ئێران سەرجەم گەشتەكانی كۆمپانیای هێڵی ئاسمانی عێراقی ڕاگرت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

ئێران سەرجەم گەشتەكانی كۆمپانیای هێڵی ئاسمانی عێراقی ڕاگرت

ئێوارەی ئەمڕۆ پێنجشەممە ڕێكخراوی فڕۆكەوانیی مەدەنیی ئێران بڕیاری دا سەرجەم گەیشتە ئاسمانییەكانی كۆمپانیای هێڵی ئاسمانیی عێراق ڕابگرێت، ئەمەش وەكو سزایەك لە بەرانبەر پابەند نەبوونی عێراق بە یاسای دەركردنی ڤیزای گەشتیاران.

ڕێكخراوی فڕۆكەوانیی مەدەنیی ئێران ڕای گەیاندووە تەواوی گەشتەكانی كۆمپانیای هێڵی ئاسمانیی عێراقی ڕاگرتووە، بە گەشتەكانی سەردانیكەرانی مەزارگەكانیشەوە.

هەروەها ئاماژەی داوە كە پێشتر چەندین جار كۆمپانیا عێراقییەكەیان ئاگەدار كردووەتەوە كە بلێتی گەشتكردن بە گەشتیارانی ئێران نەفرۆشنەوە، تا ئەو كاتەی گەشتیارەكان ڤیزای عێراق وەردەگرن، بەڵام كۆمپانیا عێراقییەكە پابەند نەبووە.

دەشڵێن بەم هۆیەوە ڕێكخراوی فڕۆكەوانیی مەدەنیی ئێران بڕیارەكەی داوە و تەواوی گەشتە ئاسمانییەكانی چوون و هاتنەوەی هێڵی ئاسمانیی عێراقی راگرتووە، لە سبەینێ هەینییەوە بڕیارەكە جێبەجێ دەكرێت.

ئاژانسی هەواڵی (ئیرنا) بڵاوی كردەوە كە ڕێكخراوە ئێرانییەكە بڕیاری داوە كۆمپانیا عێراقییەكە بە زووترین كات پارەی بلیتی ئەو گەشتیارانە بگەڕێنێتەوە كە نەیانتوانیوە بەهۆی نەبوونی ڤیزاوە سەردانی عێراق بكەن.