هەڵبژاردن و شەڕی سپى
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
ئەحمەد خۆشناو 22/09/2021

هەڵبژاردن و شەڕی سپى

لە هەموو هەڵبژاردنێكدا، بەرلەوە یاسا بۆ هەڵبژاردن دەردەچێت تا خەڵکى عێراق \ئەوانەی مافى دەنگدانىان هەیە\ بە هەموو چین و توێژەکانیەوە روو لە بنکەکانى دەنگدان بکەن و ئازادانە نوێنەرى خۆیان هەڵبژێرن، لەم سۆنگەیەوە هەڵبژاردن ململانێیەکى گەرموگوڕ و شەڕێکى سەخت و سپیە، چونکە براوە دەبێتە بڕیار بەدەست و بەرنامەی كاری خۆى دەسەپێنێت بەسەر خاوەن دەنگە كەمەكانی هەڵبژاردندا، هەر بۆیە هەر لایەنێک هەوڵ دەدات زۆرترین دەنگ کۆ بکاتەوە و زۆرترین نوێنەرى هەبێت لە پەرلەمانى عێراقدا.

لەبەر ئەو هۆكارانەی سەرەوە، پێویستە ئێمەى گەلى کورد و خەڵكی كوردستانیش بە هەموو پێكهاتەكانیەوە، هەموو چین و توێژەکان كە مافى دەنگدانمان هەیە، لە رۆژى 10/10/2021 روو لە بنکەکانى دەنگدان بکەین و نوێنەرى راستەقینەى خۆمان هەڵبژێرین.

لەم بارەیەوە گرنگە هەموو تاکێکى کوردستانی، بە تایبەتى توێژی فەرمانبەران و مووچەخۆرانى هەرێمى کوردستان، لەم رۆژە پیرۆزەدا ئەسپى خۆمان تاو بدەین و بە گوڕ و تین و جۆش و خرۆشەوە بچینەى گۆڕەپانى ئەم شەڕە سپیەوە، چونکە ئێمەى فەرمانبەر و مووچەخۆرى حکوومەت و هەموو هێزە ئەمنیەکان و پێشمەرگە قارەمانەکان، زۆرینەى دەنگدەرانین.

دەنگ دەدەین بۆ ئەوەى ئێمەی فەرمانبەر بەردەوام بین لە خزمەتکردن و راییکردنى کاروبارى هاووڵاتیان و مافەكانیشمان پارێزراو بێت، وەک هێزە ئەمنیەکان دەنگ دەدەین بۆ ئەوەى تەناهی و ئارامى، زیاتر باڵ بکێشێت بەسەر کوردستانی خۆشەویستدا، وەک پێشمەرگە دەنگ دەدەین بۆ ئەوەى رۆحى شەهیدەکانمان ئاسوودە بێت و بەردەوام قەڵای پتەو و مەحكەم بین بۆ پاراستنى کوردستان و سەر و ماڵى هاووڵاتیان، دەنگ دەدەین بۆ ئەوەى نوێنەرەکانمان داکۆکىکارى سەرسەختى مافە نەتەوەییەکانمان بن.

خوێنەرى بەڕێز، دەنگدان مافی تۆیە و تۆ بڕیار دەدەیت، بۆیە ئەو مافەی خۆت بە دەستی خۆت مەفەوتێنە و بڕۆ دەنگ بدە، فەرمانبەرى خۆشەویست، با دەنگەکانمان بۆ کاندیدانى ئەو لایەنە بێت کە نزیکەی سەدەیەکە لە شۆڕش و بەرخودان بەردەوامە، با دەنگەکانمان بۆ کاندیدانى ئەو لایەنە بێت کە هەمیشە خۆى بە خزمەتکارى میللەتەکەى زانیوە و دەزانێت و بەرپرسیارێتی هەڵدەگرێت، با دەنگدەری ئەو لایەنە بین كە خۆی ناچەمێنێت و تەسلیم نابێت و كوردستان بە بەهێزی دەهێڵێتەوە، بە دەنگەکانمان دەتوانین کار بۆ ئایندەیەکى گەش مسۆگەر بکەین و داهاتووى میللەتەکەمان پرشنگدار بکەین