سەركردەیەكی پارتی: عەلی باپیر راستگۆ نیە و بازرگانی بە ئایینی خەڵكەوە دەكات
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

سەركردەیەكی پارتی: عەلی باپیر راستگۆ نیە و بازرگانی بە ئایینی خەڵكەوە دەكات

 

ئه‌ندامێکی سه‌رکردایه‌تیی پارتی دیموكراتی کوردستان، وه‌ڵامی قسه‌کانی ئه‌میری كۆمەڵی دادگه‌ریی كوردستان دەداتەوە و بە ”قسەی ئاست نزم“ وەسفیان دەكات. جەختیش لەوە دەكاتەوە كە دووڕووییەكی زۆر لە هەڵوێستەكانی ئەمیری كۆمەڵ هەیە، چونكە جاران چوونە پەرلەمانی بە ”شرك و كوفر!“ دەزانی.

بەپێی تۆمارێكی ڤیدیۆیی، عەلی باپیر، ئەمیری كۆمەڵی دادگەریی كوردستان ساڵانێك لەمەوبەر، بەشداریكردنی لە پەرلەمان و حكوومەت بە ”زۆر مەترسیدار“ وەسف كردووە و رایگەیاندووە كە ”زیاتر لە شرك و كوفرەوە نزیكە“. كەچی لەم رۆژانەدا و لە چوارچێوەی كێبڕكێی كاندیدەكانیان بۆ گەیشتن بە مووچەی چەوری بەغدا، نەك هەر لە ململانێدان، بگرە لەڕێی چەواشەكردنی خەڵك و بڵاوكردنەوەی درۆ و زانیاریی ناڕاستەوە، دەیانەوێت كورسییەك یان دوو كورسی لە پەرلەمانی عێراق بهێنن.

لەمبارەیەوە نه‌جات حه‌سه‌ن، ئه‌ندامی سه‌رکردایه‌تیی پارتی دیموكراتی کوردستان، بۆ (باسنیوز) گوتی: ”مەلا عەلی ریفراندۆمی بە سه‌قه‌ت ناو بردووە، لە كاتێكدا خۆی یه‌کێک بوو له‌وانه‌ی بانگه‌شه‌ی بۆ کرد و ده‌نگی پێی دا چونكە دەیزانی ئەوانەی دەنگ نادەن لە مێژوودا چۆن ناویان دەنووسرێ، ئەو له جیاتی ئه‌وه‌ی باسی خیانه‌تی 16ی ئۆکتۆبەر بکات، هاتووە هێرش دەكاتە سه‌ر ریفراندۆم، لە كاتێكدا خۆی لە كاتی خیانەتی ١٦ی ئۆكتۆبەردا قورئانی پیرۆزی وەك دیاری بە خیانەتكاران دەبەخشی“.

ئەو ئەندامەی سەركردایەتیی پارتی، پێشنیار بۆ مەلا عەلی باپیر ده‌کات، وەك دەڵێ: ”به‌ وتاره‌ سه‌قه‌ته‌کانیدا بچێتەوە و سەرنج لە رای خەڵكی كوردستان بدات لەسەر وتارەكانی، ئەوسا ده‌زانێت له‌ چ دۆخێکدایە“.

ئایین بۆ بەرژەوەندیی خۆیان بەكار دێنن

نەجات حەسەن، ئەوەشی بە ”عەیبە“ وەسف كرد كە كەسی یەكەمی حزبێك، هەست و سۆزی ئایینیی خەڵكی بۆ بەرژەوەندیی حزبەكەی بقۆزێتەوە و بە ئارەزووی خۆی فەتوای حەڵاڵ و حەرام بدات. گوتیشی: ”ئەوە بازرگانی كردنە بە ئایینەوە، بۆیە پێشنیار بۆ عه‌لی باپیر ده‌که‌م، وتاره‌ سه‌قه‌ته‌کانی راست بکاته‌وه‌، بۆ دوو سێ ده‌نگ بزانه‌ چی له‌ خۆی ده‌کات، له‌ نه‌وه‌ده‌کان چۆن باسی په‌رله‌مانی ده‌کرد و ئێستاش بۆ بەرژەوەندی و کورسی چۆن باسی ده‌کات، ئه‌و پیاوه‌ راستگۆ نییه‌ و وا ده‌زانێت مێژوو ده‌ڕوات و ئاوڕ ناداته‌وه‌، کاکه‌ ڤیدیۆت هه‌یه‌ له‌ نه‌وه‌ده‌کان که‌ چۆن باسی په‌رله‌مان ده‌که‌یت، ئیتر چی؟ نامانه‌وێت بێینه‌ ئاستی عه‌لی باپیر، به‌ڵام به‌ڕاستی ماهییه‌تی خۆی ده‌رخست، خەڵكیش قسەكانی بە هەند وەرناگرن“.

كۆمەڵ حزبێكی جیهادیی مەترسیدارە

لە لایەن خۆیەوە سەروەر پێنجوێنی، توێژەری بواری ئیسلامی سیاسی بە (باسنیوز)ی ڕاگەیاند: ”کۆمەڵی ئیسلامی کە ئێستا ناوەکەی گۆڕیوە بە کۆمەڵی دادگەری، حزبێکی جیھادیی توندڕەوە و سەركردەی توندڕەو و جیهادیی تێدایە، پێویستە بەردەوام لێپرسینەوەی لەگەڵدا بکرێت، بۆ ئەوەی بزانین ئایا فکرەکەی گۆڕاوە و بەکەڵکی ئەوە دێت بگەڕێتەوە نێو کۆمەڵگە یان نا؟ چونکە نابێت ڕێگە بدرێت کەسانی توندڕەو بە ئارەزووی خۆیان دابنیشن و پیلان بۆ فکری توندڕەوی دابنێن“.