ئەسەدیی نوێ!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

لیبرالیزمی نوێم بیست و بینی، سیستەمی جیھانیی نوێم بیست و بینی، دراوی نوێی ئیلەكترۆنیم بیست و بینی، وا ئێستاش لەناو كوردی خۆماندا ئەسەدیەكی نوێ دەبیستم و دەبینم. سەرەڕای ئەوەی كە ئەسەدیە كۆنەكە ڕەگوڕیشەی خۆی بردەوە سەر بنەماڵەی ئەسەدی و بەمەش ئەوەی كە پێشتر بەعس بە گشتی لە كورد و بەتایبەتی لە كوردی كەركووكی دەویست (تصحيح القومية) بوو، واتە ئینتیمای نەتەوەیی خۆیان ڕاست بكەنەوە! و بە ئارەزووی خۆیان، خۆیان لە كوردەوە بكەن بە عەرەب.

ئەو ئەسەدیە دوای ڕووخاندنی حوكمی بەعسیش بە ڕاگەیاندنی ئەسەدییبوونی خۆی، خۆی كرد بە عەرەب، سەرەڕای ئەوەی كە سروودی (موطني) دەگوتەوە، سەرەڕای ئەوەی كە لە بەغداوە ھیچ تۆمەتێكی خراپ نەما نەیداتە پاڵ كوردستان و حكوومەتی ھەرێمی كوردستان و سەرچاوەی ھەموو كێشەكانی عێراقی بۆ ھەرێمی كوردستان دەگەڕاندەوە، سەرەڕای ئەوەی كە باوەشی بۆ ئەبوو فەدەكی حەشدی شەعبی دەكردەوە، كەچی ھیچ كام لەوانە فریای نەكەوتن و لای زۆرینەی عەرەب و زۆرینەی نزیك بە تەواوی كورد، نەفرەتی لێ كراو تەنانەت حزبەكەی خۆیشی لە كاندیدبوونەوەی بۆ ئەندامێتیی پەرلەمانی عێراق، نووسراوی فەرمیی دەركرد و گوتی ئەوە كاندیدی ئێمە نیە و نایناسین!

كەچی ئێستا ئەسەدیەكی تر لەناو سەركردایەتیی یەكێك لە حزبە ئیسلامیەكانی كوردستان پەیدا بووە و بە ھەمان نەفەسی ئەسەدیە كۆنەكە لە كەناڵێكی عەرەبیی عێراقەوە كەوتووەتە سەر ڕێچكەی ئەسەدیە كۆنەكە و دەڵێت: ”ھەموو دەروازە سنوورییەكانی ھەرێمی كوردستان بوون بە دەروازەی گەندەڵی و ئەمەش یەكێكە لەو ھۆكارانەی كە عێراق بەگشتی لە بواری كشتوكاڵ و پیشەسازیدا پێش ناكەوێت“، واتە دەسەڵاتدارانی ھەرێمی كوردستان ناھێڵن عێراق لە بوارەكانی كشتوكاڵی و پیشەسازیدا پێش بكەوێت! كەواتە بە گوێرەی قسەكانی ئەم ئەسەدیە نوێیە:

1- ئەگەر ھەرێمی كوردستان نەبێت، لە بەسراوە ھەتا بەغدا و لە ماوەی تەنیا یەك ساڵدا، سەدان ملیۆن دارخورمای عێراق دەبووژێتەوە و ئیتر تەنیا بە داھاتی فرۆشتنی خورما بە دنیای دەرەوە مووچەی گشت مووچەخۆرانی عێراق دابین دەكرێت!

2- ئەگەر ھەرێمی كوردستان نەبێت، شوێن نامێنێت لە عێراقدا پرتەقاڵ و نارنج و لیمۆی باقووبەی تیا ھەڵبگیرێت!

3- ئەگەر ھەرێمی كوردستان نەبێت، ماسییەكانی ئەبوو نەواسی بەغدا لە ماسیەكانی بەحری چین و ئۆقیانووسی ئەتڵەسی زۆرتر دەبن!

4- ئەگەر ھەرێمی كوردستان نەبێت، تەنیا لە پیشەسازیی دروستكردنی ئۆتۆمبێلدا، ئێستا عێراق دەبووە خاوەنی چەندین كۆمپانیای خۆماڵیی دروستكردنی ئۆتۆمبێل و ئۆتۆمبێلەكانی عێراق زۆر لە پێش بی ئێم و لێكزس و فۆرد و تۆیوتاوە دەبوون!

5- ئەگەر ھەرێمی كوردستان نەبێت، لە پیشەسازیی سەربازییشدا عێراق دەیتوانی جۆرێك لە فڕۆكەی سەربازی دروست بكات كە زۆر لەپێش فڕۆكەی ئێف 35ی ئەمریكیەوە بێت و ئێستا عێراق خاوەنی چەندین كەشتیگەلی فڕۆكەھەڵگر و ژێردەریایی دەبوو!

6- ئەگەر ھەرێمی كوردستان نەبێت، ئێستا عێراق ھەر بە توانای خۆی سێیەم جاری بوو تاقیكردنەوەی ئەتۆمیی كردبوو!

7- ئەگەر ھەرێمی كوردستان نەبێت، ئێستا لەو بەغدایە بینا و باڵاخانەی ھەوربڕی وەھا دروست كرابوو كە بورجی خەلیفە لە دوبەی لەچاویدا خانوویەكی دووقاتی باداوەی ھەولێر بوو!

8- ئەگەر ھەرێمی كوردستان نەبوایە، ئێستا عێراق ھەر بە توانای خۆی زیاتر لە ھەزار فڕۆكەی دروست كردبوو كە زۆر لە فڕۆكەكانی بوینگ و ئەیرباس پێشكەوتووتر دەبوون و وڵاتانی دنیا ڕێزیان دەگرت بۆ كڕینی ئەم فڕۆكە مەدەنیانەی عێراق!

نازانم و ھەرچەند دەكەم و دەگەڕرێم ئەو لوغزەم بۆ نادۆزرێتەوە كە بۆچی بەردەوام بەشێك لە كورد سوود لە تاقیكردنەوەكانی مێژووی پێش خۆیان وەرناگرن؟ نازانم و ھەرچەند دەكەم و دەگەڕێم، ئەو لوغزەم بۆ نادۆزرێتەوە كە تۆ پێش خۆت چارەنووسی ئەسەدیە كۆنەكەت بینیبێ، بۆچی ئێستا دەچیت بە ھەمان ڕێچكەی ئەسەدیە كۆنەكەدا دەڕۆیت؟