نەتەوە یەکگرتووەکان ئیدانەی رێگری لە کاندیدانی پارتی لە شنگال دەکات
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

نەتەوە یەکگرتووەکان ئیدانەی رێگری لە کاندیدانی پارتی لە شنگال دەکات

چاودێرێک: پەکەکە هێزێکی بەکرێگیراوە و بۆ تێکدانی هەرێمی کوردستان ڕاسپێردراوە

نوێنەری تایبەتی سکرتێری گشتیی نەتەوە یەکگرتووەکان له‌ عێراق، ئیدانەی رێگریکردن لە کاندیدانی پارتی لە شنگال دەکات. چاودێرێکی سیاسییش پێی وایە، پەکەکە حزبێکی دیکتاتۆرە و هیچ بڕوایەکی بە ئازادی نییە.

جێنین ھێنیس پلاسخارت، نوێنەری تایبەتی سکرتێری گشتیی نەتەوە یەکگرتووەکان له‌ عێراق، لە کۆنفرانسێکی رۆژنامەوانیدا لە بەغدای پایتەختی عێراقی فیدڕاڵ، ئیدانەی رێگریکردن لە کاندیدانی پارتی لە شنگال کرد کە لە چەند رۆژی رابردوودا، لەلایەن چەکدارانی پەکەکەوە رێگە نەدرا بانگەشەی هەڵبژاردنی خۆیان لە سەنتەری قەزای شنگال ئەنجام بدەن.

لەمبارەیەوە، پلاسخارت ئاماژەی بەوە دا، ئەوان ئاگاداری ئەو رووداوەی شنگالن، گوتی: ”هەموو حزبێک ئازادە لە بانگەشەی هەڵبژاردن، هەموو کاندیدێک ئازادە چۆن و لە کوێ بانگەشە دەکات، دەبێ بە ئازادانە هاتوچۆ بکرێت، ئیدانەی ئەو کارە دەکەین کە لە شنگال رووی دا".

پێشتر، لیژنەی باڵای هەڵبژاردنی پارتی دیموکراتی کوردستان، له‌ ڕاگه‌یه‌ندراوێكدا ئاشكرای كرد کە: "كاتژمێر 11ی پێشنیوەڕۆی ڕۆژی شەممە، 2ی تشرینی یەکەمی 2021، لە دەڤەری شنگال، لایەنێكی چەكدار بە زەبری چەك ‌و هەڕەشە ڕێگرییان لە كاندیدانی پارتی كردووە، كە بەنیاز بوون بۆ بانگەشەی هەڵبژاردنی ئەنجوومەنی نوێنەرانی عێراق، سەردانی دەڤەرەكە بكەن".

لای خۆشیانەوە، د.ڤیان دەخیل، کاندیدی ژمارە 24ی بازنەی 3 لە پارێزگای نەینەوا، بۆ (باسنیوز) ڕای گەیاند: ”بەپێی زانیارییەکانیان، کە لە زاری ئەو خەڵکەی هێنراونەتە ڕێگەیان بۆ ڕێگری لە بانگەشەی هەڵبژاردن لە شنگال، هەریەکەیان لەلایەن پەکەکەوە بەکرێ گیراون و بڕی 100 دۆلار بە هەر یەکێكیان دراوە. جگە لەوەش، لەدوای ئەوانەوە هێزێکی چەکداری زۆری پەکەکە، کە خەڵکی رەسەنی شنگال نین، کۆ کردبوونەوە و لەپشتەوەی ئەو خەڵکانە بوون، کە بۆ ئەو کارە راسپێردرابوون“.

هاوکات، د.سۆران سێوکانی، چاودێری سیاسی بۆ (باسنیوز) ڕایگەیاند: ”پەکەکە هێزێکی بەکرێگیراوی دکتاتۆری فەوزەوییە و بڕوای بە ئازادی نییە، بەڵكوو ئەو هێزە ڕاسپێردراوە بۆ تێکدان و ئاڵۆزکردنی دۆخی هەرێمی کوردستان، لە هەر شوێنێک دەستی بڕوات ئەو کاری خۆی بۆ ئەوە دەکات“.

وا بڕیارە، 10-10-2021، هەڵبژاردنی پێشوەختە بۆ 329 کورسی لە پەرلەمانی عێراق ئەنجام بدرێت.

هەڵبژاردنی ئەمجارە بەپێی یاسایی نوێی هەڵبژاردن لە 18 بازنەوە کراوەتە 83 بازنەی هەڵبژاردن، ئەو هاونیشتمانییانەی مافی دەنگدانیان هەیە، دەنگ بە کاندیدی لایەنەکان بۆ هەڵبژاردنیان بۆ پەرلەمانی عێراق دەدەن.