بەرپرسانی پارتی: نوێنه‌رایه‌تیى خه‌ڵكى كوردستان به‌ حزبى بچووك و بێئیراده‌ ناکرێت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

بەرپرسانی پارتی: نوێنه‌رایه‌تیى خه‌ڵكى كوردستان به‌ حزبى بچووك و بێئیراده‌ ناکرێت

”لە‌ هه‌موو خوله‌كانی ڕابردوودا، تاكه‌ پەرلەمانتارێکی پارتی له‌ سەنگەری خەڵكی كوردستان لاینه‌داوه“

 

ئەندامانی سەرکردایەتی و لقەکانی پارتی دیموکراتی کوردستان، جەخت لەوە دەکەنەوە کە پارتی حزبێکی بەهێزە و وەکوو پێشتر لەسەر ئاستی عێراق و هەرێمی کوردستان حزبی ژمارە یەک بووە، لەم هەڵبژاردنەشدا هەر بە حزبی پلە یەک دەمێنێتەوە و تا دێت جەماوەری پارتی لە ناوچە جیا جیاکانی کوردستان بەرەو زیادبوون دەچێت و خەڵکی کوردستان لەوە دڵنیان کە بەهێزبوونی پارتی دەبێتە هۆی بەهێزبوونی هەرێمی کوردستان لە ئاستی ناوخۆ و عێراق و وڵاتانی دەرەوەدا.

پەیوەندییە نێودەوڵەتییەکان و تەناهیی ناوخۆ

لەم بارەیەوە، بڵند ئیسماعیل، ئه‌ندامی سه‌ركردایه‌تیى پارتى دیموکراتی کوردستان، به‌ (باسنیوز)ى ڕاگه‌یاند، ''پارتی دیموکراتی کوردستان حزبێکی بەهێزە'' و وڵاتانی دەرەوەش هەمیشە داکۆکی لەوە دەکەن کە هەرێمی کوردستان، هەرێمێکی بەهێز بێت و دەڵێت: ''ئەگەر پارتی نەبێت، پەیوەندییە نێودەوڵەتییەکان و ئاوەدانکردنەوە و ئەمن و ئاسایشی ناوخۆیی بۆ هەرێمێکی بەهێزیش نابێت و دنیای دەرەوە ئەو پەیوەندییە بەهێزانە لەگەڵ هەرێمی کوردستان نابەستێت''، خەڵکیش ئەوە دەزانن، بۆیە دەنگ بە پارتی دەدەن.

بڵند ئیسماعیل گوتیشی: ''هەرێمێکی بەهێز بە سەرۆکایەتیی سەرکردەیەکی بەهێزی وەک سەرۆک بارزانی دروست دەبێت''.

پەرلەمانتارانی پارتی لە ڕێبازی بارزانی لا نادەن

ئەو ئەندامەی سەرکردایەتیی پارتی، ڕوونی کردەوە کە نوێنه‌رایه‌تیى خه‌ڵكى كوردستان به‌ حزبى بچووك و بێئیراده‌ ناکرێت و ئه‌گه‌ر پارتى له‌ به‌غدا بەهێز بێت، زۆرینه‌ى شیعه‌ و سوننه‌كان بۆ چاره‌سه‌ركردنى كێشه‌كان دێنه‌ پێشەوە و گوتیشی: ''له‌ هه‌موو خوله‌كانی ڕابردووی پەرلەماندا، تاكه‌ پەرلەمانتارێکی پارتی له‌ سەنگەری خەڵكی كوردستان و ڕێبازى پیرۆزى بارزانى لاینه‌داوه‌، کەچی هه‌ر له‌م خوله‌دا کە ڕادەبرێت، بینیتان ١٥‌ پەرلەمانتاری هه‌موو لیسته‌كانی دیکە جگه‌ له‌ لیستی پارتى، فراكسیۆنێكیان بۆ دژایه‌تیى هه‌رێمى كوردستان پێك هێنا''.

بڵند ئیسماعیل ئه‌وه‌شى خسته‌ ڕوو: ''كاتێک ئێمه‌ ده‌چووین ڕێكکه‌وتنمان له‌سه‌ر به‌شه‌بودجه‌ى پێشمه‌رگه‌ و قووتى خه‌ڵكی کوردستان لەگەڵ حکوومەتی فیدراڵی ده‌كرد، خەڵکی تر ئیمزایان كۆ ده‌كرده‌وه‌ و داوایان دەکرد بودجەی کوردستان ببڕدرێت، كاتێ ئێمه‌ باسى كێشه‌ى ناوچه‌ كوردستانییه‌كانمان ده‌كرد، ئه‌وان ده‌یانویست شاره‌كانى ترى هه‌رێمى كوردستانیش بخرێنه‌وه‌ سه‌ر به‌غدا، کە ئێمه‌ داكۆكیمان له‌ قه‌واره‌یەکی بەهێزی هه‌رێمى كوردستان ده‌كرد، ئه‌وان داوایان ده‌كرد وەک پارێزگا هەڵسوکەوت له‌گه‌ڵ هه‌رێمى كوردستان بكرێت و داویان ده‌كرد پێشمه‌رگه‌ لە ناوچە دابڕێنراوەکان نه‌مێنێت و حه‌شدى شه‌عبى لەوێ جێگیر بکرێت، بۆیە ئه‌وانه‌ نوێنه‌رایه‌تیى خه‌ڵكى كوردستانیان پێ ناكرێت''.

پارتی هێزی دەوڵەتدارییە

ئەو سەرکردەیەی پارتی ڕاشیگه‌یاند، پارتی هێزی‌ ده‌وڵه‌تدارییە و ده‌زانێت به‌پێی یاسا نێوده‌وڵه‌تییه‌كان هه‌نگاو بهاوێت و ''هه‌میشه‌ سه‌ركرده‌كانمان له‌ پێشوازیى سه‌ركرده‌كانى جیهاندان، یان سه‌ركرده‌ گه‌وره‌كانى وڵاتان له‌ پێشوازیى سه‌ركرده‌كانى ئێمه‌دان''، بۆیه‌ ده‌نگدان به‌ پارتى، ده‌نگدانه‌ به‌و هه‌موو دەسکەوتانە و ''دڵنیاین لە هەڵبژاردنی ئه‌مجاره‌شدا پارتی لەسەر ئاستی عێراق حزبى یه‌كه‌م ده‌بێت''.

جه‌ماوه‌ری پارتی له‌ سلێمانی فراوانتر بووە

هەر لەم بارەیەوە، سەعید پشدەری، به‌رپرسی لقی 4ی پارتی دیموکراتی کوردستان لە سلێمانی، بە (باسنیوز)ی ڕاگەیاند، ڕۆژانه‌ له‌ باره‌گای لق زیاتر له‌ 500 که‌س ده‌بینن و دەشڵێت، ئاستی بانگه‌شه‌ پێی ناوه‌ته‌ قۆناغێکی گرنگ و گه‌رمه‌وه‌ و تا دێت جه‌ماوه‌ری پارتی له‌ سلێمانی فراوانتر ده‌بێت و خه‌ڵکێکی زۆر په‌یوه‌ندییان به‌ پارتییه‌وه‌ کردووه‌ و پشتیوانی لە پارتی ده‌کەن.

سەعید پشدەری ڕوونی کردەوە: ''له‌ سلێمانی ئاستی بانگه‌شه‌مان به‌ هێمنانه‌ و به‌ باشی ده‌ڕواتە پێشەوە، هەرچەند بەداخەوە کاری ھەندێ لایەن تەنیا ھێرشکردنە بۆ سەر پارتی دیموکراتی کوردستان، بەڵام ئێمە ئامۆژگاریی سەرۆک بارزانی جێبەجێ دەکەین و ھێرش ناکەینە سەر کەس و بانگەشەیەک بەڕێوە دەبەین کە کاریگەریی نەرێنیی لەسەر ئاشتەوایی کۆمەڵایەتی نەبێت و وەک پارتی بانگەشەیەکی شارستانی بەڕێوە دەبەین“.

دروشم و کرداری پارتی یەکن

بەرپرسی لقی 4ی پارتی دەشڵێت، پارتی لە ڕابردوودا ئەوەندە دەستکەوتی مەزن و زۆری ھەبووە کە ھەموو پارتییەک دەتوانێت بە شانازییەوە بانگەشە بکات، چونکە ''ئێمە وەک پارتی دروشم و کردارەکانمان یەکن و بەو جیاوازییەوە جوانین کە خزمەت دەکەین، ھەر بەو جیاوازییەشەوە دەمێنینەوە بۆ خزمەتکردنی خەڵکی کوردستان“.

سەعید پشدەری جەختی لەوە کردەوە: "دڵنیاین پارتی لە ھەڵبژاردنی مانگی داھاتوو سەردەکەوێت، بەڵام دەمانەوێت تەپڵی ئەو سەرکەوتنەی پارتی لە سلێمانییەوە لێ بدرێت و داوا لە جەماوەری پارتی دەکەین بە دەنگدانی خۆیان ڕۆژی 10/10 بکەنە ڕۆژی سەرکەوتنی پارتی''.

بەهێزیی پارتی لە بەرژەوەندیی ناوچەکەدایە

شێخ جەعفەر شێخ مستەفا، بەرپرسی لقی ١٥ی پارتی دیموکراتی کوردستان لە خانەقینیش لە لێدوانێکدا بە (باسنیوز)ی ڕاگەیاند، پارتی‌ له‌ به‌غدا شه‌ڕ بۆ به‌ده‌ستهێنانی مافه‌کانی گه‌لی کوردستان ده‌کات و مانه‌وه‌ی پارتی به ‌به‌هێزی له ‌به‌رژه‌وه‌ندیی ناوچه‌که‌دایه‌.

ئەو بەرپرسەی پارتی جەختی کردەوە: ''لە هەڵبژاردنی ئه‌مجارەدا‌ له‌ سه‌رجه‌م شار و شارۆچکه‌کان و له‌ ناوچه‌ دابڕێنراوه‌کان ده‌نگمان زیاتر ده‌بێت و دۆخمان باشتره‌ له‌ جاران و خه‌ڵک متمانه‌ی به‌ پارتی هه‌یه‌ و پێشوازیی باش له‌ کاندیده‌کانمان ده‌کەن، ئێمە لەسەر داوای سەرۆک بارزانی بە شێوەیەکی جیاواز و ھێمنانە بانگەشەی خۆمان دەکەین و ناچینە ناو شەڕەجوێن و ناوزڕاندن و برینی یەکتر ناکولێنینەوە و لەجیاتی یەکتر شکاندن باسی دەستکەوتەکانی خۆمان دەکەین''.

شێخ جەعفەر گوتیشی: ''لە سنووری خانەقین دوو کاندیدمان ھەیە، دۆخی ناوچەکانی ئێمە ھەندێک ھەستیارە، بەھۆی ئەوەی دەسەڵاتی ناوچەکە لەدەست ئێمەدا نییە، بەڵام جەماوەرێکی زۆر باشمان ھەیە و ئەمجارە دۆخمان لە ھەڵبژاردنی ڕابردوو باشتریشە و زیاتر دەنگ بەدەست دێنین“.