ئاو، ئهو شله سهیر و سەرنجبەرەیە كە له ههر شوێنێكدا خۆی بدۆزێتهوه، بەپێی پانتایی و قەبارەی شوێنەكە، جێ بۆ خۆی دەکاتەوە. پارتی دیموكراتی كوردستانیش، وەک ئاو وایە له ههر جێ و شوێنێكدا خۆی ببینێتەوە، بوونی خۆی دەسەلمێنێ و هاوكات رێز لەو فۆرم و فەزایەش دەگرێ، ههر ئهوهشه وای كردووه كه ئهم حزبه مهزنه، لای زۆرینەی خەڵكی كوردستان و نەخاسمە لەو شوێنانەی کە خۆی تێیدا باڵادەستە و دەرفەتی خزمەتكردنی زیاترە، حزبێكی قبووڵكراو و رێزلێگیراوە و خاوەن ئەندام و لایەنگر و هەوادار و دەنگدەری بێشومارە.
دهبینین پارتی دیموکراتی کوردستان، لەم ناوچە ئاڵۆزەی دونیادا، لانەیەكی ئارامە بۆ نهتهوه جیاجیاكان، پێكهاتە و پێڕەوكارانی ئایین و ئایینزا جیاوازەكان، رۆشنبیرەكان و كاسبكاران، خوێندەوار و نەخوێندەوارانیش لە پارتیدا خۆیان دەبیننەوە، هۆز و عهشیرهتە جیاوازەكانی هەموو ناوچەكانی كوردستان لە پارتیدا هەن، بە جارێ پیاوانی ئایینی و هەروەها خەڵكانی عەلمانییش لەو حزبەدا هەن، هەرزەكار و گەنج و پیر، ژن و پیاو و كچ و كوڕ، هەموویان لەنێو پارتیدا هەم جێیان هەیە و هەم رێزلێگیراون، بێگومان بەدرێژایی مێژووی ٧٥ ساڵەی، ئەم حزبە هەر وا بووە.
ئهم خهسڵەتە تایبەتەش لە هزر و دید و روانگەی بارزانیی رابەر و دامەزرێنەریەوە وەك میراتێكی بەرز و باڵا بۆی ماوەتەوە، ئەمەش تەنیا لەسەر ئاستی ناوخۆی كوردستان نیە، دنیای دهرهوه و گهوره سیاسهتمهدارانی جیهان و دیبلۆماتكارانیش باش لهوه حاڵی بوون كه پارتی دیموكراتی كوردستان له بەرگی حزبێکی قاوغ لۆكاڵیی تایبەت بە هەرێمی كوردستاندا تەماشا نەكەن، بەڵكوو وەك تاكە حزب لە عێراق و هەرێمی كوردستاندا، كە دیدی دەوڵەتداری و ستراتیجی تایبەتی بۆ ئایندەی ئەم ناوچەیە هەیە، سەیری دەكەن. ئاخر پارتی حزبێكە بە حیكمەتی سەرۆكەكەی سەرۆك مەسعود بارزانی، لە كایەی سیاسییدا، هەم ورد دەبینێ و هەم دوور دەبینێ، كە بەداخەوە ئەمەیان لە حزبەكانی تری عێراق و كوردستاندا نابینرێت.
لهم ههرێمی كوردستانەی ئێمهدا، پایتهخت ههولێره و له چهند ڕۆژی رابردوودا رهنگ و روخساری پایتەختی دەوڵەتێكی پێشكەوتووی گرتبوو، هەر لەو رۆژانە دەچوو كە قەداسەتی پاپای ڤاتیكان سەردانی هەولێری كرد، لەم رۆژانەشدا كاتێ پرۆتۆكۆلی پڕ شكۆ و بێ كەموكوڕی و ڕێك و دروستی پێشوازیكردن لە ماكرۆنی سەرۆكی فەرەنسامان بینی، هەولێر هەر وەها هاتە پێش چاو. بەشبەحاڵی خۆم، هەم لە سەردانەكەی پاپای ڤاتیكان و تەواوی بەرنامەی گەشتەكەی، هەم لە سەرادانەكەی ئەم رۆژانەی سەرۆك ماكرۆن، بەراوردی پرۆتۆكۆلی پێشوازیم كرد لەنێوان عێراق و هەرێمی كوردستاندا، یان لەنێوان بەغدا و هەولێردا، بینیم جیاوازییەكە یەكجار زۆر بوو، دیسان لە ناخەوە پرسیارە پڕخەمەكەم لە خۆم كردەوە: ئاخر گوناح نیە ئەوان دەوڵەت بن و ئێمە هەرێم؟
كە سەرۆك ماكرۆن بەڕێوە بوو، بینیمان له درهنگانێكی شهودا پیره قهڵای هەولێر بە رۆشنایی رەنگاورەنگ كرابووە پهرچهمی فهرهنسا، ریزبەستنی نوێنەرانی نهتهوه و ئایین و پێكهاته جیاوازەكانی كوردستان لە فڕۆكەخانە بۆ پێشوازی لە ماكرۆن، وهك سیمبولی نەریت و كولتووری پێكهوهژیان و یهكدی قبووڵكردن به پۆشاكی رهسهنی خۆیانهوه، دیمەنێكی سەرنجڕاكێش بوو.
دیمەنی پاوهش پیاكردنە گهرمهكانی سهرۆكی فەرەنسا، لەگەڵ هەریەكە لە بەڕێزان سهرۆك بارزانی و كاك نێچیرڤان بارزانی سەرۆكی هەرێم و كاك مەسرور بارزانی سەرۆك وەزیرانی كوردستان، میدیا جیهانیهكانی تهنیبوو، ئیتیكی جوانی سەرۆك ماكرۆنیش كە دەستی خاتوو رێواز فایەقی سەرۆكی پەرلەمانی كوردستانی ماچ كرد، هێندەی تر رێوڕەسمی پێشوازیی جوانتر كرد.
ئهم ههموو دیمەنانە و شتی زۆر جوانتر و بەشكۆتریش لە هەولێر بەڕێوە چوون، هەولێری پایتەختی هەرێمی كوردستان، ئەو هەولێرەی پارتی دیموكراتی كوردستان بە شێوەیەكی سەرەكی ئیدارەی دەدا، ئەو پارتیەی كە هەندێ كەس ئەمڕۆ پێی دەڵێن: ”حزبەكەی ٣١ی ئاب!“ ئەو ٣١ی ئابەی ئەم ئەنجامە باشانەی هەبوو، سهیر لهوهدایه ئەوانەی ئەمڕۆ بە ٣١ی ئاب دەڵێن خیانەت و بە پارتی دەڵێن خائین! خۆیان نە بەهرەدارن بەم شكۆیە، نە دەزانن فەرشی سوور چیە، نە دەیانەوێ لە بایەخی هاتنی سەرۆكی وڵاتێكی زلهێز و كاریگەر تێبگەن، نە خۆشحاڵن بە هیچ سەركەوتنێكی كوردستان، ئەوان تەنیا خەریكی خۆبەستن و دەمانچە لەقەد كردن و خۆنماییشكردنن لە جادەی سەهۆڵەكە و داگیركردنی گرد و گردۆڵكەی شار خەمی یەكەمیانە، خەریكی نانەوەی فیتنە و دووبەرەكین، چونكە پێیان وایە لە بوونی دووبەرەكیدا ئەوان دەبنە رەقەم.
ئەگەر گهر بڕیار بێت، مهكتهبی سیاسیی یهكێتی، هێندە یادگە و زاكیرەی بەهێز و ورد بێت و ئا لەم بارودۆخە نەگونجاوەی حزبەكەی خۆی و لەم رەوشە ناسك و جیاوازەی هەرێمی كوردستاندا، بگەڕێتەوە بۆ 25 ساڵ لهمهوبهر و ئازادكردنی هەولێری پایتەختی هەرێمی كوردستان بە ”خیانەت“ ببینێت، حهق وایه هەر بە یادگەی خۆی گوزهرێكیش به رووداوەكانی 16 ئۆكتۆبهری 2017دا بكات و لهوێوه بپرسێت: گهرمیانی ماندوو و كهركووكی قودس و خانهقینی نەبەزیو و خورماتووی خۆڕاگر و..هتد كێ رادهستی میلیشیاكانی حهشدی شهعبیی كردن؟ ههر لهوێشهوه بڕواننه داستانەكانی پردێ و سحێلا، جا بزانن كێ چۆكی به میلیشیاكانی حهشدی شهعبی و داگیركەران دادا، دەبێ ئەو مەكتەبی سیاسییە بزانێ كێ تەسلیم بوو و كێ خۆی نەچەماند.