دڕاندنی پۆستەری كاندیدەكان له‌ كه‌ركووك زیادی كردووه‌
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

دڕاندنی پۆستەری كاندیدەكان له‌ كه‌ركووك زیادی كردووه‌

چه‌ند رۆژێكه‌ كۆمیسیۆنی باڵای سەربەخۆی هەڵبژاردنەكان دەرگای بانگەشەی هەڵبژاردنی بۆ كاندیدانی هەڵبژاردنی پێشوەختەی عێراق كردووەتەوە و لە كەركووكیش لەگەڵ دەستپێكی ئەو بانگەشەیەدا دەست بە دڕاندنی پۆستەری كاندیدەكان كراوە و ئێستاش زیادی كردووە.

ئەمڕۆ چوارشەممە 15/9/2021، عەمید كاوە غەریب، فەرماندەی پۆلیسی كەركووك، بە (باسنیوز)ی ڕاگەیاند، ئێمە بە گوێرەی یاسا لێپێچینەوە لەو كەسانە دەكەین كە پۆستەری كاندیدانی لایەنەكان لە كەركووك دەدڕێنن یاخود دەشێوێنن.

گوتیشی: بەگوێرەی یاسای هەڵبژاردن مافی كاندیدەكانە وێنەكانیان بڵاو بكەنەوە و بانگەشەكانیان بكەن، ئەوەش لە چوارچێوەی یاسادا و دەبێت وێنەكانیان پارێزراو بێ و هەر كەسێك بیەوێت تەجاوز بكاتە سەر هەر كاندیدێك و بەهەر مەبەستێك بێ، لێپێچینەوەی یاسایی لەگەڵدا دەكەین.

شەوی سێشەممەی ڕابردوو، دەنگۆی ئەوە بڵاو بووەوە كە لە گەڕەكی ڕووناكیی شاری كەركووك، لەسەر دڕاندنی پۆستەری كاندیدەكان، دوو كەس بە دەستڕێژی گوللـە بریندار كراون و لەو بارەوە، (باسنیوز) پەیوەندی بە عەمید هەڤاڵ بەرزنجی، بەڕێوەبەری بنكەی پۆلیسی عروبەی كەركووكەوە كرد، ناوبراو ڕەتی نەكردەوە كە ڕووداوێكی لەو جۆره‌ هەبێت، بەڵام ڕەتی كردەوە لەو بارەیەوە هیچ زانیارییەك بخاتە ڕوو و هۆكارەكەشی بۆ ئەوە گەڕاندنەوە كە ئەوان مافی لێدوانیان نییە.