كتێبێكی دیكەی تاریق كارێزی نووسەری دیاری كورد چاپ و بڵاو كرایەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

كتێبێكی دیكەی تاریق كارێزی نووسەری دیاری كورد چاپ و بڵاو كرایەوە

كتێبێكی دیكەی نووسەرێكی دیاری كورد لە کەرکووک چاپ و بڵاو كرایەوە و نووسەری كتێبەكە ناوەڕۆكی كتێبەكەی خستە ڕوو.

تاریق كارێزی، نووسەری دیاری كورد و خاوەنی كتێبخانەی كارێز، لە شاری كەركووك، بە (باسنیوز)ی ڕاگەیاند: "كتێبە نوێكەم بە ناوی كوێت، دەكرێ بڵێی لە شێوەی ڕۆمان نووسراوە، بەڵام ناوم لێ نەناوە ڕۆمان، بەڵكوو دەقێكە خوێنەر دەتوانێ ناوی لێ بنێت و لە كتێبەكەمدا باسی شەڕەكەی كوێت دەكەم و لەسەر ئەو شەڕەش بە كوردی و نە بە عەرەبی، بە تێروتەسەلی نەنووسراوە كە شەڕی داگیركردنی كوێتە، بەڵام لێرەولەوێ هەندێك كەس باسیان كردووە، بە نموونە لە ڕۆمانێكدا بەشێكیان نووسیوە، بەڵام لەم كتێبەدا پاڵاوانەكە لە سەرەتاوە تا كۆتایی هەر باس باسی كوێتە، واتە چی ڕووی دا و چی بووە ئەو كارەساتە گەورەیەی كە ڕووی دا دەرەنجامەكەی چی بوو و دۆخی سوپای عێراق لەو شەڕەدا چۆن بوو، ئیتر وردەكارییەكی زۆری تێدایە و دەچێتە ناو زۆر لایەنی شاراوە كە نە ڕاگەیاندن تاكوو ئێستا دەری بڕیوە نە لە ڕاپۆرتە رۆژنامەوانێكاندا هاتووە".

تاریق كارێزی لە درێژەی باسكردن لە ناوەڕۆكی كتێبە نوێكەی گوتی: "هەوڵم داوە بچمە ناو وردەكارییەكی زۆر كە لە ساڵی 1990 كوێت داگیر كراوە زۆر شت بە شاراوەیی مابووەوە و سوپای عێراق ئەوكات لەوێ ترۆ كرا، ئیتر دوای ئەو شەڕە بە ڕاستی وەرچەرخانێك لە كوردستان ڕووی دا ئەوە بوو ڕاپەرین بەرپا بوو، پێشتریش ڕژێم ئیتر هەموو كارەساتێكی بەسەر كورددا هێنابوو، بەڵام سوپای عێراق كە چووە كوێتەوە، هاوپەیمانیی نێودەوڵەتی دروست بوو بۆ لێدانی سوپای عێراق، ئەمە یارمەتییەكی گەورە بوو كە سەركردایەتی بەرەی كوردستانی گەلی باشوور ڕاپەرن و تەواوی باشوری كوردستان ڕزگار كرا و دوای ئەوە سەرەنجام حكوومەتی هەرێمی كوردستان پێكهێندرا كە ئێستا كورد پێگەیەكی هەیە كە دەوڵەتێكی ڕانەگەیەندراوە ئەوەش پایەكانی ئەو ڕووداوە بوو كە عێراق چوو كوێتی داگیر كرد".

ئەو نووسەرە ڕاشی گەیاند: "پاڵەوانی ئەو ناو كتێبەكە خۆی كەسایەتییەكە لە ڕووداوەكاندا ژیاوە و چووەتە كوێت و سەربازێك بووە وردەكارییەكانی بینیوە، ئەوە دەقێكە لە ڕووداوێكی گەورە كە چارەنووسی ناوچەكەی گۆڕی و كوردی لە دۆخی كیمیاباران و ئەنفالەوە هێنایە سەر شانۆی جیهانی وەك ئەكتەرێكی سیاسی هەمووی لەو ڕووداوەوە بوو، بە قەناعەتی من حەقە رەخنەگەرەكان قسە بكەن كە كتێبەكەم چۆنە، بەڵام مێژوویەكی زۆر هەستیار دروست دەكات، بەڵام لە كۆتاییدا خوێنەر حوكم دەدات چۆنە".

تاریق كارێزی، نووسەرێكی دیاری كوردە و لە كەركووك دەژی، چەندین كتێبی بە زمانی كوردی و عەرەبی نووسیون، هاوكات خاوەنی كتێبخانەی كارێزە لە گەڕەكی بارووتخانەی شاری كەركووك.