ئەم كاندیدانە سەربەخۆن یان سەر بە حەشدە لەیاسا دەرچوووەكانن؟
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
جەمال عەبدوڵا 14/09/2021

ئەم كاندیدانە سەربەخۆن یان سەر بە حەشدە لەیاسا دەرچوووەكانن؟

دوێنێ 13-9 بە كارێكی پێویست و شەخسیی خۆم، لە ھەولێرەوە چوومەوە بۆ سلێمانی، لە سەرەتای سنووری شارەوانیی سلێمانیەوە ھەتا پردی خەسرەو خاڵ، لە چەندان شوێنی جیاجیا و بە عەموودی كارەباكانی سەر جادەوە، وێنەی ھەندێك كاندیدم بۆ ھەڵبژاردنەكانی پەرلەمانی عێراق بەرچاو كەوت، بەڵام ئەمما كاندید!

چی لە دیموكراسی و ھەڵبژاردن دەكەیت، ئەگینا وەك ڕای شەخسیی خۆم، دەبوایە ئەو كاندیدانە بەردباران بكرانایە نەك وێنەكانیان بە عەموودەكانی سلێمانیەوە ھەڵبواسرایە، سەیر ئەوە بوو ئەو كاندیدانە وەك ئەوەی كەس نەیانناسێت یان نەیناسیبن، وەك (كاندیدی سەربەخۆ!) خۆیان ناساندووە. خەڵكینە من ئەم چەند پرسیارە لە ئێوە دەكەم و خۆتان دادوەر بن و بزانن ئایا ئەم بیچمانە سەربەخۆن یان سەر بە گرووپە لەیاسا دەرچووەكانی حەشدی شەعبین؟

1 - ئایا ئەو كاندیدانەی ئێستا كە پێشتریش ئەندامی پەرلەمانی عێراق بوون و لە بەغداوە ئیمزایان بۆ ھەڵتەكاندنی قەوارەی دەستووریی ھەرێمی كوردستان و داوودەزگا دەستوورییەكانی ھەرێمی كوردستان كۆ دەكردەوە، ئەوانەی دەیانگوت دەبێ بەغدا بێ گوێدانە حكوومەتی ھەرێمی كوردستان خۆی ڕاستەوخۆ مووچەی مووچەخۆرانی ھەرێم دابەش بكات، ئایا ئەمانە كاندیدی سەربەخۆن یان كاندیدی سەر بە حەشدە لەیاسا دەرچوووەكانن؟

2 - ئایا ئەو كاندیدانەی ئێستا كە پێشتریش ئەندامی پەرلەمانی عێراق بوون و لە بەغداوە و ھەر بە ھەمان نەفەس و نەغمە و عەقڵی بەعسیە سەدامیەكان، دەیانگوت دەبێ مەلەفی نەوت بە ورد و درشتیەوە و بێ گوێدانە مافە دەستوورییەكانی ھەرێمی كوردستان، ھەر ھەمووی تەسلیمی بەغدا بكرێت و ھەرێمی كوردستان ئاڵای سپیی تەسلیمبوون بەرامبەر بە بەغدا بەرز بكاتەوە، ئایا ئەم كاندیدانە سەربەخۆن یان سەر بە حەشدە لەیاسا دەرچوووەكانن؟

3 - ئایا ئەو كاندیدانەی ئێستا كە پێشتریش ئەندامی پەرلەمانی عێراق بوون و لە بەغداوە ھەرچی سووكایەتی بوو بە نەتەوە، نیشتیمان، ئاڵای كوردستان، كوردایەتی، قوربانیدانی پێشمەرگە و گشت ڕەمزەكانی كوردایەتیان كرد، ئایا ئەم كاندیدانە سەربەخۆن یان سەر بە حەشدە لەیاسا دەرچوووەكانن؟

4 - ئایا ھەزاران جار حەیف نیە لە شارێكی وەك سلێمانیدا، وێنەكانی نموونەی ئەم كاندیدانە بەسەر سەری خەڵكی سلێمانیەوە بشەكێنەوە؟ بەڵام وەك لە سەرەتای ئەم وتارەدا ئاماژەم پێ دا، چی لە ھەڵبژاردن و گەمەی دیموكراسی دەكەیت كە ئەم میكرۆبە زیانبەخشانەش لەگەڵ خۆیدا دەھێنێت؟