كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×

له‌ ماوەی نۆ مانگدا یەك ملیۆن و 723 هەزار گەشتیار هاتوونەتە هەولێر‌

بەڕێوەبەری گشتیی گەشتوگوزاری هەولێر، ئاشکرای دەکات، بەهۆی بایەخدانی کابینەی نۆیەم بە کەرتی گەشتوگوزار، ئاماری هاتنی گەشتیاران لە بەرزبوونەوەدایە.

ئیسماعیل مینەخان، بەڕێوەبەری گشتیی گەشتوگوزاری هەولێر، بە (باسنیوز)ی ڕاگەیاند: "سەرەڕای ئەوەی کە بەهۆی ڕێكاره‌ ته‌ندروستییه‌كانی خۆپارێزی لە ڤایرۆسی کرۆناوە بۆ زیاتر لە جارێک بازگە و دەروازەکانی نێوان پارێزگاکان داخران، به‌ڵام كەرتی گەشتیاری بەهۆی گرنگیدانی تایبەتی کابینەی نۆیەمی حکوومەتی هەرێمی کوردستانەوە زۆر باشە و چەندین پرۆژەی گەشتیاریی هاوچەرخ لە هەولێر هەیە و سروشتی جوانی شارەکە و جوانیی هاوینەهەوارەکانی و سەقامگیری و ئارامی و پێشكه‌شكردنی خزمه‌تگوزاریی باش به‌ گه‌شتیاران و پێشوازی لێكردنیان به‌ شێوه‌یه‌كی باش له‌ ده‌روازه‌كان، لە هۆکارەکانی باشبوونی کەرتی گەشتیارین''.

ئیسماعیل مینەخان، ئاماژەی بە زیادبوونی ژمارەی گەشتیاران دا و گوتی: "ژمارەی گەشتیاران بەردەوام لە زیادبووندایە و تەنیا له‌ ماوەی نۆ مانگدا زیاتر لە یەك ملیۆن و 723 هەزار و 188 گه‌شتیار لە ڕێگای بازگه‌كانی نێوان هه‌رێمی كوردستان و فڕۆكه‌خانه‌ی نێوده‌وڵه‌تیی هه‌ولێرەوە سه‌ردانی شاری هەولێریان كردووه‌، ئەوەش کاریگەریی بۆ سەر زیادبوونی هەلی کار و بازاڕ هەبووە".

ئەوەشی خستە ڕوو کە ژمارەی گەشتیاران به‌راورد بە ساڵانی پێشووتر زۆر زیادی کردووە.

لە هەولێر نزیکەی 14 شاری یاری، 2 باخچەی ئاژه‌ڵان، 336 هوتێل، 130 گوندی گەشتیاری و مۆتێل، 427 چێشتخانه و 20 باخچەی گشتی هەیە، جگە لە چەندین ناوچەی گەشتوگوزاری لە قەراغ ڕووبارەکان و چەندین کەپر. لە ڕاستیدا پرۆژەکانی هەولێر هەمەچەشنن.