی عێراقی و حەشدی شەعبی بە شەڕ نەیاندەتوانی بێنە ناو کەرکووک. هێزی پێشمەرگە بڕیاری بەرگریکردنی دابوو و لەو پەڕی ئامادەیی بوو“.


رۆژی ١٦ی ئۆكتۆبەری ٢٠١٧، هێزە عێراقییەكان بە ڕێككەوتن لەگەڵ گرووپی خیانەتكاری نێو یەكێتی، پەلاماری كەركووك و خورماتوویان دا و سەدان هاووڵاتی كوردیان شەهید و بریندار كرد و نزیكەی ٢٠٠ هەزار كەسیش لەو ناوچانە ئاوارە بوون.

ئەوكات ئاراس جەنگی، برای لاهوور جەنگی، سەردەستەی تاقمی خیانەتكارانی یەكێتی، دانی بە ڕێككەوتنیان لەگەڵ میلیشیا و هێزە عێراقییەكاندا نا. لاهوور جەنگیش چەندانجار ستایشی كشانەوەی هێزەكانی یەكێتی كردووە لە ڕۆژی خیانەتە مەزنەكەیاندا.

هەر ئەوسا، كۆسرەت ڕەسووڵ، جێگری یەكەمی سكرتێری ئەوكاتی یەكێتی، لە بەیاننامەیەكدا ئەو خیانەتكارانەی بە ”كاڵفام“ ناوبرد و رایگەیاند ”ئۆباڵی كارەساتەكانی كەركووك و خورماتوو، لە ئەستۆی كاڵفامەكانی ناو یەكێتییە“.

رۆژی ١٨ی ١٠ی ٢٠١٧، مەلا بەختیار، بەرپرسی دەستەی كارگێڕیی مەكتەبی سیاسیی یەكێتی لە بەیاننامەیەكدا رایگەیاند: ”هەلپەرست و هەرزە ئەقڵەكانی ناو یەكێتی و فەیسبووكبازەكانیش كە هەر خەریكی شێواندنی زهنیەتی خەڵكن، لەو رووداوانە بەرپرسیارن“.

نەجمەدین كەریم، پارێزگاری كەركووك و ئەندامی مەكتەبی سیاسیی ئەوكاتی یەكێتیش چەندان جار دووپاتی كردەوە كە تاقمی خیانەتكاری ناو یەكێتی ”خیانەت لە خوێنیاندایە و خۆفرۆشییان كردووە بە پیشە“.

لە دوای ١٦ی ئۆكتۆبەرەوە تا ئێستا، هەریەك لە حەیدەر عەبادی، سەرۆك وەزیرانی ئەوسای عێراق و نووری مالیكی و چەندان سەركردەی دیكەی عێراق، چەندان جار سوپاسی گرووپی خیانەتكاری نێو یەكێتییان كردووە كە بە ئاسانی كەركووك و بەشێكی زۆری ناوچە كوردستانییەكانیان رادەست كرد.