بۆچی مووشەك و درۆن و تی ئێن تیەكان روو لە هەولێرن؟
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
بەرهەم عەلی 12/09/2021

بۆچی مووشەك و درۆن و تی ئێن تیەكان روو لە هەولێرن؟

دوێنێ شەو (11 لەسەر 12\9\2021) دیسان هێرشێكی تیرۆریستی بە فڕۆكەی بێفڕۆكەوان (درۆن) كرایە سەر هەولێر، خۆشبەختانە پووچەڵ كرایەوە، نە زیانی هەبوو نە ئامانجی پێكا، ئەمەش حەوتەمین هێرشی مووشەكی و درۆن بوو لە دژی هەولێر لە ماوەی ساڵێكدا. چەند رۆژێكیش لەمەوبەر ئەنجوومەنی ئاسایشی هەرێمی كوردستان، لە راگەیەندراوێكی ڤیدیۆییدا، دانپێدانانی گرووپێكی دەستگیركراوی داعشی لەنێو هەولێر بڵاو كردەوە، كە بەنیاز بوون، كاری تیرۆریستی لەنێو شاری هەولێردا ئەنجام بدەن.

ماوەیەكیش لەمەوبەر، بە هەمان شێوە ئەنجوومەنی ئاسایشی هەرێمی كوردستان، لە راگەیەندراوێكی دیكەی ڤیدیۆئامێزدا، دەستگیركردنی گرووپێكی تری سەر بە رێكخراوی تیرۆریستیی داعشی ئاشكرا كرد كە لەلایەن هێزەكانی بەڕێوەبەرایەتیی دژەتیرۆری هەرێمی كوردستانەوە گیرابوون، لەنێو ئەو راگەیاندراوەدا دەقی دانپێدانانی ئەندامەكانی ئەو گرووپەی تێدابوو كە تەمای ئەوەیان بوو، پێش جەژنی قوربان، چەند كردەوەیەكی تێرۆریستی لەنێو هەولێردا ئەنجام بدەن.

خاڵی هاوبەشی هەموو ئەو هەواڵانە، شاری هەولێرە، ئەوەی سەرنجی راكێشام، پێداگریی سەركردە باڵا و ئەمنیەكانی داعش بوو لەسەر ئەوەی دەبێ ئەو هێرشە تیرۆریستییانە لەنێو (شاری هەولێر)دا ئەنجام بدرێن، لەوەش سەرنجڕاكێشتر، هەموو هێرشەكانی كە بە درۆن یان مووشەك لەلایەن میلیشا تیرۆریستیاكانەوە جێبەجێ دەكرێن، هەموویان لە دژی هەولێرن، پرسیاری گرنگ ئەوەیە: بۆچی هەموو دوژمنانی كوردستان، مەبەسەتیانە بە دەستنیشانكراوی، هێرشەكان دژی هەولێر بێت؟ لێرەدا واز لەو مێژووە دێرین و پڕ حیكایەتەی هەزاران ساڵەی هەولێر دەهێنم و باسی مێژووی دوای راپەڕینی ساڵی ١٩٩١ی ئەم شارە دەكەم تا ئێستا.

هەولێر لەوەتەی بەپێی بڕیاری سیاسیی سەركردایەتیی كوردستان و بە یاسا و دەستووریش كراوەتە پایتەختی هەرێمی كوردستان، ئیدی لەوە دەرچووە شارێكی ئاسایی بێت، تەنانەت پایتەختێكی ئاسایی نیە، بەڵكوو ئێستا ئەم شارە، پایتەختی شكۆ و هەیبەت و بوون و ئیرادەی نەك هەر كوردی باشوور بەڵكوو نزیكەی پەنجا ملیۆن كوردە، پایتەختی شكۆی هەموو كوردستانیانە بە پێكهاتە جیاوازە نەتەوەیی و ئایینی و مەزهەییبیەكانیشیەوە، هەولێر پایتەختی بەرگری لە مانەوەی قەوارەی سیاسی و دەستووریی هەرێمی كوردستانە، هەولێر پایتەختی بڕیاری سیاسیی كوردستانە.

ئەو حزبەی وەك براوەی یەكەمی هەڵبژاردن، حكوومەتی هەرێمی كوردستانی پێكهێناوە و لەو رێیەوە (بە هاوبەشیی حزبەكانی تر) حوكمی هەولێر و هەرێمی كوردستان دەكات، تۆی كورد یان كوردستانی، ئەو حزبەت خۆش بوێت یان نا، هەوداری بیت یان نەیار، دەنگی پێ بدەیت یان نا، ئەمە هیچ لەو راستیە ناگۆڕێت كە شكۆی هەولێر شكۆی تۆیە، سەركەوتنی هەولێر سەركەوتنی تۆیە، خوانەخواستە شكستی هەولێریش شكستی تۆ و نەمانی شكۆی تۆیە.

بە كورتی و بە كوردی، كوردستان بە هەموو شار و شارۆچكە و دێهاتەكانیەوە شكۆی هەموومانە، پاراستنی هەولێریش كە پایتەختی بڕیار و ئیرادەی ئەم كوردستانەیە، واتە پاراستنی شكۆی هەموومان و هەموو شارەكان و كوردستان، ئەمە هیچ پەیوەندیی بەوەوە نیە كام حزب لە هەولێر زۆرینەیە و خاوەن دەسەڵاتە. خوا نەكردە هەولێر لە هەر رووداوێكدا بكەوێت، هیوای ئازادی و سەربەستی، لە هەر چوار پارچەی كوردستان دەكەوێت و دەوەرێت، ئیدی ساڵانێكی زۆری دەوێ تا شین ببێتەوە. پێچەوانەكەشی راستە، هەر بڕیارێكی سیاسیی گرنگ لە بەرژوەندیی كوردستانیان بدرێت، دیسان دەبێ لە هەولێرەوە بێت.

ئەمەی باسی دەكەم، لە كەمكردنەوەی پێگەی هیچ شارێكی كوردستان نیە، خوای گەورە هەموو شار و شارۆچكە و گوندەكانی كوردستان لە شەڕ و بەڵا بەدوور بگرێت، هەر شارێك گرنگی و بایەخی خۆیی هەیە و خەڵكی هەموو شار و شارۆچكە و دێهاتەكانی كوردستان، هەریەكەیان بە رادەی خۆیان، رووبەڕووی ستەم و زوڵم و چەوساندنەوەی دوژمنان و داگیركەرانی كوردستان بوونەتەوە، هەمووشیان پێكەوە خەباتیان بۆ ئازادی كردووە و قوربانیی زۆریشیان داوە، پێشمەرگە و رۆڵەی بەوەفا و گیان لەسەردەست لە هەموو شوێنێكی كوردستان هەبوون و هەن، داهێنەران لە سنووری هەموو شارەكاندا هەبوون و هەن.

زۆرینەی دڵسۆز لە هەموو شوێنێكدا هەن و كەمینەی ناپاك لە كوردستانیش لە هەموو شوێنێكی كوردستاندا هەبوون و هەن، پاراستنی هەموو گوند و شار و شارۆچكەیەكی كوردستانیش، وەك یەك گرنگن، بەڵام من باسی پێگەی سیاسیی هەولێر دەكەم، كە پێگەیەكی یەكجار بەبایەخ و هەستیارە، بۆیە هەموو نەیارانی كورد و كوردستان، كە دەیانەوێ زەبرێك لە كوردستان و بوونی كورد و پێگەی كورد و كوردستانیان بدەن، هەوڵ دەدەن زەبرێكی كوشندە لە هەولێر بدەن.

بینیتان لە شەڕی ناوخۆی نەوەتەكانی سەدەی رابردوودا، چۆن دەوڵەتانی داگیركەری كوردستان هەموو هەوڵێكیان دەدا شەڕ لە كۆڵانەكانی هەولێریشدا بێت، بینیتان كە لە هەولێر و لەنێو هۆڵی پەرلەماندا رێككەتننامەی ئاشتی لەنێوان یەكێتی و پارتیدا كرا، ئیدی چۆن شەڕی براكوژی تەحریم و تەجریم كرا، بینیتان رێكخراوە تیرۆریستیەكانی (قاعیدە و ئەنساڕی سوننە و ئەنساڕی ئیسلام و پاشكۆكانیان) زۆربەی هەرە زۆری هێرشە تیرۆریستی و خۆكوژییەكانیان دژی هەولێر بوو، بینیتان داعش چەند هەوڵی دا هەولێر داگیر بكات و پێشمەرگە قارەمانەكانی كوردستان لووتیان شكاندن.

بینیتان دوای خیانەتی ١٦ی ئۆكتۆبەریش چۆن حەشد و پاشكۆكانی ویستیان هەولێر داگیر بكەن و دیسان كەللەی پووتیان لەلایەن پێشمەرگەی كوردستانەوە تەپێنرا، ئێستاش وا دەبینن هێرشە مووشەكیەكان و فڕۆكە درۆنە تی ئێن تی لێبەستراوەكانی میلیشیا تیرۆریستیاكانییش هەر لە دژی هەولێرە، پیلانە گڵاوەكانی ئێستای داعشیش هەر بۆ زیانگەیاندنە بە هەولێر.

هەولێر جیا لەوەی شاری دێرینی پڕ لە دیرۆك و چیرۆكی كوردستانە، جیا لەوەی پایتەختە و لەخۆگری دەزگاكانی سەرۆكایەتیی هەرێمی كوردستان و سەرۆكایەتیی پەرلەمانی كوردستان و سەرۆكایەتیی ئەنجوومەنی وەزیرانە، جیا لەوەی شاری كونوسڵخانە و نوێنەرایەتە دیپلۆماسیەكانی دەوڵەتانە، جیا لەوەی شارێكی گەورە و پێشكەوتوو و جوان و گەشاوەی كوردستانە، جیا لەوەی جوانترین و پێشكەوتووترین شاری عێراقە لەڕووی ئاوەدانكارییەوە، جیا لەوەی یەكێكە لە شارە پێشكەوتووەكانی ناوچەكە، جیا لەوەی شاری هەموانە و پایتەختی كوردستانیانە و رووگەی گەشتیاران و ئامێزی پڕ لە سۆز و میهرەبانی و رێزی میوانانە، جیا لەوەی شاری فەرشی سوور و پێشوازی لە سەركردە باڵاكانی جیهانە، شاری ئیرادە و بڕیارە، شاری بەرگری لە قەوارەی هەرێمی كوردستانە، بۆیە هەمیشە ئامانجی یەكەمی دوژمنان و نەیاران و داگیركەرانە.

ئەوەی داعش دەیكات لە دژی هەولێر، ئەوەی میلیشیاكانی نێو حەشد دەیكەن دژی هەولێر، ئەو موئامەرە ئیقلیمییانەی كران و دەكرێن و ئێستاش زۆری تر لەئارادان لە دژی هەولێر، ئەو داوودەزگا میدیاییە عەرەبی و توركی و فارسییانەی خراونەتە گەڕ دژی هەولێر، ئەو ماشێنە میدیاییە كوردیەی ساڵانێكی زۆرە بە پارەی خەڵكی كوردستان، لەلایەن هەندێ حزبی ئیسلامی و حزبی بەناو ئۆپۆزسیۆن و پۆپۆلیستەوە دژی هەولێر بەردەوام لەئارادان، ئەوەی لە ساڵانی رابردووەوە تا ئێستاش هەندێ لە پەرلەمانتارە كوردەكانی بەغدا كە خۆیان فرۆشتووە، دژی پێگەی هەولێر دەیڵێن و دەیكەن، دژی حزبێكی دیاریكراو نیە، بەڵكوو دەیانەوێ هەولێر بڕووخێنن و ملكەچ و رادەستی بكەن و سەری پێ بچەمێنن، ئەمەش خەونی گڵاوی هەموو دوژمنان و داگیركەرانی كوردستانە، بۆیە ئەو هێزەی یان ئەو حزبەی بەرگری لە شكۆی هەولێری پایتەخت دەكات، بەرگری لە شكۆی هەموو كورد و كوردستان دەكات.

كەركووك و سلێمانی و هەولێر و هەڵەبجە و دهۆك، هەموویان وەك یەك خۆشەویستن، بەڵام دوژمنان و نەیارانی كورد و كوردستان، دەیانەوێ لەڕێی شكاندنی شكۆی هەولێرەوە، شكۆی هەموو شارەكانی كوردستانی باشوور بشكێنن، بۆیە هەولێر پارێزراو بێت كوردستان پارێزراو دەبێ.