كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×

شه‌ریف سلێمان، كاندێدى پارتى ل نەینەوا: پارتى ل به‌غدا شه‌رێ ده‌ستڤه‌ئێنانا مافێن ئێزدیان دكه‌ت

كاندێدى پارتى دیموكراتى كوردستان  هژمارا 24 ل بازنەیێ دوو  پارێزگه‌ها نەینەوا (ل ده‌ڤه‌را ئه‌لقوش، شێخان، باشیك و تلكیف)ى د چاڤپێكه‌ڤتنه‌كێ دا بۆ (باسنیوز) راگه‌هاند كو پارتى تاكه‌ لایه‌نێ سیاسییە شه‌رێ ده‌ستڤه‌ئێنانا مافێن ئێزدیان ل به‌غدا دكه‌ت، ده‌نگدانا ئێزدیان بۆ كاندێدین پارتى دێ بیته‌ هاندەر بو رێگریێ ل دووباره‌ روویدانا كاره‌ساتان.

شه‌ریف سلێمان عه‌لى ، كاندێدى پارتى بۆ (باسنیوز) راگه‌هاندكو: ئارمانجا وان ئه‌وه‌ خزمه‌تا خه‌لكێ خۆ بكه‌ن و داخوازا مافێن خه‌لكێ خۆ ژ به‌غدا بكه‌ن، ”هه‌روه‌سا ژى ئه‌م وه‌كو ئێزدى خزمه‌تا خو بكه‌ین پشتى كاره‌ساتا شنگال ئێزدى بوونه‌ قوربانى هه‌تا نوكه‌ ژى به‌غدا ب هاوار و گازیا ئێزدیان نه‌هاتیه‌ وتایبه‌تمه‌ندیا ئێزدیان د عێراقى دا نه‌هاتیه‌ پاراستن هه‌تا ئه‌ڤرۆكه‌ ژى ئێزدى باجێ ده‌ن".

شه‌ریف سلێمان عه‌لى، ئاماژە ب وێ چەندێ ژی كر کو ده‌نگدانا ئێزدیان بۆ كاندێدین پارتى دێ بیته‌ ئه‌گه‌رێ مسوگه‌ركرنا ده‌ستڤه‌ئێنانا مافێن ئێزدیان ناڤ په‌رله‌مانێ عێراقىدا و رێگریێ دێ دووباره‌ روویدانا كاره‌ساتا و تاوانان، ”ب ریێا قانوونێن ژ په‌رله‌مانێ عێراقى ده‌ركه‌ڤن دێ هه‌موو كارا كه‌ن ئه‌و قانون بكه‌ڤنه‌ دبه‌رژوه‌ندیا ئێزدیاندا نه‌خاسمه‌ ژى قانوونا رزگاربووێن ئێزدی و قه‌ره‌بووكرنا زیانڤێكه‌ڤتێن شنگال هه‌تا نوكه‌ خه‌لكێ ئێزدى زه‌رمه‌ندێن ئێكێ نه‌ دناڤ عێراقى دا نوكه‌ ده‌م هات ئێزدى به‌ره‌ڤانیى ب ریێا ده‌نگێ خۆ ژ مافێن خۆ بكه‌ن هه‌روه‌سا ئێزدى دێ ده‌نگێن خۆ به‌ره‌ڤانیى ژ ئاین و هه‌بوونا خۆ كه‌ن ناڤ عێراقى دا دێ ده‌نگ ب كاندێدین پارتى ده‌ن داكو مافێن ئێزدیان بهێنه‌ پاراستن".

ئەو کاندیدێ پارتی گۆت ژى: دەردورا 600 هزار كه‌سێن ئێزدى دناڤ کوردستان و عێراقێدا دژین، ”پێدڤیه‌ ئێزدیان ژى هه‌موو ماف وئه‌رك ناڤ عێراقێدا، هه‌بن نه‌هێنه‌ پشتگوه هاڤیتن ئه‌ڤه‌ چه‌ندێن سالن زۆر ل ئێزدیان دهێته‌ كرن له‌وڕا هه‌لبژارتنا كاندێدین پارتى بۆ وى چه‌ندیه‌ بچنه‌ به‌غدا پشته‌ڤانیا ئێزدیان بكه‌ن وریگریێ وان قانوونان بهێته‌ كرن یێن کو ب رێیا وان دژاتیا ئێزدیان كه‌ن“.

شەریف سلێمان دا زانین ژی، ”پتریا كوردێن ئێزدى دگه‌ل پارتى دیموكراتى كوردستانن چونكو ئێزدى باش د زانن بتنێ پارتى پشته‌ڤان و هه‌ڤكاریێن ئێزدیان بووه‌".

کاندید ئه‌وژى خۆیا كر كو: ”چاره‌نڤیسى ده‌ڤه‌رێن ئێزدیان د مادێ 140ێ ده‌ستوورێ دایه‌، لێ مخابن حكومه‌تا عێراقى پێنگاڤ بۆ بجه ئینانا ڤێ مادێ ده‌ستوورى نه‌هاڤێتییە و ئه‌ڤه‌ بوویه‌ ئه‌گه‌ر ئێزدى بمینن هه‌لاویستى و تووشى ئاریشه‌یان بن، پێدڤیه‌ مادێ 140ێ ده‌ستورى بهێته‌ ئێكلاییكرن.

ده‌ربارێ كاركرنێ ل سه‌ر جینوسایدا ئێزدیان دناڤ په‌رله‌مانێ عێراقێدا ، شه‌ریف سلێمان، گۆت:" به‌رنامێ پارتى گه‌له‌ك پشته‌ڤانیى ل ئێزدیان و ناسکرنا کۆمکوژیا ئێزدیان ب جینوساید دكه‌ت، ئه‌م دێ ل په‌رله‌مانێ ب رژدى ل سه‌ر جینوسایدا ئێزدیان كار كه‌ین، پێدڤیه‌ تشته‌ك بۆ ئێزدیان بهێته‌ كرن، خه‌لكێ مه‌ یێ ئێزدى ژناڤ نه‌خۆشین ژیانێ رزگاربن و جه‌نابى سه‌رۆك بارزانى گه‌له‌ك ته‌كید ل ڤێ چه‌ندى كریه‌ خه‌لكێ مه‌ یێ ئێزدى ب خێر و خوشى ڤه‌گه‌رنه‌ سه‌ر جهێن خۆ".