ئەو قوتابییەی بە 18 وەرز قۆناغی ئامادەیی بڕی: ئیرادەم بەهێز بوو
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

ئەو قوتابییەی بە 18 وەرز قۆناغی ئامادەیی بڕی: ئیرادەم بەهێز بوو

32 جار بە وەرزی یەكەم و دووەم تاقیكردنەوەی ئینگلیزی ئەنجام داوە

قوتابییەكی دانیشتووی شارەدێی بالیسان، دوای نۆ ساڵ و 18 وەرز، قۆناغی ئامادەیی ببڕێت، ئاماژە بەوە دەدات، كە ئیرادەی خۆی بووە و كۆڵی نەداوە ”دەبێت كۆلیژ یان پەیمانگەیەك تەواو بكەم“.

فەتاح محەمەد فەتاح، لە دایكبووی ساڵی 1993 گوندی توتمەی سەر بە شارەدێی بالیسانە، هەر لەو شارەدێیە قۆناغەكانی خوێندنی بڕیوە، تا ساڵی 2012 یەكەم ساڵی بووە لە پۆڵی 12، لەو ساڵەوە ئەو لە وانەی ئینگلیزی دەرنەچووە، تا ئەمساڵ نەبێت، نزیكەی نۆ ساڵ و 18 تاقیكردنەوەی ئینگلیزی ئەنجام داوە.

فەتاح محه‌مه‌د به‌ (باسنیوز)ى ڕاگه‌یاند: "راستە نۆ ساڵە تاقیكردنەوەم ئەنجام داوە، بەڵام تەنیا دوو ساڵ لە قوتابخانە بووم، ئەوی دیكە هەمووی تاقیكردنەوەی دەرەكی بوون و تەنیا تاقیكردنەوەی ئینگلیزیم ئەنجام داوە، بۆیە لەپاڵ ئەوەی كارم كردووە، ساڵانەش دوو وەرز تاقیكردنەوەی ئینگلیزیم كردووە، بەردەوام بووم لە ئیش و بەپێی تواناشم ساڵانە تاقیكردنەوەم ئەنجام داوە، تا دوایین جار ئەمساڵ لە ئینگلیزیش دەرچووم“.

ئەو قوتابییە، 18 وەرز تاقیكردنەوەی ئینگلیزی ئەنجام داوە، هۆكاری ئەوەی چۆن بووە، چۆكی دانەداوە و بەردەوام بووە لە ئەنجامدانی تاقیكردنەوە، لە كاتێكدا بە قسەی خۆی تەنیا لە گوندەكەی خۆیان و گوندەكانی دەوروبەری بالیسان زیاتر لە 60 كەسی دەناسی كە دوای دوو ساڵ تاقیكردنەوە و دەرنەچوونیان، وازیان لە خوێندن هێناوە، بەڵام ئەو دەڵێت: ”12 ساڵم خوێندبوو، جگە لەو ساڵانەی كە دەرنەچوومە، بۆ نموونە لە پێنجی سەرەتایی هەر بەهۆی ئینگلیزییەوە، بۆیە گوتم بۆچی 12 ساڵ خوێندنم بەهۆی وانەیەكی بفەوتێ، مادەم تاقیكردنەوەی دەرەكی هەیە، گوتم كار و كەسابەتی خۆم دەكەم و ساڵانەش تاقیكردنەوە دەكەم، ساڵێك هەر دەردەچم، هیچ پێویست ناكات ئەو هەموو ساڵە قوربانی وانەیەك بن، بۆیە لە پاڵ كەسابەتەكەم، ساڵانەش تاقیكردنەوەم ئەنجام دەدا“.

ئەو هەر لە قۆناغی سەرەتاییەوە گرفتی لەگەڵ وانەی ئینگلیزی هەبووە، لە پێنجی سەرەتایی بەهۆی وانەی ئینگلیزییەوە، ساڵێك ماوەتەوە، دواتر لە هەموو ساڵەكانی تەمەنی خوێندنی لە خوولی دووەم لەوانەی ئینگلیزی دەرچووە، تەنیا پۆلی شەشی سەرەتایی نەبێت، بەپێی لێكدانەوەكانی خۆی كە هەموو ساڵەكان بە خولی دووەم دەرچووە، بە كۆی وەرزەكانی یەكەم و دووەم، ئەو قوتابییە، زیاتر لە 32 وەرز تاقیكردنەوەی ئینگلیزی ئەنجام داوە، تاكوو لە قۆناغەكانی خوێندنی دەرچووە.

فەتاح جەخت لەوە دەكاتەوە، كە كۆڵنەدانەكەی بۆ بەهێزیی ئیرادەی خۆی دەگەڕێتەوە، چونكە دەیان كەس پێیانگوتووە، بۆ ئەوەندە خۆت ماندوو دەكەی، تازە تۆ وانەی ئینگلیزیت لێ بووەتە مۆتەكە و لێی دەناچی، ”بەڵام بەخۆم ئیرادەم به‌هێز بوو، گوتم تازە كە چوومە، هەر دەشبێ تەواوی بكەم، خوا پشتیوان بێت رۆژێك دێت، زانكۆ یان پەیمانگەیەك هەر تەواو دەكەم، بەپێی توانا ئەو قۆناغانەش ببڕم، بەڵام ئێستا بەهۆی باری داراییمه‌وه‌ ناتوانم ئەمساڵ بچمە هەولێر، بەڵام چۆن بە بەهێزیی ئیرادەم دەرچووم، ئاوا قۆناغەكانی دیكەش دەبڕم“.

ئەو قوتابییە تازە دەرچووە، بە رۆژ كاری سەرتاشی دەكات، شەوانەش كاتژمێر 1:00 شەو تا 8:00 بەیانی لە ماركێتێك شاگردە، كەچی بەردەوام حەزی بۆ خوێندن هەیە، ئامۆژگاری ئەو هاوڕێیانەشی دەكات كە وازیان لە خوێندن هێناوە، كە لە پاڵ ئیشكردن، گرنگی بە خوێندن بدەن، تاقیكردنەوەی دەرەكی ئەنجام بدەن، رۆژێك دێت بچنە كۆلێژ و كۆلێژێك تەواو بكەن، دەشڵێت: ”چەندین كەسم بینیوە لە تەمەنی زۆر گەورە گەڕاوەتەوە بەرخوێندن، چونكە ئەگەر ئەمڕۆش كارت بە بڕوانامە نەبێت، رۆژێك هەر دێت كارت پێدەبێت، بۆیە چەند زووتر خوێندن تەواو بكەیت باشترە“.

شارەدێی بالیسان، سەر بە پارێگای هەولێرە و 88 كیلۆمەتر لە ناوەندی پارێزگا دوورە، لە ساڵی 1987 لەلایەن رژێمی بەعسەوە كیمیاباران كرا، زیاتر لە دوو هەزار هاووڵاتی بوونە قوربانی.