كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×

بەڕێوەبەری ناحیەی عەنكاوە: بڕیاری بەقەزابوونی ناحیەی عەنکاوە لەلایەن مەسرور بارزانییەوە گرنگترین بڕیاری 65 ساڵی ڕابردووە

''بەقەزابوونی عەنكاوە لە مێژوودا بە پیتی زێڕین دەنووسرێت و بۆ ئێمەی مەسیحی ڕۆژێكە بەردەوام یادی دەكەینەوە''

ڕامی نووری عۆدیش، بەڕێوەبەری ناحیەی عەنكاوە

ڕامی نووری عۆدیش، بەڕێوەبەری ناحیەی عەنكاوە لە گفتوگۆیەكی تایبەتی (باسنیوز)دا باسی بڕیارەكەی سەرۆكی حكوومەتی هەرێمی كورستان دەكات بۆ بەقەزابوونی عەنكاوە و تەواوكردنی ڕێكارەكانی ئەو بڕیارە و دەڵێت: بەقەزابوونی عەنكاوە لە مێژوودا بە پیتی زێڕین دەنووسرێت و بۆ ئێمەی مەسیحی ڕۆژێكە بەردەوام یادی دەكەینەوە و بڕیاری بەقەزابوونی ناحیەی عەنکاوە لەلایەن مەسرور بارزانییەوە گرنگترین بڕیاری 65 ساڵی ڕابردووە.

ڕۆژی 4ی ئۆكتۆبەری 2021 مەسرور بارزانی، سەرۆكی حكوومەتی هەرێمی كوردستان بڕیاری بەقەزابوونی عەنكاوەی ڕاگەیاند و داوای لە وەزیری ناوخۆ و لایەنە پەیوەندیدارەكان كرد، جێبەجێكردنی ڕێكارەكانی بەقەزابوونی عەنكاوە دەست پێ بكەن. لەبارەی ئەو بڕیارەوە ڕامی نووری گوتی: "بڕیاری سەرۆكی حكوومەتی هەرێمی كوردستان بۆ بەقەزابوونی عەنكاوە بڕیارێكی ستراتیژییە و لە بەرژەوەندیی دانیشتوانی عەنكاوەیە، ئەم بڕیارە لە ڕووی مەعنەوییەوە پاڵپشتییەكی زۆر گەورەیە بۆ زیاتر پتەوكردن و بەهێزكردنی بنەماكانی پێكەوەژیان و یەكترقبووڵكردن و پاراستنی تایبەتمەندیی نەتەوەیی و ئایینی''.

بەڕێوەبەری ناحیەی عەنكاوە ئاماژەی بەوە دا کە بڕیارەكە بۆ بواری خزمەتگوزارییش گرنگیی خۆی دەبێت و گوتی: "بڕیارەكە وا دەكات بازنەی خزمەتگوزارییەكان بۆ عەنكاوە زیاتر بێت و عەنكاوە دەتوانێت ئاسانتر و زووتر دەتوانێت لە چوارچێوەی بودجەی پەرەپێدانی پارێزگاكاندا بودجە و پێداویستی و دەرخستە و پڕۆژەكانی خۆی پێشكەش بە پارێزگا و وەزارەتی شارەوانی بكات و ئاستی خزمەتگوزاریی فەرمانگەكان بەرزتر دەبێت و ڕۆتین كەم دەكرێتەوە و دەسەڵاتی لۆجیستی و كاركردن زیاتر دەبێت''.

بەڕێوەبەری ناحیەی عەنكاوە ئاشكراشی كرد کە پارێزگا و وەزارەتی ناوخۆ سەرقاڵی ئامادەكارین بۆ جێبەجێكردنی بڕیاری بەقەزابوونی عەنكاوە و گوتیشی: "نووسراوێک دەکەین بۆ ئەوەی بڕیاری بەقەزابوونی عەنکاوە بچێتە بواری جێبەجێکردنەوە، چاوەڕێی ئاراستەكردنی نووسراوێكین لە پارێزگای هەولێرەوە بۆ ئەنجوومەنی پارێزگا، تاوەكوو دەنگی لەسەر بدرێت، بۆ ئەوەی پۆلێنی یەكەی ئیدارییەكەی لە ناحیەوە بۆ قەزا بگۆڕدرێت و لەوێوە نووسراو بچێتە وەزارەتی ناوخۆ و دواتر بۆ سەرۆكایەتیی حكوومەتی هەرێمی كوردستان بۆ ئەوەی پەسەند بكرێت و بڕیارەكە دەربچێت، لەبەر ئەوەی پلەی قایمقامی عەنكاوە پلەیەکی تایبەتە، بۆیە دەبێت ئەو بەڕێزەی ئەو پلەیەی پێ دەدرێت، بچێتە بەردەم بەڕێز سەرۆكی هەرێمی كوردستان و سوێندی یاسایی بخوات".

شارۆچکەی عەنکاوە لە ساڵی 1956 بڕیاری بەناحیەبوونی دەرچووە و بەھۆی نیشتەجێبوونی کریستیانەکانەوە تایبەتمەندیی خۆی ھەیە و شوێنی پێکەوەژیانە.

بە گوتەی ڕامی نووری، "باشترین بڕیار، بڕیاری بەقەزابوونی ناحیەی عەنکاوەیە كە كاك مەسرور بارزانی بڕیارەكەی دەركردووە، خەڵكی عەنكاوە لەوپەڕی دڵخۆشی كامەرانیدان و هەموویان كۆكن لەسەر ئەوەی سوپاسی جەنابیان بكەن، بەقەزابوونی عەنكاوە لە مێژوودا بە پیتی زێڕین دەنووسرێت و بۆ ئێمەی مەسیحی ڕۆژێكە بەردەوام یادی دەكەینەوە، لە ماوەی 65 ساڵی ڕابردوودا بۆ یەكەمین جارە گرنگییەكی وا گەورە بە عەنكاوە و پێكهاتەیەكی ڕەسەن و گرنگی كوردستان دەدرێت".

بەڕێوەبەری ناحیەی عەنكاوە ئەوەیشی گوت: "لەگەڵ بوون بە قەزا، قورسایی هەندێك كاری ئیداریی لەسەر بەڕێوەبەرایەتییەكانی شاری هەولێر كەم دەبێتەوە، چونكە فلتەری مامەڵەی هاووڵاتییان كەم دەبێتەوە و كار و كردەوەكان خێرایی و ڕێكوپێكییەكی زیاتر بە خۆوە دەبینن و كارئاسانیی زیاتر بۆ هاووڵاتییان دەكرێت، بەو پێیەی ئەگەر پێشتر هەر هاووڵاتییەكی عەنكاوە بۆ بەڕێوەچوونی كارەكانی پێویست بوو سەردانی چەند فەرمانگەیەك بكات، ئێستا ڕەنگە تەنیا سەردانی دوو فەرمانگەی پێویست بێت''.

ڕامی نووری دەشڵێت: "عەنكاوە بووەتە پەناگەیەكی ئارام بۆ مەسیحییەكانی عێراق و سووریا و لوبنان و تەواوی ڕۆژهەڵاتی ناوەڕاست، بەقەزابوونی عەنكاوە پێگەی كوردستان بۆ پێكەوەژیانی ئایینی و ئاشتەوایی و یەكترقبووڵكردن لە تەواوی ڕۆژهەڵاتی ناوەڕاستدا بەهێز دەكات".

ئەو پێی وایە بڕیارەكەی حكوومەتی هەرێمی كوردستان، وێرای پاراستنی تایبەتمەندیی خزمەتكردنی زیاتری مەسیحییەكان، كاریگەریشی دەبێت بۆ ڕێگرتن لە كۆچكردنی زیاتری مەسیحییەكان و گوتیشی: "ژمارەیەكی زۆری مەسیحییەكان لە بەغدا و بەسرا و مووسڵ و دەشتی نەینەوا و بە كەركووكیشەوە ڕوویان لە عەنكاوە كردووە، ئێرە جێگرەوەی چوونیان بووە بۆ وڵاتێكی ئەوروپایی. لە عەنكاوە سەلامەتی و مسۆگەریی پاراستنی سەروماڵی ئاوارەكان و پەناهەندەكان هەبووە، بۆیە لە عەنكاوە هەموو پێكهاتە و ڕەنگەكان هەیە و دەبینیت مەسیحی و موسڵمان و كلدان و ئاشوور و سریان و كورد و عەرەب و توركمان و ئێزدی و شەبەك و سابیئە و كۆمەڵگە و ڕێكخراوەکانی كۆمەڵگە مەدەنی و كەنیسە و مزگەوت و پەرستگاكانیان هەیە، عەنكاوە كوردستانێكی بچووكە بۆ پێكەوەژیانی ئایینی و نەتەوەیی، دامەزراوە حكوومییەكان لە عەنكاوە چەندین ساڵە كارێكی گەورە و خزمەتگوزارییەكی باش پێشكەش دەكەن، بە توانایەكی دیاریكراوی زۆر بچووك و سنووری فەرمانگە حكوومییەكان لە عەنكاوە زۆر زیاترە لە سنووری تواناكانیان''.