د. هیوا تاهیر، كاندیدی پارتی لە خورماتوو: كار دەكەین تا ئومێد بۆ خەڵكی خورماتوو دەگەڕێنینەوە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

د. هیوا تاهیر، كاندیدی پارتی لە خورماتوو: كار دەكەین تا ئومێد بۆ خەڵكی خورماتوو دەگەڕێنینەوە

د. هیوا تاهیر، كاندیدی ژمارە 44ی پارتی لە شاری خورماتوو، لە دیمانەیەكی (باسنیوز)دا ڕایدەگەیەنێت: ''ئەگەر دەربچم بۆ پەرلەمان، دەبمە نوێنەری ڕاستەقینەی خەڵكی خورماتوو''..؟ دەشڵێت: "خەڵكی خورماتوو باجی گەورەیان داوە و پێویستە قەرەبوو بكرێنەوە".

سەرەتا لەبارەی ئەوەی کە هۆكار و ئامانجی خۆكاندیدكردنیان بۆچی دەگەڕێتەوە، د. هیوا تاهیر ڕایگەیاند: ''بڕیارم دا خۆم كاندید بكەم تاکوو ببمە نوێنەری خەڵكی خورماتوو لە پەرلەمانی عێراق، ئەگەر دەربچم بۆ پەرلەمان، دەبمە نوێنەری ڕاستەقینەی خەڵكی خورماتوو، چونكە زۆر گرنگە نوێنەرمان لە بەغدا هەبێت بۆ ئەوەی بەرگری لە خەڵكی ناوچەكە بكات بۆ بەدەستهێنانی مافەكانیان''.

لێمان پرسی: خەڵكێكی زۆری خورماتوو لە ڕووداوەكانی 16ی ئۆكتۆبەری 2017 لە هەموو ڕوویەكەوە باجی گەورەیان دا، ئەگەر ببیتە نوێنەری ئەو خەڵكە دەتوانێت چییان بۆ بكەیت؟ ئەو كاندیدەی پارتی لە خورماتوو ئاماژەی بەوە دا: ''سەرەتا بەرنامەی ئێمە ئەوە دەبێ كە هیوا و ئومێد بۆ خەڵكی خورماتوو بگەڕێنینەوە، چونكە خەڵكی خورماتوو دوای ڕووداوەكانی 16ی ئۆكتۆبەری 2017 لە هەموو شتێك بێئومێد بوون، ئەو كاربەدەستانەی كە خۆیان بە بەرپرسی خورماتوو زانیوە، هیچی ئەوتۆیان نەكردووە، بۆیە كار و پرۆژەی ئێمە ئەوە دەبێت ئەو ئاوارانەی خەڵكی خورماتوون و هێشتا لە ناوچە جیاجیاكانی هەرێمی كوردستان ئاوارەن، یارمەتییان بدەین و كارئاسانییان بۆ بكەین''. 

د. هیوا تاهیر ئەوەیشی خستە ڕوو: ''هێشتا بەشێك لە گەنجانی خوێنگەرممان كە لە 16ی ئۆكتۆبەری 2017 ئاوارە بوون، ناتوانن بگەڕێنەوە بۆ خورماتوو و بەبێ هیچ هۆیەك لە خورماتوو داواكراون. لەڕێگەی حكوومەتیشەوە كار دەكەم بۆ گەیاندنی زۆرترین پرۆژەی خزمەتگوزاری بە خورماتوو، چونکە شارەكە لەو ڕووەوە زۆر فەرامۆش كراوە و پێویستە ئاوڕی لێ بدرێتەوە''.

سەبارەت بەو هاووڵاتییە كوردانەی لە سنووری خورماتوو چەوسێندراونەتەوە و چی بكرێت بۆ ئەوەی كورد مافەكانی بەدەست بهێنێتەوە“ ئەو كاندیدەی پارتی گوتی: ''دەبێ بە بەرنامە كار بكرێت بۆ ئەوەی كورد وەك نەتەوە جارێكی تر لە خورماتوو هەڵبستێتەوە، ئەوەش دیارە کە دەبێت لە بەغداوە كاری لەسەر بكەین و گرنگە خەڵكی خورماتوو قەرەبووی ماددی و مەعنەوی بكرێنەوە، چونكە باجی گەورەیان داوە، ئەوەش تەنیا بەهۆی كوردبوونیانەوە بووە''.

لە كۆتاییدا د. هیوا تاهیر ئەوەی خستە ڕوو: ''خەڵكێكی زۆر ڕۆژانە پەیوەندیمان پێوە دەكەن كە دەنگمان پێ دەدەن، بەڵام بەداخەوە لەلایەن هەندێ كەسی ترەوە دەستیان كردووە بە چاوسووركردنەوە و پێدانی بەڵێنی درۆ بە خەڵك و خەڵكێك هەیە دژایەتیمان دەكەن، بەڵام جەماوەرێكی زۆرمان لەگەڵە و دەبینە نوێنەری ڕاستەقینەی خەڵك و دۆخی خورماتوو زۆر دەگۆڕێت''.

د. هیوا مەلا تاهیر، خەڵكی شاری خورماتووە و دكتۆرای لە زانستی قورئان هەیە و شارەزایەكی باشی زمانی عەرەبییە، باوكیشی مەلایەكی بەناوبانگی خەڵكی خورماتووە بووە.