نەجوە حەمید كاكەیی، كاندیدی پارتی لە كەركووك: كەركووكییەكان پێویستییان بە نوێنەری راستەقینەیە لە پەرلەمانی عێراق
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

نەجوە حەمید كاكەیی، كاندیدی پارتی لە كەركووك: كەركووكییەكان پێویستییان بە نوێنەری راستەقینەیە لە پەرلەمانی عێراق

"رەوشی كاكەییەكان لە سنووری كەركووك پێویستی بە ئاوڕدانەوەی جددی هەیە"

 لە دیمانەیەكی (باسنیوز)دا، نەجوە حەمید كاكەیی، كاندیدی پارتی دیموكراتی كوردستان، ژمارە 52 لە بازنەی دووی كەركووك بۆ هەڵبژاردنی پێشوەختەی پەرلەمانی عێراق، ڕایدەگەیەنێت كە لە پەرلەمانی عێراق دەبنە داكۆكیكارێكی دڵسۆز و سەرسەختی كەركووكییەكان بۆ بەدەستهێنانی مافەكانیان. دەشڵێت، دۆخی گوند و ناوچە كاكەییەكانی سنووری شارۆچكەی داقووق نالەبارە و بەهۆیەوە ژمارەیەك گوند چۆڵ كراون و ڕەوشی كاكەییەكان لە ناوچەكە پێویستی بە ئاوڕدانەوەیەكی جددی هەیە.

نەجوە كاكەیی ئاماژەی بەوە دا: "من بە ژمارە 52 لە بازنەی دووی كەركووك كاندیدی پارتی دیموكراتی كوردستانم. بازنەی دووی هەڵبژاردن لە كەركووك بریتییە لەو شوێن و ناوچانەی کە گەڕەكەكانی سەربازی و ئەسرا و مەفقوودین و قادسییەی دوو و بەشێك لە موسەڵڵا و عەرەفە و تسعین و ڕێگەی بەغدا و دۆمیز و شارەدێكانی تازە و ڕەشاد و پردێ و شارۆچكەی داقووق دەگرێتەوە''.

لەبارەی هۆكاری خۆكاندیدكردنەكەی، نەجوە كاكەیی گوتی: "بە شێوەیەكی گشتی خودا یار بێت و سەر بكەوم بۆ پەرلەمان، دەبمە داكۆكیكار و پارێزەرێكی بوێر و سەرسەختی كەركووكییەكان لە پەرلەمان بۆ بەدەستهێنانی مافەكانیان''.

لە دوای ڕووداوەكانی 16ی ئۆكتۆبەری 2017ـوە پرۆسەیەكی گەورەی تەعریب لە پارێزگای کەرکووک دەستی پێكردووەتەوە، دەبارەی ئەوەی کە چی بكرێت بۆ ڕاگرتنی ئەو پرۆسەیە، نەجوە كاكەیی گوتی: ''بێگومان دەبێ لە بەغداوە كار بكرێت بۆ ڕاگرتنی پرۆسەی تەعریب و جێبەجێكردنی ماددەی 140ی دەستووری هەمیشەیی عێراق، ئەگەر خەڵك متمانە بە ئێمە بكات ئەوا ئێمە هەوڵەكانمان چڕ دەكەینەوە بۆ نەهێشتنی تەعریب لە پارێزگاكە و كار دەكەین بۆ گەیاندنی خزمەتگوزاری بۆ شارەكە و بەدەستهێنانی مافەكانی ئافرەتان و لاوان و چین و توێژەكانی تریش''.

سەبارەت بە دۆخی گوند و ناوچە كاكەییەكانی سنووری قەزای داقووق كە نزیكەی چوار ساڵە دۆخیان لە هەموو ڕوویەكەوە نالەبارە، ئەو كاندیدەی پارتی ئاماژەی بەوە دا: "بەداخەوە ڕەوشی ئەمنیی سنووری گوندە كاكەییەكانی داقووق خراپە، ئەوەش بووەتە هۆی ئەوەی كە ژمارەیەك گوندی كاكەیی چۆڵی بكەن و ژمارەیەك گوندی تریش تاكوتەرا ماڵیان تیدا ماوە و چەند قوتابخانەیەكی كوردی لە گوندەكان هەبوو، ئێستا ئەو قوتابخانانەش داخراون. هۆكاری دۆخی نالەباری ئەو گوندانەش بۆ جموجۆڵی داعش و خراپیی دۆخی ئەمنیی ناوچەكە دەگەڕێتەوە و ئاسایش لە ناوچەكە دابین ناكرێت و مەترسی لەسەر ژیانی خەڵك هەیە، بۆیە ئاوارە بوون. هەروەها خزمەتگوزاری لەو گوندانەدا نییە و هەندێ گوند هه‌ر مۆلیدەشیان تێدا نییە كە خەڵك بتوانن تێیاندا بژین. بۆیە لە ڕاستیدا ڕەوشی كاكەییەكان لە ناوچەكەدا پێویستی بە ئاوەڕدانەوەیەكی جددی هەیە''.

پارتی دیموكراتی كوردستان بۆ هەڵبژاردنی پێشوەختەی پەرلەمانی عێراق لە پارێزگای كەركووك بە دوو كاندید چووەتە كێبڕكێی ئەو هەڵبژاردنەوە، كاندیدەكانیشی بریتین لە شاخەوان عەبدوڵڵا لە بازنەی یەكی هەڵبژاردنی كەركووك و نەجوە حەمید كاكەیی، لە بازنەی دووی هەڵبژاردنی كەركووك.

پارتی لە كەركووك دەستی بە بانگەشەی هەڵبژاردن كردووە و چاوەڕوان دەكرێت لە ڕۆژانی ئایندەدا بانگەشەكانی بۆ سەركەوتنی كاندیدەكانی زیاتر بكات.