عیماد برهۆ، ئەندامی (ئەنەكەسە): پەکەکە، ڕێ نادات کوردی رۆژئاوا پەیوەندیی سیاسی و دیپلۆماسییان هەبێ بۆیە مەترسییەكان بەردەوامن
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

عیماد برهۆ، ئەندامی (ئەنەكەسە): پەکەکە، ڕێ نادات کوردی رۆژئاوا پەیوەندیی سیاسی و دیپلۆماسییان هەبێ بۆیە مەترسییەكان بەردەوامن

 

لە چەند رۆژی رابردوودا، حەسەن نەسڕوڵا، ئەميندارى حزبوڵاى لوبنان، بۆ میدیای فەرمیی رووسیا (RT) رای گەياند: ”کشانەوەی ئەمريكا لە ئەفغانستان، کاریگەریى لەسەر ناوچەيە و جيهان دەبێت، پێويستە ئەمريكا لە رۆژئاواى كوردستانیش بکێشتەوە و هێزەكانى سووريا بگەڕێنەوە ئەو ناوچەيە“.


نەسروڵا گوتیشی: ”ئەمريكا تا ئێستا بە پاساوى ڕووبەڕووبوونەوەى داعش، هێزەكانى لە ناوچەى فوڕاتى سووريا هێشتووەتەوە كە ئەوەش پاساوێكى بێ بنەمايە، پێويستە هێزەكانى لەو ناوچانە بكشێنێتەوە و رادەستى حكوومەتى سووريا بكرێتەوە".
لەبارەی ئەو لێدوانانەی نەسروڵا و ئەگەری كشانەوەی ئەمریكا لە سووریا و بارودۆخی هەنووكەیی رۆژئاوای كوردستان، عیماد برهۆ، ئەندامی ئەنجوومەنی نیشتمانی کورد لە سووریا، لەم گفتوگۆ تایبەتەدا، وەڵامی چەند پرسیارێكی (باسنیوز) دەداتەوە:


هەڕەشەکانی سەر ڕۆژئاوای کوردستان

عیماد برهۆ، ئەندامی ئەنجوومەنی نیشتمانی کورد لە سووریا، پێوەند بە ئەگەر و مەترسییەکانی کشانەوەی ئەمریکا لە رۆژئاوای کوردستان دەڵێت: ”بابەتەکە تەنیا پەیوەندیی بە کشانەوەی ئەمریکا و پێگە سەربازییەکەی لە رۆژئاوای کوردستاندا نییە، کێشەی رۆژئاوا ئەوەیە، مەترسیی گەورەی لەسەرە، هێزی زۆر هەیە چاویان لە دەست بەسەرداگرتنیەتی، هەروەکوو بینیمان چۆن تورکیا دەستی بەسەر عەفرین و ئەو ناوچانەیدا گرت، ئێستاش وا هێزە گرێدراوەکانی نزیکبوونەتەوە لە (تەلتەمر)، کە ئەوەش بۆ رۆژئاوای کوردستان مەترسیدارە”.


شایانی باسە، (تەلتەمر) ناحیەیەکی ستراتیژیی سەر بە کانتۆنی حەسەکەیە و تەنیا 40 کم لە سەنتەری شارەکەوە دوورە.

هەر سەبارەت بە هەڕەشەکانی سەر رۆژئاوای کوردستان، ئەو سەرکردەیەی ئەنەکەسە، ئاماژەی بەوە دا، مەترسییەکانی (داعش)یش لەسەر رۆژئاوای کوردستان تەواو نەبوونە و جموجۆڵی ئەو ڕێکخراوە تیرۆرستییە لەناو سووریا و رۆژئاوای کوردستان هەر بەردەوامە، مەترسیی هەرە گەورەش لەسەر رۆژئاوای کوردستان، گەڕانەوەی رژێمی سووریایە، کە ئێستا رووسیا و ئێران پشتیوانیی لێ دەکەن.

كاریگەریی هێزەکانی سووریای دیموکرات (هەسەدە)

عیماد برهۆ، سەبارەت بە بوونی هێزەکانی سووریای دیموکرات (هەسەدە) لە گۆڕەپانی رۆژئاوای کوردستاندا، کە ئایا ناتوانن بەرەنگاری ئەو هەڕەشانە ببنەوە، ئاماژەی بەوە دا: ”بەداخەوە، لە ئەگەری کشانەوەی ئەمریکا رۆڵی هێزەکانی سووریای دیموکرات (هەسەدە) کاریگەریی ئەوتۆی نابێت لە بەرامبەر بەو هەڕەشە گەورە و مەترسیدارانەی لەسەر رۆژئاوای کوردستان هەن، بەتایبەتی کە بە پشتیوانیی وڵاتانی ئیقلیمی و نێودەوڵەتی روو دەدەن“.

گوتیشی: ”ئەو هێزە بەهۆی هەژموونی پەکەکە بەسەریدا، نەیتوانیوە هیچ پەیوەندییەکی سیاسی و دیپلۆماسیی هەبێت، تەنانەت تورکیا کە وڵاتێکی دراوسێیە، ئەو هێزانە وەکوو پەکەکە لە دژی خۆی سەیر دەکات، کە ئەگەر هەژموونی پەکەکە نەبوایە، رەنگە هاوکێشەکە ئێستا جیاواز بوایە و وەکوو هەرێمی کوردستان لە عێراق دەبوو، کە هێزی پێشمەرگەی کوردستانی هەیە و دانیپیانراوە وەکوو هێزێکی فەرمیی نیشتمانی، هێزێکی مەشقپێکراو و ڕاهێنراوە و هەماهەنگیی لەگەڵ هێزە عێراقییەکان هەیە، جگە لەوەش هەرێمی کوردستان ناوچەیەکی فیدڕاڵییە لە عێراق و لە دەستووری عێراقدا دانیپانراوە، پەیوەندییەکی تۆکمەی سیاسی و دیپلۆماسیشی لەگەڵ وڵاتانی ئیقلیمی و نێودەوڵەتی دروست کردووە، هەموو ئەوانە پارێزگاری لە هەرێمی کوردستان دەکەن، بەڵام بەداخەوە پەکەکە نەیهێشتووە ڕۆژئاوای کوردستان هیچ پێگەیەکی سیاسیی دانپیانراوی هەبێت، بە هەموو شێوەیەک ڕێگریی لەوە کردووە“.

کێشەی (هەسەدە)، پەکەکەیە

عیماد برهۆ، هەر سەبارەت بەو پرسە جەختی لەوە کردەوە، دووپاتی دەكاتەوە کێشەی سەرەکیی هێزەکانی سووریای دیموکرات (هەسەدە)، هەژموونی پەکەکەیە، چونكە پەكەكە وای كردووە كە هەسەدە تەنیا لە چوارچێوەی شەڕی داعش لەلایەن هێزەکانی ئەمریکاوە بۆ پاراستنی ناوچەکە لە داعش سوودی لێ وەرگیراوە، کەوابێت هەر ئەمریکا نەبێت، ئەو هێزە لە رووی سیاسییەوە دەستبەستراو دەبێت، کە ئەوەش مەترسییە گەورەکەیە لەسەر رۆژئاوای کوردستان، کەوا دەکات ئەو هێزە نەتوانێ پارێزگاری لەو هەموو هەڕەشانە بکات، چونکە (هەسەدە)، کە لەڕووی سیاسییەوە سەر بە (پەیەدە)یە، (پەیەدە)ش گرێدراوی (پەکەکەیە) ئەوە بووەتە هۆی ئەوەی (پەیەدە) نەتوانێت بەهۆی (پەکەکە)ەوە پەیوەندیی سیاسیی لەگەڵ ئەمریکاش دابمەزرێنێ، تەنیا (هەسەدە) پەیوەندییەکی سەربازیی هەبووە لەگەڵ ئەمریکا، ئەویش تەنیا لەسەر خاکی سووریا و دژ بە داعش.

ڕێکكەوتنی کورد - کورد

بە بڕوای ئەو ئەندامەی ئەنجوومەنی نیشتمانیی کورد لە سووریا، (ئەنەکەسە) ڕێککەوتنی کورد - کورد، کە لە زۆربەی خاڵەکاندا کۆک بوون، بەڵام بەتەواوی جێبەجێ نەکراوە، ئەگەر بکرایە دۆخی رۆژئاوای کوردستانی باشتر دەکرد، کە لە ئەگەری کشانەوەی ئەمریکا و تەنانەت لە ئێستاش مەترسییەکانی تورکیا و سووریای بەسەرەوە نەدەما، بەڵام هەمدیسان بەهۆی هەژموونی قەندیل بەسەر (هەسەدە)ەوە، نەتوانراوە خاڵە جەوهەرییەکانی جێبەجێ بکرێن، عیماد برهۆ، لەمبارەیەوە روونی دەكاتەوە: ”پەکەکە ڕێگریی کردووە لە جێبەجێکردنی رێککەوتنی کورد - کوردی نێوان (ئەنەکەسە) و پارتی یەکێتیی دیموکراتی (پەیەدە)، ئەمەش دۆخی ڕۆژئاوای کوردستانی بەو مەترسییەی ئێستا هێشتووەتەوە“.

هاوکات، عیماد برهۆ، پێی وابوو، ئەگەر ئێستا لەشکری پێشمەرگەی رۆژ بگەڕابوایەوە رۆژئاوای کوردستان، کە هێزێکی راهێنراوی هاوپەیمانان و ئەمریکایە لە هەرێمی کوردستان، ئەوە وڵاتانی دراوسێی رۆژئاوای کوردستان، (هەسەدە)یان بە مەترسیی بۆ سەر خۆیان نەدەزانی، چونکە ئەو هێزەی لەشکری رۆژ، هێزێکی دوور لە هەژموونی (پەکەکە)یە، بەڵام پەکەکە رێگریی لە گەڕانەوەی ئەو هێزە کردووە، چونکە بە مەترسی بۆ سەر بەرژەوەندییەکانی خۆی و هەژموونی خۆی زانیوە، گوتیشی: ”هیچ کات نەمانویستووە لەشکری رۆژ بەبێ رێککەوتن بگەڕێتەوە، تەنیا لەپێناو ئەوەی بەریەککەوتن روو نەدات و شەڕی ناوخۆیی دروست نەبێت، بەڵام تاکە ڕێگەی پاراستنی رۆژئاوای کوردستان، گەڕانەوەی ئەو هێزە و لەگەڵیدا جێبەجێکردنی رێککەوتنی کورد - کورد و درێژەدان بە دانوستانەکانە، کە تەنیا چەند خاڵێکی زۆر کەمی ماوە، بەتایبەتی لەسەر پرسی ئیدارەدانی رۆژئاوای کوردستان“.

پەکەکە دەست لە دژایەتیی (ئەنەکەسە) هەڵناگرێت

عیماد برهۆ، ڕاشیگەیاند: ”لەگەڵ ئەوەی پەکەکە ڕێگە بە جێبەجێکردنی رێککەوتن و بەردەوامیی دانوستان نادات، دەستیش لە هێرشکردنە سەر بارەگاکانی پارتی دیموکراتی کوردستانی سووریا، (پەدەکەسە) و (ئەنەکەسە) هەڵناگرێت، لە پەنای گرووپی سەر بە خۆی لە رۆژئاوای کوردستان، بۆ نانەوەی ئاژاوە و گرژی، بەردەوام هێرش دەکاتە سەر بارەگا سیاسییەکانی (ئەنەکەسە) و (پەدەکەسە)، کە لە رۆژئاوای کوردستان بکرێنەوە، لە ماوەی چەند رۆژی رابردوودا بە هەمان شێوە لە (عاموودا) هێرشیان کردە سەر بارەگایەکی (پەدەکەسە) و سووتاندییان“.

برهۆ ئاماژەی بەوەش دا، بەردەوامیی پەکەکە لەو رەفتارە نادیموکراسییانەیە، داهاتووی رۆژئاوای کوردستانی بەو شێوەی ئێستا لەبەردەم مەترسیی گەورەدا هێشتووەتەوە، کە کاتێکی کەم ماوە لەبەردەم هێزە سیاسی و کوردییەکان، بتوانن بە رێککەوتن و پەیوەندیی سیاسی و دیپلۆماسی دروستکردن لەگەڵ وڵاتانی ناوچەکە و جیهان، رۆژئاوای کوردستان لەو ئالنگارییانە بپارێزن، کە رووبەڕووی بووەتەوە، بەتایبەتی لە ئەگەری کشانەوەی ئەمریکا لە رۆژهەڵاتی فورات (ڕۆژئاوای کوردستان).