بەشێك لە كاندیدانی پەرلەمانی عێراق بەڵێنی سەیر و مەحاڵ بە هاووڵاتییان دەدەن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

بەشێك لە كاندیدانی پەرلەمانی عێراق بەڵێنی سەیر و مەحاڵ بە هاووڵاتییان دەدەن

ڕێكخستنی گرووپی گەشتیاری و خولی سەرتاشین و ئاهەنگی خەتەنەكردن

لە هەڵمەتی بانگەشەی هەڵبژاردنی ئەمجارەی پەرلەمانی عێراقدا، بەشێك لە كاندیدانی شارەكانی باشوور و ناوەڕاستی عێراق بەڵێنی مەحاڵ و سەیر بە دەنگدەران دەدەن، هەندێكیان زۆر لە توانای حكوومەتی داهاتوو بەدەرن و هەندێكیان سەیر و سەمەرەن.

ئەمڕۆ یەكشەممە تۆڕی هەواڵی (سكای نیوز)، بەدواداچوونێكی لەبارەی هەڵمەتی هەڵبژاردنی پێشوەختەی پەرلەمانی عێراق بڵاو كردووەتەوە و ئاماژەی بەوە داوە كە زۆرێك لە كاندیدانی پەرلەمانی عێراق، بەتایبەتی لە باشوور و ناوەڕاستی وڵاتەكەدا، بەڵێنی مەحاڵ و خەیاڵی بە دەنگدەران دەدەن.

لە راپۆرتەكەی سكای نیوزدا هاتووە كە بانگەشەی هەڵبژاردن لە عێراق وەكو بازاڕی زیادكردنی ئاشكرای لێ هاتووە و هەر كاندیدە لای خۆیەوە لەسەر كاندیدەكەی تر زیاد دەكات و بەڵێنی خەیاڵی و مەحاڵ بە خەڵكی وڵاتەكە دەدەن.

سكای نیوز بە تایبەت باسی لە دۆخی هەرە خراپی نەبوونی خزمەتگوزارییە سەرەتاییەكان لە عێراق كردووە، وەكو ڕێگەوبان و وزەی كارەبا و هەلی كار، كەچی دەڵێ كاندیدەكانی ئەم هەڵبژاردنە زۆر بە سانایی بەڵێن دەدەن لە چوار ساڵی داهاتوودا كۆتایی بە تەواوی ئەو كێشانە بێنن.

بەپێی ڕاپۆرتەكە، بەڵێنە نابەجێیەكانی كاندیدانی عێراق نەك وا ناكەن خەڵكی ئەو وڵاتە دەنگیان پێبدەن، بەڵكو پێشبینی دەكەن كاریگەری پێچەوانەی هەبێت و هەوڵی خەڵەتاندنی خەڵك وا بكات دەنگدەران لە پرۆسەكە بكشێنەوە و بەشداری لە هەڵبژاردنی پێشوەختەی عێراقدا نەكەن، بەتایبەتی كە لەوەتەی ساڵی 2003وە ساڵ بە ساڵ دۆخی شارەكانی ناوەڕاست و باشووری عێراق بەرەو خراپتر دەچێت.

سكای نیوز بە تەنزەوە باسی لەوە كردووە كە كاندیدانی نوێی پەرلەمان بە هۆی گۆڕانی سیستەمی دەنگدان و بوونی بە بازنەیی، ئێستا زیاتر بەڵێنی ناوچەیی دەدەن، وەكو چاككردن و دروستكردنی پرۆژەی ئاو و ئاوەڕۆ، ڕاكێشانی هێڵی وزە و هێنانی كارەبا بۆ گەڕەك و ناوچە دیاریكراوەكان، هەروەها بەڵینی زیادكردنی مووچەش بە هاووڵاتییان دەدەن.

ڕاپۆتەكە ئەوەی ورد كردووەتەوە كە ئەو بەڵێنانەی كاندیدانی پەرلەمان بە خەڵكی دەدەن، زۆربەیان لە ئیشوكاری دەسەڵاتی جێبەجێكاردا خۆیان دەبیننەوە و ئەركی حكوومەتن، پەرلەمان هیچ نەخشێكی لە هێنانەدی ئەو بەڵێنانەدا نابێت.

لەمبارەیەشەوە پەرلەمانتارێكی پێشووی عێراق كە ناوی خۆی ئاشكرا نەكردووە، بە تۆڕی سكای نیوزی راگەیاندووە كاندیدانی پەرلەمانی عێراق كار لەسەر دەنگدەری ناهۆشیار دەكەن، دەنا ڕوونە ئەو بەڵێنە گەورانەی ئەوان دەیدەن، نە پەرلەمانی داهاتوو و نە ئەو حكوومەتەش كە دێتە پێكهێنان، توانای جێبەجێكردنیانی دەبێت.

ڕاپۆرتەكە چەند نمونەیەكی سەیر و سەرنجڕاكێشیشی باس كردووە كە چەند كاندیدێكی عێراقی لە بانگەشەكانیاندا پشتیان پێبەستوون، لەوانەش بەڵێنی ڕێكخستنی گرووپی گەشتیاری بۆ ناوچە مێژووییەكان، بەڵێنی ڕێكخستنی خولی فێركردنی سەرتاشین، ڕێكخستنی ئاهەنگی خەتەنەكردن بۆ هاووڵاتییان و داوەتی بە كۆمەڵ، قیرتاوكردنی شەقامەكان و كردنەوەی ڕێگەوبانی نوێ لە ناوچە دوورە دەستەكان.