بەهۆی خیانەتی 16ی ئۆكتۆبەرەوە 35 گوندی خانەقین چۆڵ كراون
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

بەهۆی خیانەتی 16ی ئۆكتۆبەرەوە 35 گوندی خانەقین چۆڵ كراون

ناحیەكانی گوڵاڵە، سەعدییە و قەرەتەپە 5٪ كوردیان تێدا ماوەتەوە

خیانەتی 16ی ئۆكتۆبەری 2017 زیانی بە هەموو گەلی كوردستان گەیاند، بەتایبەت كوردانی ناوچە كوردستانییە داگیركراوەكان، جێگری بەرپرسی لقی خانەقینی پارتی دیموكراتی كوردستان ڕایگەیاند بەهۆی خیانەتی 16ی ئۆكتۆبەرەوە 35 گوندی خانەقین چۆڵ كراون و ناحیەكانی گوڵاڵە، سەعدییە و قەرەتەپە 5٪ كوردیان تێدا ماوەتەوە.

لەمبارەوە ئەكبەر حەیدەر، جێگری بەرپرسی لقی 15ی خانەقینی پارتی، بە (باسنیوز)ی ڕاگەیاند: "دیارە خیانەتی 16ی ئۆكتۆبەری 2017 تاڵترین خیانەتە و ڕۆژێكی شووم بوو كە دەرەنجامی خۆفرۆشتنی باڵێكی ناو یەكێتیی بووە هۆی ئەوەی كە ناوچە كوردستانییەكان داگیر بكرێن، ئەوانەی كە ئازادیی گەلی كوردستان بە ڕەوا نابینن، ئێستا لە ناوچەكە دەسەڵاتدارن، ئەوەی كە كرا زامێكی قووڵە و ساڕێژكردنی ئەستەمە، چونكە تاكوو ئەو ناوچانەی كە داگیركراون ئازاد نەكرێن ئەو زامە ساڕێژ نابێت.

بەهۆی ئەو خیانەتەوە گوڵاڵە و قەرەتەپە و سەعدییە 5٪ كوردیان تێدا ماوە

ئەو بەرپرسەی، ئاماژەی بۆ ئەوەش كرد، دەرەنجامی ئەو خیانەتە گەورەیە بەتایبەت لە سنووری خانەقین 35 گوند بە تەواوەتی چۆڵ كراون، لە ناحییەكانی قەرەتەپە، گوڵاڵە و سەعدییە 5٪ كوردیان تێدا ماوەتەوە ئیتر ئەو خەڵكە هەموو ئاوارە بوون، هەروەها ناحیەی مەندەلیش رێژەیەكی كەم كوردی تێدا ماوەتەوە، ئەوانەی بەهۆی ئەو زوڵم و ستەمەی كە دەكرێت ئاوارە بوون و ناتوانن بگەڕێنەوە، ئەو ناوچانە بە خوێنی پێشمەرگە ئازاد كراون، بەڵام بەداخەوە بە خیانەت فرۆشران.

بە گەڕانەوەی پێشمەرگە دۆخی تەناهیی ناوچەكە ئارام دەبێت

هاوكات، ئەكبەر حەیدەر، ئەوەشی خستە ڕوو، هەر بەهۆی ئەو خیانەتە گەورەیەوە ئێستا دۆخی تەناهیی ناوچەكە ناجێگیرە، چونكە نەبوونی هێزی پێشمەرگە، هەروەها نەبوونی بارەگاكانی پارتی وای لە خەڵك كردووە كە بێ پێشمەرگە، خەڵك هەست بە ئەمان نەكات و خەڵك لە چاوەڕوانیی گەڕانەوەی پێشمەرگەیە، چونكە پێشمەرگە دڵسۆزانە خەڵك دەپارێزێت و ئازارەكانی ئەو خیانەتە لەبیر ناكرێت.

بۆشایی تەناهی دروست بووە و داعش گەشەی كردووە

لەو چوارچێوەیەدا سەربەست برزۆ، چالاكوانی كۆمەڵگەی مەدەنی لە خانەقین، بە (باسنیوز)ی ڕاگەیاند: "لە دوای 16ی ئۆكتۆبەری 2017 بارودۆخێكی ناجێگیر ڕووی لە خانەقین كردووە، بەهۆی ناجێگیریی باری تەناهی و نەمانی هێزی پێشمەرگە وای كردووە كە بۆشاییەكی زۆری تەناهی دروست بووە بە حوكمی ئەوەی ئەم هێزانەی عێراق و حەشدی شەعبی ناتوانن بە تەواوەتی ناوچەكە بپاریزن، ئەمەش بووەتە هۆی ئەوەی بۆشایی تەناهی دروست بێت و داعش زیاتر لە ناوچەكە گەشە بكات.

لە خانەقین 500 خێزان ئاوارە بوون

گوتیشی: "بەهۆی ڕووداوەكانی 16ی ئۆكتۆبەرەوە لە خانەقین 500 خێزان شارەكەیان بەجێ هێشتووە و ئاوارن بوون، چارەسەری كۆی گشتیی دۆخی ناوچە كوردستانییەكان بەتایبەت خانەقین بە گەڕانەوەی پێشمەرگە و ئاساییبوونەوەی بارودۆخەكەی دەبێت".