زەوییەكانی قەرەبووی گوندی كۆری تاپۆ دەكرێن و ڕێ ده‌درێ خانووی له‌سه‌ر دروست بكه‌ن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

زەوییەكانی قەرەبووی گوندی كۆری تاپۆ دەكرێن و ڕێ ده‌درێ خانووی له‌سه‌ر دروست بكه‌ن

سه‌رۆكی شاره‌وانیی هه‌ولێر ئاشكرای کرد، 60%ی زەوییەكانی قەرەبۆی گوندی كۆری تاپۆیان تەواو بووە. دەشڵێت:" لە هەفتەی داهاتوو تاپۆكانیان پێ دەدەینەوە و موژدەی ئەوەشیان پێ دەدەین كە رێگە پێدانی دروستكردنی خانوویان پێ دەدەین.

عه‌بدولواحید ئه‌حمه‌د، سه‌رۆكی شاره‌وانیی هه‌ولێر، بە (باسنیوز)ی راگەیاند: "بۆ قەرەبووی گوندی كۆری، زیاتر لە چوار هەزار و 200 زەوی دابەش كراوە، كە زەوییەكانیش كارتن، پێشتر نەخشەیەك بۆ زەوییەكان هەبوو، كەموكوڕیی زۆری هەبوو، بە سەرپەرشتی وەزیری شارەوانی، ئێمە لە شارەوانی لیژنەیەكمان پێك هێنا، ئەو لیژنەیە كێشەی زەوییەكانی چارەسەر كرد، دوای كارەكانی ئه‌و لیژنەیە، هاووڵاتییانی قەرەبووی گوندی كۆریمان بانگهێشت كرد و لە نزیكەوە ئاشنامان كردن بە گۆڕانكارییەكان، ئەوانیش بە خۆشحاڵییەوە سوپاسی ئەو هەوڵەیان كرد"

سه‌رۆكی شاره‌وانیی هه‌ولێر گوتیشی: "پاش ئەو رێكارە، گشت بەراییەكانی ئەو زەوییانەمان رەوانەی تاپۆی عه‌ینكاوە كرد، ئێستا چاوەڕیین تۆماری تاپۆی ئەو زەوییانە وەربگرینەوە، لە تاپۆی عه‌ینكاوە بەڵێنمان وەرگرتووە 60%ی تاپۆی ئە زەوییانە وەربگرینەوە، كە دووهەزار و 500 كارتە و كراونەتە تاپۆ، بڕیارە ئێمە لە هەفتەی داهاتوو بانگەوازێك بكەین كە ئەو كەسانە سەردانمان بكەن بۆ وەرگرتنەوەی تاپۆكانیان، بۆ 40%ی كارتەكانی تریش،  قەرەبووی جووتیارانی تێدایە، ئێمە كاری خۆمان بۆ كشتوكاڵ ناردووە، ئەوانیش دواتر بۆ تاپۆی دەنێرن ئەوانیش لە ئاییندەیەكی نزیك تاپۆ دەكرێن".

لە ساڵی  2013 لە هەولێر دەست كرا، بە دروستكردنی پڕۆژەی  ناسراو بە گوندی كۆڕی، ناوی پێنج هەزاركەس بە تیروپشك راگەیاندرا، كە كرێچی بوون، پێشەكی حەوت هەزار دۆلاریان دابوو، بەڵام بەهۆی قەیرانی دارایی پڕۆژەکە دواکەوت، تەنیا هەزار خانووی تەواو بوو، حكوومەتیش نەیتوانی  165 ملیۆن دۆلار بداتە وەبەرهێنەرکە بۆ تەواوکردنی، بۆیە حەوت هەزار دۆلارەكەیان بۆ  گەڕێندرایەوە، چوار هەزار و 200 كەسیش لە لایەن   حكووومەت پارچەیەك زەویان وەكوو قەرەبوو پێدرا.

سەرۆكی شارەوانیی هەولێر ئەوەشی خستە ڕوو: "ئەو دووهەزار و 500 كارتەی كە كراونەتە تاپۆ، ئێمە بە خەڵكیان دەدەینەوە، هەروەها مژدەش بەو خەڵكە دەدەین كە رێگەپێدانیشیان پێدەدەین بۆ ئەوەی هەركەس نیازی خانوودروستكردنی هەیە، خانووی خۆی بكات، ئێمە هێشتا خزمەتگووزارییمان بۆ ئەو زەوییانە نەبردووە، بەڵام قۆناغی یەكەم دەرخستەیەك ئامادە دەدەكەین بۆ دیاریكردنی سەرەبلۆكەكان و دەواتریش بەپێی بودجەی بەردەست، خزمەتگوزاری بۆ ئەو شوێنە دەبەین".

عه‌بدولواحید ئه‌حمه‌د دووپاتی كردەوە: "راسپاردەی جەنابی سەرۆكی حكوومەتی هەرێمی كوردستان ئەوەیە، ئەو زەوییە كارتانە بكرێنە تاپۆ و پاشانیش خزمەتگوزاری بۆ ئەو زەوییانە دابین بكەین، ئێمەش راسپاردەكە جێبەجێ دەكەین".