خیانەتی ١٦ی ئۆكتۆبەر.. خەنجەری ژەهراوی و هەوڵی بێئومێدكردنی نەتەوەیەك
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

خیانەتی ١٦ی ئۆكتۆبەر.. خەنجەری ژەهراوی و هەوڵی بێئومێدكردنی نەتەوەیەك

 

لە ٢٥ی ٩ی ٢٠١٧ پرۆسەی ریفراندۆمی سەربەخۆیی هەرێمی كوردستان و ناوچە كوردستانییەكانی دەرەوەی ئیدارەی هەرێم بەڕێوە چوو، هەست و جۆش و خرۆشی سەربەخۆخوازان و كوردستانییان گەیشتە لوتكە.

حكوومەتی عێراق بەردەوام هەڕەشەی بەكارهێنانی هێزی لە دژی كوردستان دەكرد، بۆ ئەمەش لاوازیی گرووپێكی خیانەتكاری نێو یەكێتیی نیشتمانیی كوردستانی بە سەرۆكایەتیی لاهوور جەنگی و ئاراسی برای و هاوكووفەكانیان قۆستەوە بۆ درزخستنە نێو هێز و سەنگەرەكانی پێشمەرگە.

دوو ڕۆژ پێش خیانەتی ١٦ی ئۆكتۆبەری ٢٠١٧، لە بەشێك لە سەنگەرەكانی سنووری كەركووك ئاماژەكانی خیانەتەكە دەركەوتن و كشانەوەی پێشمەرگە بە فەرمانی ژێربەژێری سەرانی گرووپی خیانەت و بە ڕێككەوتنی نهێنی لەگەڵ سەرانی عێراق و حەشدی شەعبی، بینرا.

لە بەرەبەیانی ١٦ی ئۆكتۆبەری ٢٠١٧، هێرشی سوپای عێراق و میلیشیا چەكدارەكان بە پاڵپشتیی تۆپخانەی وڵاتێكی دراوسێ دەستی پێكرد و پێشمەرگە وەڵامێكی بەهێزی دانەوە. بەڵام خیانەتی گرووپێكی نێو یەكێتی و كشانەوەی بەردەوام، درزی خستە نێو هێڵەكانی بەرگری.

رۆژی ١٦ی ئۆكتۆبەری ٢٠١٧، هێزە عێراقییەكان بە ڕێككەوتن لەگەڵ گرووپی خیانەتكاری نێو یەكێتی، پەلاماری كەركووك و خورماتوویان دا و سەدان هاووڵاتی كوردیان شەهید و بریندار كرد و نزیكەی ٢٠٠ هەزار كەسیش لەو ناوچانە ئاوارە بوون.

لاهوور جەنگی، سەردەستەی تاقمی خیانەتكارانی ناو یەكێتی بۆ دەستكەوت و بەرژەوەندیی تایبەت و كەسی، بووە هۆی ئەو ماڵوێرانییەی كورد و لەدەستدانی ٥١٪ی خاكی باشووری كوردستان.

هێزە عێراقییەكان ویستیان دەست بە هەولێر و دهۆك بگات و ئەزموون و قەوارەی هەرێمی كوردستان لەناو ببەن، بەڵام ئیرادەی پۆڵایین و هێزی لە بن نەهاتووی پێشمەرگە لە میحوەرەكانی پردێ، سحێلا، مەحموودیە و تلسقۆف شەڕی بێوێنەی نابەرامبەریان كرد و دەرسێكیان بە داگیركەر دا كە جارێكیتر ببڕای ببڕ بیر لە حەماقەتی وەها نەكەنەوە.

هاوشان لەگەڵ هێرشی داگیركەر، بەشێك لە جاش میدیای كوردی، لە پشت و لە شان هێزی دوژمنەوە پڕچەكی و تۆكمەیی بەرەی داگیركەرانیان دەگوازتەوە. خەڵكی كوردستانیان بێئومێد دەكرد و شاگەشكە ببوون بە هێرشی داگیركەران بۆ سەر هەولێری پایتەخت.

ئاراس جەنگی، برای لاهوور جەنگی، سەردەستەی تاقمی خیانەتكارانی یەكێتی، بە گاڵتەكردنەوە وشەی ”حەیاتم“ی بۆ ئاوارە كەركووكییەكان بەكار دەهێنا و دەیگوت ”حەیاتم بگەڕێنەوە دۆڵمەمان بۆ بكەن و با دۆمینە بكەین“، لە كاتێكدا دەیان ڕۆڵەی كەركووك بە دەستی میلیشیاكان شەهید كرابوون و هێشتا شەقامەكانی ئەو شارە سوور دەچوەوە.

كۆسرەت ڕەسووڵ، جێگری یەكەمی سكرتێری ئەوكاتی یەكێتی، لە بەیاننامەیەكدا ئەو خیانەتكارانەی بە ”كاڵفام“ ناوبرد و رایگەیاند ”ئۆباڵی كارەساتەكانی كەركووك و خورماتوو، لە ئەستۆی كاڵفامەكانی ناو یەكێتییە“.

رۆژی ١٨ی ١٠ی ٢٠١٧، مەلا بەختیار، بەرپرسی دەستەی كارگێڕیی مەكتەبی سیاسیی یەكێتی لە بەیاننامەیەكدا رایگەیاند: ”هەلپەرست و هەرزە ئەقڵەكانی ناو یەكێتی و فەیسبووكبازەكانیش كە هەر خەریكی شێواندنی زهنیەتی خەڵكن، لەو رووداوانە بەرپرسیارن“.

نەجمەدین كەریم، پارێزگاری كەركووك و ئەندامی مەكتەبی سیاسیی ئەوكاتی یەكێتیش چەندانجار دووپاتی كردەوە كە تاقمی خیانەتكاری ناو یەكێتی ”خیانەت لە خوێنیاندایە و خۆفرۆشییان كردووە بە پیشە“.

هەریەك لە حەیدەر عەبادی، سەرۆك وەزیرانی ئەوسای عێراق و نووری مالیكی و چەندان سەركردەی دیكەی عێراق سوپاسی گرووپی خیانەتكاری نێو یەكێتییان كرد كە بە ئاسانی كەركووك و بەشێكی زۆری ناوچە كوردستانییەكانیان رادەست كرد.

دوای داگیركردنی كەركووك، وێنەی چەند سەركردەیەكی سیاسی و مەزهەبی لە نێو دامودەزگا و شەقامەكانی شارەكە هەڵواسران و سووكایەتیی زۆر بە ئاڵای كوردستان و پێشمەرگە و وێنەی شەهیدان و پیرۆزییەكانی كوردستانیان كرا.

لە دوای خیانەتی ١٦ی ئۆكتۆبەرەوە سەرانی خیانەت بەردەوام نەوتی كەركووك دەدزن و گەورەترین پرۆسەی تەعریب لە ناوچە كوردستانییە داگیركراوەكان دەستی پێكردووە. چەندان بەرپرسی یەكێتیش دانیان بەم راستییەدا ناوە.