ئەمساڵ هەولێر زۆرترین بەرهەمی هەنگوینی هەبووە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

ئەمساڵ هەولێر زۆرترین بەرهەمی هەنگوینی هەبووە

كۆمپانیایەكی ئیماراتی هەنگوینی كوردستان دەكڕێتەوە

 سەرۆكی تۆڕی هەنگەوانانی كوردستان، ئاماژە بەوە دەدات کە بەهۆی كەشوهەواوە، ئەمساڵ كەمترین بەرهەمی هەنگوین لە دهۆك و سلێمانی بووە، هەولێریش زۆرترین بەرهەمی هەبووە، لەگەڵ ئەوەش بەرهەمی ئەمساڵی هەنگوین به‌راورد به‌ ساڵی پار، لە هەرێمی كوردستان زۆر باش بووە، كە نزیكەی ٧٠٠ تۆن بووە، بەڵام ساڵی ڕابردوو تەنیا ١٠٠ تۆن بەرهەم هاتووە.

عارف شێروانی، سەرۆكی تۆڕی هەنگەوانانی كوردستان، بۆ (باسنیوز)، هۆكاری كەمیی بەرهەم لە پارێزگاكانی دهۆك و سلێمانی ڕوون دەكاتەوە و هۆكارەكەی بۆ كەشوهەوا دەگەڕێنێتەوە و دەڵێت، سەرباری ئەوەش شاری هەولێر چیای بەرزتری لە ئاستی ڕووی دەریاوە هەیە، كە ئەمە یەكێكە لە هۆكارەكانی زۆریی بەرهەم و ڕێژەی گژوگیای بەسوود بۆ هەنگ لەو چیایانە زۆرە کە ساڵانە بە شێوەی خۆرسك دەڕوێن، ”هەر ساڵێك دەڤەری هەولێر بەهارەكەی بارانی زۆر بێت، كوێستانەكان بۆ هەنگ باش نابن، واتا ئەگەر بەهاران باران كەم بێت لە دەڤەری هەولێر، بەرهەمی هەنگوین زۆر باش دەبێت، بەڵام ئەمە پێچەوانەی سلێمانی و دهۆكە، باران لە بەهاران كەم بێت، بەرهەمیان كەم دەبێت، چونكە زۆربەی هەنگەكانی ئەو دوو پارێزگایە لە دەشتەكانن، هەرچی هەنگی ناو چیاكانیشە وەك ناوچەی كانی ماسی و چیای گارە، بەهۆی شەڕی پەكەكە و توركیاوە، هەنگەوانان نەیانتوانی ڕووی تێ بكەن و هەمووی لە دەشت مانەوە، بارانی بەهاریش كەم بوو، بۆیە ئاستی بەرهەم زۆر خراپ بوو“.

سەرۆكی تۆڕی هەنگەوانانی كوردستان، كە خۆیشی هەنگەوانە، ئاماژە بە ڕێژەی بەرهەمی پارێزگاكانی هەرێمی كوردستان دەدات و دەڵێت: "هەولێر بەرزترین ئاستی بەرهەمی تۆمار كردووە، کە ٥٠٠ تۆنە، سلێمانی ١٥٠ تۆنە و دهۆك تەنیا ٥٠ تۆنە، لەگەڵ ئەوەش بەرهەمی ئەمساڵ لە پار باشتر بووە'' و دەشڵێت: ”پار بەرهەم هەر نەبوو، بە هەموو هەرێمی كوردستان تەنیا ١٠٠ تۆن هەنگوین بەرهەم هاتبوو، ئەمساڵ ٧٠٠ تۆن هەنگوین بەرهەم هاتووە، کە زۆربەی بەرهەمەکەیشی لە پارێزگای هەولێرە“.

عارف شێروانی، ئەوەش دەخاتە ڕوو، كە بەشی زۆری ئەو هەنگوینەی لە كوردستان بەرهەم دێت، هەناردەی وڵاتانی دەرەوە دەكرێت، بەتایبەتی وڵاتی ئیماڕات، كە لە ڕێگەی كۆمپانیایەكی تایبەتی ئەو وڵاتەوە هەنگوینەكانی كوردستان دەبەن، ”ئەوانە هەنگوینی بەمواسەفاتیان دەوێت، ئەو مواسەفاتەش بە زیادەوە لە هەنگوینی كوێستانەكانی كوردستاندا هەیە و ساڵ بە ساڵ داواكاری لەسەر هەنگوینی كوردستان زیاد دەبێت و بە دنیا دەناسرێت. بۆیە پێ دەچێت ئەمساڵ بەرهەمێكی زۆر هەناردە بكرێت. پار بەهۆی كەمیی بەرهەمەوە هەناردە كەم بوو، بەڵام ئەمساڵ تەنیا ئەو كۆمپانیا ئیماڕاتییە تا ئێستا ٥١ تۆنی كڕیوە و بۆ ئیماراتی ناردووە و بەردەوامیشە لەسەر كڕین“.

 گلەیی ئەوەش دەكات کە هاووڵاتییانی خۆمان هەنگوینی چینی كه‌ لە سعوودیە لە قوتوو نراوە، بەكار دەهێنن، كە زۆر جار ماددەی ژەهراویی تێدایە و ”كوالێتییەکەی لەژێر سفرە'' و دەستكاریی هەموو شتێكی كراوە، بۆ ئەوەی نەیبەستێت و بلووری نەبێت. هەنگوینی چینی و سعوودی و ئێرانی نایبەستێت، كەچی هەنگوینی ئەسڵی دەیبەستێت و ڕێژەی شێی ١٦،٧٩یە، ئەوەی بلووری نەبێت، ئەو شێیەی لێ وەرگیراوە، ”خەڵكیش چاویان لە هەرزانییە، بەڵام هەنگوینی خۆمان، نرخەكەی باشە لەچاو كوالێتییەكە بەرزەكەی، هەنگوینی پاڵاوتە، كە زۆر باشە و لە هەمووان هەرزانترە، نرخی لە نێوان ٣٥ بۆ ٤٠ هەزار دینارە، هەنگوینی خەلیف، كە هەنگەكە مێوەكەی خۆی چاك كردبێت، نرخی لە نێوان ٦٥ بۆ ٧٠ هەزار دینارە، جۆرێكی دیكە هەیە كە هەر هەنگوینی شەمێیە، بەڵام هەنگەوان خۆی مێوی بۆ داناوە، ئەویش نرخی لە نێوان ٥٠ بۆ ٦٠ هەزار دینارە.

دەربارەی پشتگیریی حكوومەتی هەرێمی كوردستان بۆ هەنگەوانان، ئاماژە بەوە دەكات كە ئەو شوێنانەی هەنگەوان ڕووی تێ دەكەن، دەستی حكوومەتی هەرێمی ناگاتێ، چونكە یان ناوچە شاخاوییە دوورەدەستەكانە، یان ئەو شوێنانەن كە پەكەكە داگیری كردوون، یان لەژێر فشاری تۆپباران و فرۆكەكانی تورکیادایە، بۆیە لەژێر كۆنتڕۆڵی حكوومەتدا نییە.

No description available.

No description available.

No description available.