كوردی عربي بادینی
Kurdî English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
×
هەرمن ئەحمەد 14/09/2021

كاندیدی لاواز و ئینتیمای لاواز

ئینتیما بۆ وڵات، چەمكێكی فه‌لسه‌فی نیه تا ویستمان بە بیركردنەوەی قووڵ بێت بۆ تێگەیشتن لێی، به‌ڵكوو هەستێكە لەلای تاكه‌كانی نێو كۆمه‌ڵگه‌، كە بە مۆڕاڵ و هۆشیارییه‌وە خۆشەویستی و وەلایان دەبێ بۆ خاك و نیشتمانی خۆیان، ئەم هەستەش جۆرێك لە متمانە بەخۆبوون و هێز دروست ده‌كات لە نەستیدا، واتە ئەم پەیوەندییە راستەوخۆ لەنێوان مرۆڤ و خاكدایە و ئیدی لەو بەینەدا شتێكی تر نیە.

بەڵام بەداخەوە ئه‌وه‌ی ئێستا لە كوردستانی باشوور دەبینرێت، خەڵكانێك حكوومەت و حزب و دەسەڵات و بەشێك لە سیاسییەكانیان خستووەتە نێوان خۆیان و خاكەكەیانەوە، بۆیە پەیوەندییەكە لاواز بووە و هەمیشە وا دێتە بەرچاو كە هەردوو لا بەرەو ئاقار و ئایندەیەكی نادروست هەنگاو بنێن.

هەر كاتێك و لە هەر شوێنێكی دونیادا، ئینتیمای هاووڵاتی بۆ نیشتمان، ببەسترێتەوە بە ئەدای حكوومەت و حزبەكانی نێو حكوومەتەوە، یان ببەسترێتەوە بە ئەدای سیاسییە دەستڕۆیشتووەكانی وڵاتەوە، بە دڵنیاییەوە بیركردنەوەیەكی هەڵەیە، ئاخر حزب دێ و دەڕوات، حكوومەت دێ و دەڕوات، كابینە دێ و دەڕوات، سیاسییەكان دێن و دەڕۆن و خەڵكانی تر دێنە جێیان، بەڵام خاك و نیشتمان و زێدی رەسەن، هەر لە جێگەی خۆیدا دەمێنێتەوە.

تۆی مرۆڤ كاتێ بۆ یەكەمین جار دێیتە ژیانەوە، لە رەحم یان هەناوی دایكێكەوە دێیتە دەرەوە، جا ئەو دایكە نەخۆش بكەوێت، ئازار بدرێت، ئازارت بدات، باوك بمرێت و دایك شوو بكاتەوە بە پیاوێكی تر، یان دایك بمرێت و باوك ژنێكی تر بهێنێتەوە، یان بە دەستی دایەن و بەخێوكەرێكی تر پەروەردە بیت، ئەمە هیچ لەو راستیە ناگۆڕێت كە دایكی رەسەنی تۆ، هەر ئەو ژنەیە كە لە رەحمی ئەودا خەلق بوویت و هاتوویتە ژیانەوە. جا نیشتمانیش بۆ مرۆڤ وەهایە، بۆیە هەمیشە نیشتمان بە دایك دەشوبهێنرێت، كە بێگانەیەك نیشتمانی لێ زەوت كردیت، وەك ئەوە وایە دایكت لێ زەوت كرابێت.

عەقیدە و مەزهەب و بیروباوەڕ و ئایدۆلۆژیا و ئینتیما بۆ ئەم حزب و ئەو رێكخراو و ئەم گرووپ و ئەو تاقم و ئەم سەركردە و ئەو سیاسی، نابێ هەرگیز لە ئینتیما بۆ نیشتمان پتەوتر بێت، لە هەر وڵاتێكدا پێچەوانەكەی هەبوو، ئەوە دەبێ بزانین كێشە هەیە، پەروەردەی نیشتمانیی بەهێز نیە، بەهای بوونی نیشتمان لە منداڵیەوە لە لە ناخی هاووڵاتیانی ئەو وڵاتەدا نەچێنراوە، دەبێ بزانین ئەو وڵاتە یان داگیر كراوە یان هەڕەشە و مەترسیی داگیركردنی لەئارادایە.

سه‌رۆك بارزانی، له‌ مه‌راسیمی دەستپێكردنی هه‌ڵمه‌تی بانگه‌شه‌ی پارتی دیموكراتی كوردستان بۆ هەڵبژاردنەكانی داهاتووی عێراق گوتی: ”دەبێ گیان هه‌رزان بێت له‌پێناو نیشتماندا“.
دەزانم هەموو دوژمنان و داگیركەران و نەیارانی ناوخۆش چیان كردووە تا ئەم ئینتیمایە لاواز بێت، بەڵام با لەناو خۆماندا بپرسین: ئەم هەستەی سەرۆك بارزانی باسی دەكات، چۆن دروست دەبێ؟ بێ گومان بە پەروەردەی نیشتمانیی دروست، كە ئەویش زۆر گرنگە حكوومەت و حزبەكان و رێكخراو و دەزگا حكوومی و ناحكوومیەكان، لەمبارەیەوە قۆڵی لێ هەڵماڵن، رەنگە درەنگ بێت بەڵام كۆتایی گەمەكەش نیە، دەبێ بیرێك لە گەڕانەوەی ئینتیما بۆ نەوەكان بكەینەوە و هەنگاوی ورد و رژدی بۆ بهاوێژین، دەبێ سوود لە ئەزموونی گەلانی هاوحاڵی خۆمان و لە عاقڵمەندانی خۆشمان وەربگرین.

چه‌ند ڕۆژێك لەمەوبەر، لە هەولێر بەشداریم لە بۆنەیەكدا كرد، تێیدا كۆنسوڵی گشتیی ویلایەتە یە‌کگرتووەکانی ئه‌مریكا، لە وتەیەكدا \بە زمانی كورردی\ سەركۆنەی هێرشه‌كه‌ی سه‌ر فڕۆكه‌خانه‌ی نێوده‌وڵه‌تیی هه‌ولێری كرد، هەڵبەتە كونسوڵی ئەمریكا دەزانێ ئینتیمای مرۆڤ بۆ زمان و نەتەوە و نیشتمانەكەی چەند گرنگە، بۆیە بە زمانی كوردی لەو شوێنەدا قسەی كرد، ئەو ویستی پێمان بڵێت: ”زمان و نەتەوە و وڵاتی ئێوە گرنگن، بۆیە من قسەی پێدەكەم و قسەی تێدا دەكەم“.

ئێستا هه‌ڵمه‌تی بانگەشە بۆ هه‌ڵبژاردنەكانی داهاتووی پەرلەمانی عێراق لە كوردستانیش دەستی پێكردووە، زۆر گرنگە كاندیدانی كورد جا لە هەر حزبێك بن، كار لەسەر هەستی ئینتیما بۆ كوردستان و مافی خەڵكی كوردستان بكەن، زۆر گرنگە كاندیدی كورد یەكێك لە كارەكانی ئەوە بێت، هیوا و ئومێد بۆ ئایندەی كوردستان لای خەڵكی كوردستان بەهێز بكات، بەڵام بەداخەوە گوێم لە هەندێ كاندیدی كورد دەبێ رێك پێچەوانەی ئەوە قسە دەكەن، ئەوانیش وەك هەندێ لە پەرلەمانتارە كوردەكانی ئەم خولەی ئێستا، بەردەوام تەپڵی بێهیواكردنی گەنجی كورد و خەڵكی كوردستان لێ دەدەن، تەنانەت بایی ئەوە لە كاری خۆیان نەگەیشتوون، كە ئەم هەڵبژاردنە بۆ پەرلەمانی عێراقە نەك بۆ هەرێمی كوردستان!