یازدەیەمین خولی فێستیڤاڵی فیلمی کوردیی بەرلین لە ئەڵمانیا بەڕێوە دەچێت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

یازدەیەمین خولی فێستیڤاڵی فیلمی کوردیی بەرلین لە ئەڵمانیا بەڕێوە دەچێت

یازدەیەمین خولی فێستیڤاڵی فیلمی کوردیی بەرلین، بە نمایشی بەرهەمی سینەماکارانی کورد و وڵاتانی بیانی لە چەندین بەشی جۆراوجۆر کە لە 14ی مانگەوە لە ئەڵمانیا دەستی پێکردووە بۆ ماوەی شەش ڕۆژ بەردەوام دەبێت.

یازدەیەمین خولی فێستیڤاڵی فیلمی کوردی "بەڕلین" Berlin لەلایەن کۆمپانیای سینەمایی میتۆس فیلم، (mîtosfilm)ی ئەڵمانی بە بەرپرسیارێتیی سینەماکاری کورد مەمەد ئەکتاش، (Mehmet Aktas) لە دەرهێنانی هونەریی کانی مەعرووف، Kani Marouf سینەمکاری کورد و بە نمایشی بەرهەمی سینەماکارانی کورد و وڵاتانی بیانی لە بەشە جۆراوجۆرەکانی وەک: چیرۆکی، بەڵگەفیلم، هەروەها بەشی پێشبڕکێی کورتە فیلم، بە شێوەی ئامادەبوون و ڕچاوگرتنی هەموو ڕێکارە تەندروستییەکان، هەروەها بە شێوەی ئۆنلاین بۆ هۆگرانی هونەریی سینەما لە سەرتاسەری دنیا لە ڕۆژانی 14 تا 20ی ئۆکتۆبەری 2021 لە سینەماکانی "بابیلۆن" BABYLON، "مۆڤیمێنتۆ" Moviemento و "ئێف.ئێس.کێی" FSK لە شاری بەرلین لە ئەڵمانیا بەڕێوە دەچێت.

ئەم ڕووداوە سینەماییە لە ساڵی 2002وە دامەزراوە و وەک گەورەترین فێستیڤاڵی فیلمی کوردی لە  سەرتاسەری ئەورووپا دێتە ئەژمار.

ڕێوڕەسمی کردنەوەی یازدەیەمین خولی فێستیڤاڵی فیلمی کوردیی "بەرلین" لe کاتژمێر 7ی ئێواڕەی ڕۆژی پێنجشەمە 14ی ئۆکتۆبەری 2021 دەستی پێکردووە و پاشان ئەم ڕووداوە سینەماییە لە کاتژمێر 7:30 شەو بە نمایشی فیلمی سینەمایی "ئەزموون" The Exam لە دەرهێنانی "شەوکەت ئەمین کورکی" لە سینەما "بابیلۆن"ی شاری بەرلین بە شێوەی فەرمی دەستی پێکرد و پاشان کۆڕی وەڵام و پرسیار لەبارەی ئەم فیلمە بە ئامادەبوونی دەرهێنەر، هەروەها ئاڤان جەماڵ و حوسێن حەسەن، ئەکتەرانی ئەم بەرهەمە کوردییە بەڕێوە چوو.

لە ڕۆژی هەینی 15ی ئۆکتۆبەری 2021 و لە کاتژمێر 2:45ی دوانیوەڕۆ بەڵگەفیلمی بڵندی "ئابۆر"  Abur لە دەرهێنانی هاوبەشی "گوڵ ئێرتۆنان کارا ئەسڵان" Gül Ertunan Karaaslan  و "سێدات کیران" Sedat Kıran لە وڵاتی بەریتانیا، لە کاتژمێر 5ی ئێوارە نمایشی بەرهەمەکانی بەشی پێشبڕکێی "کورتە فیلم 1" لە سینەما "مۆڤیمێنتۆ"، هەروەها لە کاتژمێر 7:30ی شەو فیلمی سینەمایی "لایەنێکی دیکە لە ڕووبار" The other side of the river لە دەرهێنانی "ئانتۆنیۆ کیلیان" Antonia Kilian لە سینەما "بابیلۆن" لە شاری بەڕلین نمایش دەکرێن.

لە ڕۆژی شەمە 16ی ئۆکتۆبەری 2021 و لە کاتژمێر 2:45ی دوانیوەڕۆ فیلمی سینەمایی "کیسەڵەکانیش دەتوانن بفڕن" Turtles Can Fly لە دەرهێنانی

سینەماکاری ناوداری کورد "بەهمەن قوبادی" لە سینەما "مۆڤیمێنتۆ"، نمایش دەکرێت و ئەم ڕووداوە سینەماییە تا کاتژمێر 8ی شەوی 20/10/2021 بە نمایشی فیلمی سینەمایی "ئەزموون" The Exam لە دەرهێنانی "شەوکەت ئەمین کورکی" لە سینەما "مۆڤیمێنتۆ" لە شاری بەرلین لە ئەڵمانیا کۆتایی پێدێت.