لە 16ی ئۆكتۆبەردا لە خورماتوو زیاتر لە سێ هەزار ماڵی کورد تاڵان کران
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

لە 16ی ئۆكتۆبەردا لە خورماتوو زیاتر لە سێ هەزار ماڵی کورد تاڵان کران

"هێشتا بە هەزاران کەسیان ئاوارەن"

بەهۆی خیانەتی 16ی ئۆكتۆبری 2017ەوە تاكوو ئێستا كە ماوەی چوار ساڵە هەزاران كوردی خورماتوو ئاوارەی شار و شارۆچەكەكانی هەرێمی كوردستانن و نەیانتوانیوە بگەڕێنەوە زێدی خۆیان، بەرپرسێك ڕایدەگەیەنێت، زیاتر لە سێ هەزار ماڵی هاووڵاتییانی كورد تاڵان کراون و سووتێنراون و تاكوو ئێستاش قەرەبوو نەكراونەتەوە.

لەم بارەوە بەختیار هیجران، بەرپرسی ناوچەی خورماتووی پارتی دیموکراتی کوردستان، بە (باسنیوز)ی ڕاگەیاند: "دوای چوار ساڵ، هێشتا 16ی ئۆكتۆبەری 2017 کە ڕۆژێكی شووم و قێزەونە و لە هزری خەڵكدا ناسڕێتەوە، چونکە خیانەتێكی گەورە لە خاك و خەڵك كرا، دیارە گەلی كوردستان لە ئەنجامی ئەو خیانەتە زیانی كرد و نیوەی خاكی باشووری كوردستان لەدەست درا، دوای بەڕێوەبردنی ریفراندۆمی خەڵكی باشووری كوردستان بۆ سەربەخۆیی، ئێمە بەتەمای چیای حەمرین و دروستكردنی دەوڵەتی سەربەخۆ بووین، بەڵام ئەوە بوو گرووپێك لەناو یەكێتی ئەو خیانەتەیان كرد بۆ ئەوەی ناوچە كوردستانییەكان لەلایەن حەشدی شەعبییەوە داگیر بكرێت".

لە خیانەتی 16ی ئۆكتۆبەردا خەنجەرێكی ژهراوی لە پێشمەرگە درا

ئەو بەرپرسە ئەوەشی خستە ڕوو، هێزی پێشمەرگە لە بەرخۆداندا بوو و لە سەنگەرەكاندا بەرگرییان دەكرد، بەڵام ئەوە بوو بە بڕیارێك هێزەكانی یەكێتی لە بەرەكان كشانەوە و ئەمەش خەنجەرێكی ژەهرای بوو لە پێشمەرگە درا، بۆیە حكوومەتی عێراقی بەوەشەوە نەوەستا دەیانویست دەبابە تابەردەم قەڵای هەولێر نەوەستێت، بەڵام پێشمەرگەكانی پارتی لە پردێ رێگرییان لەو كارە كرد و بۆ یەكەمین جار بوو دەبابەی ئابرامز بشكێنن ئەوەش بە گیانفیدایی پێشمەرگە كرا و شەهیدێكی زۆر لەو پیناوەدا درا تاكوو پارێزگاری لە قەوارەی سیاسیی هەرێمی كوردستان بكرێت".

زیاتر لە سێ هەزار ماڵی كورد تاڵان کران و سووتێندراون

ئەو بەرپرسەی پارتی ئاماژەی بەوەش كرد: "كورد تاكوو یەكگرتوو بێ باشتر بەرەو پێشەوە چووە، ئەگەریش پەتەوازە بێ زیانی كردووە، بۆیە لە خیانەتی 16ی ئۆكتۆبەردا زیانمەندی یەكەم خەڵكی خورماتوو بوون و لە شارەدا بە دەیان خانووی هاووڵاتییان تەقێنرانەوە، زیاتر لە سێ هەزار ماڵی هاووڵاتییانی كورد تاڵان کران و سووتێنراون تاكوو ئێستاش هەزاران كوردی خورماتوو لە شار و شارۆچكەكانی هەرێمی كوردستان ئاوارەن و دۆخی ژیانیان باش نییە و نەیانتوانیوە خانووەكانیان دروست بکەنەوە، بۆیە پێویستە بۆ قۆناخی داهاتوو كاری جدی بكرێت بۆ ئاساییكردنەوەی دۆخی ناوچە كوردستانییەكان تاكوو ژیان بۆ ناوچەكە بگەڕێتەوە".

لەو چوارچێوەیەدا، محەمەد مەحموود، چالاكوانێكی خەڵكی خورماتووە، بە (باسنیوز)ی ڕاگەیاند: "لە خیانەتی 16ی ئۆكتۆبەردا ئەوەی بەسەر خەڵكی خورماتوودا هیندرا، بەسەر هیچ شوێنێكدا نەهات، چونكە پێشمەرگەكانی یەكێتی بە فەرمانی فەرماندەكانی سەر بە خیانتەكارانی 16ی ئۆكتۆبەر خەڵكی شارەكەیان بەجێ هێشت بۆ میلیشیاكانی حەشدی شەعبی، ئەوە بوو خەڵك بە هەزار حاڵ قوتاریان بوو لەدەست میلیشیاكان و خەڵك لەو باوەڕەدا نەبوو كە بەو شێوەیە بەجێ بهێڵدرێن، بۆیە جیا لەوەی میلیشیاكانی حەشدی توركمانی ماڵ و چێشتخانە و كارگە و دوكانێكی زۆری هاووڵاتییانی كوردیان بەتاڵان برد و سووتاند و تەقاندەوە و ژمارەیەك خەڵكیان شەهید كرد كە سیمبۆلی ئەو شەهیدانە شەهید (هاورن ڕەشید پاڵەوان)ە كە دوای شەهیدكردنی بە دەبابە تەرمەكەیان بەناو خورماتوودا ڕادەكێشا".

قەرەبووی هاووڵاتییانی زیانلێكەوتوو

محەمەد مەحموود گوتیشی: "بۆ ئێستا زۆر گرنگە و پێویستە كوردانی خورماتوو ئەوەی لە ڕووداوەكانی 16ی ئۆكتۆبەر زیانیان پێگەیەندراوە، لەلایەن حكوومەتی عێراقەوە قەرەبوو بكرێنەوە، پێشتر توركمانێكی زۆر ئەوانەی كە لە كردەوە تیرۆریستییەكاندا زیانیان بەر کەوتبوو، بە پارەی زۆر قەرەبوو دەكرانەوە، كەچی حكوومەتی عێراق چوار ساڵە هیچ هاووڵاتییەكی كوردی خورماتووی لە پای ئەو زیانە گەورە مادییەی كە كردوویانە، قەرەبوو نەكردووەتەوە".

خورماتوو دوایین شاری كوردستانی باشوورە و دەكەوێتە سەر ڕێگای نێوان كەركووك-بەغدا و دانیشتوانەکەی لە كورد و توركمانی شیعە و سوننە و عەرەب پێكدێت و ژمارەی دانیشتوانکەی نزیكەی 250 هەزار كەسە و لە ساڵی 1976 بە مەرسوومێكی كۆماری و لە چوارچێوەی سیاسەتی تەعریبدا لە پارێزگای كەركووك دابڕێنراوە و خراوتە سەر پارێزگای سەڵاحەدین و لە 25/9/2017 و لە ریفراندۆمی سەربەخۆییدا زۆرینەی خورماتووییەكان بە (بەڵێ) دەنگیان بۆ سەربەخۆیی كوردستان دا، بەڵام لە 16ی ئۆكتۆبەری ساڵی 2017 وەك خورماتووییەكان ئاماژەی پێ دەكەن كە یەكێتی گەورەترین خیانەتی لێیان كردووە كە بەبێ شەڕ شارەكەیان ڕادەستی حەشدی شەعبی كردووە و لەو كاتەوە دۆخی ژیان لە شارەكە تێك چووە.