لە کەرکووک و خانەقین داوای قەدەغەکردنی بەرزکردنەوەی ئاڵای کوردستان دەکرێت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

لە کەرکووک و خانەقین داوای قەدەغەکردنی بەرزکردنەوەی ئاڵای کوردستان دەکرێت

کاندیدێکی پارتی: بشکوژرێم ئاڵای کوردستان لە ئۆتۆمبێلەکەم ناکەمەوە



ئەو لیژنەیەی، کە بەبێ بوونی هیچ ئەندامێکی کورد لە کەرکووک پێکهێنراوە، بەناوی لیژنەی سەرپەرشتیکردنی نووسینگەی هەڵبژاردنەکانی کەرکووک پێشنیازی کردووە بەرزکردنەوەی ئاڵای کوردستان قەدەغە بکرێت، بەڵام کاندیدێکی پارتی لە خانەقین دەڵێ لەسەر بەرزکردنەوەی ئاڵای کوردستان بشکوژرێم، داینابەزێنم.

بەپێی زانیارییەکانی (باسنیوز)، ئەو لیژنەیەی کە لە کەرکووک بەبێ بوونی هیچ ئەندامێکی کورد بۆ سەرپەرشتیکردنی هەڵبژاردن پێکهێنراوە، لەلایەن کۆمسیۆنی باڵای سەربەخۆی هەڵبژاردنەکانەوە، تیایدا لە لایەن ئەندامە عەرەب و تورکمانەکانەوە پێشنیازی ئەوە کراوە، کە ڕێگری لە بەرزکردنەوەی ئاڵای کوردستان و بەکارهێنانی لە پۆستەرەکان لەلایەن کاندیدەکانەوە بکرێت و تەنیا ئاڵای عێراق بەرز بکرێتەوە.

بەپێی زانیارییەکان، رووی ئەو پێشنیازە تەنیا لە کاندیدانی پارتی دیموکراتی کوردستانە، چونکە تەنیا کاندیدانی ئەو هێزە لەو ناوچەیە بەشێوەیەکی فراوان لەژێر ئاڵای کوردستان بانگەشە بۆ خۆیان دەکەن، کە پێشتریش بەرپرسانی پارتی جەختیان لەوە دەکردەوە، لەژێر ئاڵای کوردستاندا نەبێت ناگەڕێنەوە کەرکووک.

هەر ئەمڕۆ، لیزا فەلەکەدین کاکەیی، ئەندامی لیژنەی ناوچە کوردستانییەکانی په‌رله‌مانی كوردستان، لە فراکسیۆنی پارتی، بۆ ماڵپەڕی فەرمیی حزبەکەی ئاشکرای کرد، لیژنەیەک بۆ بەڕێوەبردنی ھەڵبژاردن لە کەرکووک پێکھاتووە، بەسەرپەرشتیی نەتەوە یەکگرتووەکان، لیژنەکە لە پێنج ئەندام پێکھاتووە، ئەوەی جێگەی گومانە، ھەر پێنج ئەندامی لیژنەکە لە پێکھاتەی عەرەب و تورکمانن و ھیچ کوردێکی تێدا نییە، ئەمە لەکاتێکدایە، کورد پێکھاتەیەکی سەرەکیی کەرکووکە.

لیزا کاکەیی ئاماژەی بۆ ئەوەش کردووە "ئەگەر ئەو لیژنەیە بەردەوام بێت لە کارەکانی تا رۆژی دەنگدان، کاریگەریی زۆر خراپی لەسەر دەنگی کورد دەبێت لە کەرکووک و ھەوڵی کەمکردنەوەی دەنگی کورد دەدرێت، بەداخەوە بێبەشکردنی کورد لە بەڕێوەبردنی پڕۆسەی ھەڵبژاردن پێچەوانەی دەستووری عێراقە، چونکە پێکھاتەی کریستیانیش بێبەش کراوە، ئەوەیش گومان دەخاتە سەر پڕۆسەی ھەڵبژاردن لە کەرکووک”.

پارتی دیموکراتی کوردستان، لە کەرکووک بە دوو کاندید بەشداریی لە پڕۆسەی هەڵبژاردندا کردووە و لە پارێزگاکانی دیکەی عێراقیش لە دیالە، سەڵاحەدین، بەغدا، ئەنبار و کەربەلاش کاندیدی هەیە.

لەمبارەوە، نەجوا حەمید محەمەد، بەربژێری پارتی دیموکراتی کوردستان لە کەرکووک لە بازنەی (٢) بە ژمارە (٥٢) بۆ (باسنیوز) ڕای گەیاند، بەهیچ شێوەیەک پابەندی ئەو بڕیارە نابین، ئەگەر بدرێت یان درابێت، گوتی: “ئەو بڕیارە روونە، کە لەلایەن خەڵکانێکی دژ بە کوردستانیبوونی کەرکووکەوە دراوە، ئێمە تەنیا پابەندی بڕیارەکانی حزبی خۆمان و سەرۆک بارزانی دەبین”.

لای خۆشیانەوە، جوان مەحموود غەفوور، کاندیدی بازنەی (٤)ی خانەقین بە ژمارە (٥٣) بۆ (باسنیوز) ڕای گەیاند، ئاڵای کوردستان بە ئۆتۆمبێلەکەمەوەیە و لە هەموو شوێنێک لەژێر ئەو ئاڵایە بانگەشە بۆ خۆمان دەکەین، گوتیشی: ”ئەگەر بشکوژرێم ئەو ئاڵایە لەسەر سەری خۆم و پۆستەرەکانم ناهێنمە خوارەوە“.

ئاماژەی بەوەش دا، ئەوان لە چاوەڕوانیی گەڕانەوەی لقی خانەقینی پارتی و پێشمەرگەن، گوتیشی: ”ئەگەر پێشمەرگە پێش هەڵبژاردن بۆ خانەقین نەگەڕێتەوە، ئەوا دۆخی خانەقین بەشێوەیەکە، هەڵبژاردن زیانی گەورە لە کورد دەدات، چونکە وەکو کاندید و بەربژێرەکانی پارتی دیموکراتی کوردستان مەترسی لەسەر ژیانمان هەیە“.