كۆمسیونا دهۆكێ: ئه‌ڤ هه‌لبژارتنا ب سه‌ركه‌فتى و ئازادیانه‌ ده‌رباز بوو
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

كۆمسیونا دهۆكێ: ئه‌ڤ هه‌لبژارتنا ب سه‌ركه‌فتى و ئازادیانه‌ ده‌رباز بوو

 

پشتى دوماهى هاتنا هه‌لبژارتنێن گشتى، ئۆفیسا دهۆك یا هه‌لبژارتنێن نوینه‌رێن عیراقێ د كۆنگره‌یه‌كێ رۆژنامه‌ڤانى دا، باس ل ره‌وشا ڤان هه‌لبژارتنان كر.

خالد عه‌باس، به‌رپرسێ ئۆفیسا دهۆك یا هه‌لبژارتنێن عیراقێ به‌رى چه‌ند خۆله‌كان د كۆنگره‌یه‌كێ رۆژنامه‌ڤانى دا گوت: "دلخۆشى ڤه‌،هه‌لبژارتنێن ئه‌ڤساله‌ ب دیموكراسى و ده‌ستپاكى و ئازادیانه‌ برێڤه‌چوونه‌، د ڤێ سه‌ركه‌فتنێ دا، كارگێریا پارێزگه‌ها دهۆكێ رۆله‌كێ مه‌زن هه‌بوویه‌، مینا هێزێن ئێمناهیێ و فه‌رمانبه‌رێن مه‌ و مامۆستایێن په‌روه‌ردێ، و دیسان، هه‌مى ده‌نگده‌ر د ئه‌ڤان هه‌لبژارتنان دا زور یێ ئازاد بوو بۆ هه‌لبژارتنا كاندیدێ خوو".

به‌رپرسێ ئۆفیسا دهۆك یا هه‌لبژارتنان دیار ژى كر: "ل سه‌ر ئاستێ بازنێ ئێك یێ (دهۆك ئامیدى) 309 هزار و 846 ده‌نگده‌ران ماف هه‌بوویه‌ بۆ ده‌نگدانێ و 166 هزار و 390 كه‌سان ده‌نگێ خۆ دایه‌ كۆ ل سه‌ر ئاستێ ڤى بازنى 54% خه‌لكى ده‌نگێ خۆ دا یه‌ و ل سه‌ر ئاستێ بازنێ دوو یێ (زاخو و سێمێلێ) 247 هزار و 737 كه‌سان مافێ ده‌نگدانێ هه‌بوو،115 هزار و 369 كه‌سان ده‌نگێ خۆ دایه‌ كۆ رێژا 47% بوویه‌، د هه‌مان ده‌مدا ل بازنێ سێ یێ (ئاكرێ و به‌رده‌ره‌ش و شێخان) هژمارا وان كه‌سێن مافێ ده‌نگدانێ هه‌ى،220 هزار و 557 كه‌سان مافێ ده‌نگدانێ هه‌بوو،127 هزار و 128 كه‌سان ده‌نگ دایه‌ و زورترین رێژه‌ ل ڤى بازنى ب رێژا 58% هاتیه‌ تۆماركرن".

به‌رپرسێ ئۆفیسا دهۆك یا هه‌لبژارتنان ئاماژه‌ ب وێ چه‌ندێ ژى دایه‌: "سه‌رجه‌مێ كه‌سێن ل پارێزگه‌ها دهۆكێ مافێ ده‌نگدانێ هه‌ى 778 هزار و 140 كه‌سان ماف هه‌بوویه‌ و 408 هزار و 887 كه‌سان ده‌نگێ خۆ دایه‌ و رێژا ده‌نگدانێ ب گشتى 53% بوویه‌".

گۆتژى: "پێنج سكالا ل سه‌رانسه‌رى پارێزگه‌هێ هاتنه‌ تۆماركرن و دێ دیڤچون بۆ هێته‌ ئه‌نجامدان و سۆبه‌هى رۆژا دووشه‌مبى دێ شاشه‌كا ئه‌نجامان ل ئۆتێلا ژیان ل دهۆكێ هێته‌ دانان و هه‌مى ئه‌نجام ل سه‌ر وێ شاشێ هێنه‌ دیاركرن".