هاوپەیمانیی فەتح: ئیسرائیل کاروانەکەی حەشدی شەعبی بۆردومان کردووە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

هاوپەیمانیی فەتح: ئیسرائیل کاروانەکەی حەشدی شەعبی بۆردومان کردووە

هاوپەیمانیی فەتح (هاوپەیمانیی میلیشیاکانی  حەشدی شەعبی لە پەرلەمانی عێراق)، ئیسرائیل بە بۆردومانکردنی کاروانێکی ئەو میلیشیایانە تۆمەتبار دەکات.

درەنگانی شەوی سێشەممە 14-9-2021، فڕۆکەیەکی جەنگی کاروانێکی حەشدی شەعبی لە گوندەوارەکانی ئەلبوکەمال لە پارێزگای دێرەزوور لە رۆژهەڵاتی سووریا و لە نزیک سنووری عێراق، بۆردومان کردووە.

سەرچاوە میدیاییەکان باس لەوە دەکەن، کە کاروانەکە لە دوو ئۆتۆمبێل پێک هاتبوو و هەردووکیان بە تەواوی تێک شکاون.

ئەمڕۆ چوارشەممە 15-9-2021، هاوپەیمانیی فەتح لە بەیاننامەیەکدا رایگەیاندووە: ئەو بۆردومانە دەستدرێژییە بۆ سەر سەروەریی عێراق و پێویستە حکوومەت و پەرلەمانی عێراق هەڵوێستێکی روونیان لەبارەوە هەبێت.

هاوپەیمانیی فەتح پێی وایە بە چوونە دەرەوەی هێزە بیانییەکان لە عێراق ئەو جۆرە هێرشانە بۆ سەر میلیشیاکانی حەشدی شەعبی کۆتاییان دێت.

هاوپەیمانییەکە جەختی لە بەرپرسیارێتیی ئیسرائیل لە هێرشەکە کردووەتەوە و رایگەیاندووە: دوای گەڕاندنەوەی 30 هەزار چەکداری حەشدی شەعبی بۆ سەر کارەکانیان، ئیسرائیل ترسی لەلا دروست بووە، بۆیە ئەو هێرشەی کردە سەر کاروانەکەی حەشد.

دوای بۆردومانەکە، واینێ مارۆتۆ، گوتەبێژی هاوپەیمانیی نێودەوڵەتی دژی رێکخراوی تیرۆریستی داعش لە هەژماری تایبەتیی خۆی لە تۆڕی کۆمەڵایەتیی (تویتەر)، رەتی کردەوە هێرشەکەیان ئەنجام دابێت و رایگەیاندووە: فڕۆکە جەنگییەکانی هاوپەیمانان لە رۆژی سێشەممە 14-9-2021دا هیچ بۆردومانێکیان نەکردووە.