وەزیری ئاوەدانکردنەوە زانیاریی نوێ لەبارەی پرۆژەی رێگای دووسایدی نێوان هەولێر - کۆیە دەخاتە روو
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

وەزیری ئاوەدانکردنەوە زانیاریی نوێ لەبارەی پرۆژەی رێگای دووسایدی نێوان هەولێر - کۆیە دەخاتە روو

"ئەم كابینەیە بەبێ جیاوازی پڕۆژە لە سەرجەم ناوچەکان جێبەجێ دەكات"

وەزیری ئاوەدانکردنەوە و نیشتەجێکردن رایدەگەیەنێت كابینەی نۆیەكی حكوومەتی هەرێمی كوردستان بەبێ جیاوازی پڕۆژە لە سەرجەم ناوچەکان جێبەجێ دەكات.

ئەمڕۆ پێنجشەممە 23/9/2021، پەیجی فەرمی وەزارەتی ئاوەدانکردنەوە و نیشتەجێکردن لە تۆری کۆمەڵایەتیی (فەیسبووک) بڵاویکردووەتەوە دانا عەبدولکەریم، وەزیری ئاوەدانکردنەوە و نیشتەجێکردن، سەبارەت بە رێگای دووسایدی ھەولێر - کۆیە، رایگەیاند: "ئەو رێگایە یەکێکە لە پڕۆژە ستراتیژییەکانی وەزارەتی ئاوەدانکردنەوە و نیشتەجێکردن، بەداخەوە بەھۆی قەیرانی دارایی لە ساڵانی رابردوو نەتوانرا دەست بەکار بکرێت تیایدا، ھەوڵەکانمان بۆ دەستپێکردنەوەی کارکردن لەو پڕۆژەیە بەردەوامە ئومێدەوارین لە ئایندەیەکی نزیکدا ئەو پڕۆژەیە بەگەڕ بخەینەوە و بە دڵنیایی ئەو پڕۆژەیە دەچێتەوە بواری جێبەجێکردن، تونێلی ھەیبەت سووڵتانیش بەشێکە لەو پڕۆژەیە و یەکێکە لەو پێنج قۆناغەی پڕۆژەی رێگای دووسایدی ھەولێر - کۆیە".

وەزیری ئاوەدانکردنەوە ئەوەشی خستووەتە روو، ئەم كابینەیە بەبێ جیاوازی پڕۆژە لە سەرجەم ناوچەکان جێبەجێ دەكات، دانا عەبدولکەریم گوتیشی: "لە رابردوودا قەیرانی دارایی رووی لە ھەموو ھەرێمی کوردستان کرد و ھەموو ناوچەکانی گرتەوە، ئەوەی پەیوەندی بە وەزارەتی ئاوەدانکردنەوە ھەبێت لەو ساتەی ئێمە دەستبەکاربووین ھیچ جیاوازییەک لە ناوچەکانی ھەرێمی کوردستاندا نەکراوە، ھەوڵمانداوە کارو پڕۆژە و ئیشی ھاوتا بۆ خزمەتی ھاووڵاتییان لە ھەموو ناوچەکان بکرێت بەبێ جیاوازی، چونکە ھەرێمی کوردستان یەک پارچەیە".

ئاماژەشی بەوەداوە، ئومێدەوارن لەگەڵ باشبوونی دۆخی دارایی رێگا دووسایدەکان تەواو بکەین و گوتیشی: "ھەر لەچوارچێوەی رێگای دووسایدی نێوان شارەکان، رێگای دووسایدی دوکان - چوارقوڕنە کە سێ قۆناغە، قۆناغی یەکەمی زیاتر لە ٩٣٪‏ی تەواو کراوە لەئایندەیەکی نزیکدا دەخرێتە خزمەتی ھاووڵاتییان، قۆناغی دووەمیشی کاری تێدا دەکرێت و ٤٥٪‏ی تەواو کراوە، بۆ قۆناغی سێیەمیش ھەر ئەمڕۆ لەگەڵ نووسینگەی سەرۆکی حکوومەت قسەم کردووە لە ئایندەیەکی نزیکدا دەچێتە بواری جێبەجێکردنەوە".