بەرێوەبەری ئۆفیسی هەڵبژاردنەكانی سلێمانی: زۆربەی ئەوانەی لە سلێمانی یەكەم جارە مافی دەنگدانیان هەیە خۆیان تۆمار نەكردووە
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x

بەرێوەبەری ئۆفیسی هەڵبژاردنەكانی سلێمانی: زۆربەی ئەوانەی لە سلێمانی یەكەم جارە مافی دەنگدانیان هەیە خۆیان تۆمار نەكردووە

"سنووری پارێزگای سلێمانی، یەك ملیۆن و 361 هەزار و970 دەنگدەر مافی دەنگدانیان هەیە"

پێوەند بە هەڵبژاردن و رێوشوێنەکان، ئامانج عەزیز، بەڕێوەبەری ئۆفیسی هەڵبژاردنەكانی سلێمانی، لە گفتوگۆیەكی تایبەت لەگەڵ (باسنیوز)، چەندین پرسی گرنگ دەخاتە ڕوو و ئاشكرای دەكات، لەدایكبووانی 2000 و 2001 و 2002، كە یەكەمین جارە لە سلێمانی مافی دەنگدانیان دەبێت، بەشی زۆریان خۆیان تۆمار نەكردووە، یان كارتەكانیان وەرنەگرتووەتەوە. دەشڵێت: ”لە هەڵبژاردنی رابردووی پەرلەمانی عێراق، دەنگدەر دەنگی بە لیست و بە پاڵێوراویش دەدا، بەڵام ئەمجارە دەبێت تەنیا دەنگ بە پاڵێوراو بدات، لەسەر كارتی دەنگدان ناوی حزب و قەوارەی سیاسی نەنووسراوە“.

لە هەڵبژاردنەکاندا هەموو جارێک لە سلێمانی باس لە تەزویر دەکرێت، لە وەڵامی ئەو پرسیارەی، چۆن گەرەنتیی ئەوە دەکەن ئەمجارە تەزویر نەکرێت؟ بەڕێوەبەری ئۆفیسی هەڵبژاردنەكانی سلێمانی گوتی: "پاڵپشت بە یاسای هەڵبژاردنەكانی عێراق و پاڵشت بەو رێنمایی و نیزامانەی لەلایەن كۆمسیۆنەوە دەردەچن، وەكوو لایەنێكی جێبەجێكار، پابەندین بەو رێنماییانەوە، ئەم پڕۆسەی هەڵبژاردنەش پڕۆسەیەكی ئەلیكترۆنییە و دەنگدان بە كارتی ئەلیكترۆنی دەبێت، پڕۆسەی دەنگەكان و جیاكردنەوەی دەنگەكانیش بە ئامێری ئەلیكترۆنی دەبێت، هەموو ئامێرەكانیش پێش هەڵبژاردن لەلایەن كۆمپانیایەكی ئەڵمانی پشكنینیان بۆ دەكرێت و ئێستاش كۆمپانیاكە خەریكی ئەو پشكنینەن و هەفتانە راپۆرتی خۆیان دەدەنەوە كۆمسیۆن، هەڵبژاردنیش بە چاودێریی نەتەوەیەكگرتووەكان و رێكخراوە مەدەنییەكان دەبێت، هەموو ئەوانە گەرەنتیی ئەوەن، هەڵبژاردنەكە هەڵبژاردنێكی پاك و دوور لە تەزویر بێت".

هەروەها ئاماژەی بەوە دا: ”لە 2ی1ی 2021 پڕۆسەی دڵنیابوونەوە لە ناو و تۆماری دەنگدەران دەستی پێكرد و تاوەكوو 15ی نیسان بەردەوام بوو. لەو ماوەیەدا رێژەیەكی باشی هاووڵاتییان سەردانی ناوەندەكانی هەڵبژاردنیان كرد، بۆ دڵنیابوونەوە لە ناوەكانیان لە تۆماری دەنگدەران، ئەوەی زانیارییەكانی هەڵە بووبێت بۆمان چاك كردووەتەوە، لەو ماوەیەدا 70 هەزار كەس تۆماری بایۆمەترییان بۆ كراوە".

ئاشكراشی كرد، لە سنووری پارێزگای سلێمانی یەك ملیۆن و 361 هەزار و970 دەنگدەر مافی دەنگدانیان هەیە.

ئامانج عەزیز، لەبارەی ئەو كەسانەی یەكەمین جارە لەو هەڵبژاردنە لە سلێمانی مافی دەنگدانیان هەیە، گوتی: "لەدایكبووانی 2000 و 2001 و 2002، لەو ماوەیەی تۆماری بایۆمەتری ئەنجام دراوە، تۆماری بایۆمەترییان بۆ كراوە، ئەوەی هاتبێت بۆمان كردووە، بەشێكیش كارتیان بۆ كراوە، بەڵام تاوەكوو ئێستا وەریان نەگرتووەتەوە".

ئەوەشی خستە ڕوو: "بەشێكی زۆری ئەو كەسانەی یەكەمین جارە لە سلێمانی مافی دەنگدانیان هەیە، خۆیان تۆمار نەكردووە، یان كارتەكانیان وەرنەگرتووەتەوە، رێگای زۆر جیاوازمان گرتە بەر بۆ تۆماركردنی ئەو توێژە دەنگدەرە، لە رێگەی خوێندنگە و زانكۆكان و لە رێگەی تیمی گەڕۆك، لە رێگەی كردنەوەی ناوەندەكانمان كە لە رۆژانی پشووش لە دەوامدا بوون، سستیی بەدەنگەوەچوونی ئەو توێژە پەیوەندیی بە خۆیانەوە هەیە، دەنگدانیش مافە و ئەرك نییە، پلانی هۆشیاكردنەوەشمان پیادە كرد، ئەوەی كارتی دەنگدانی هەبێ تەنیا ئەو مافی دەنگدانی دەبێت".

باسی لەوەش كرد، ژمارەیەکی زۆر كارتی دەنگدان لە بنكەكانی كۆمسیۆنە و بەردەوام دابەش دەكرێن: "ژمارەیەکی زۆر كارت لە بنكەكانی كۆمسیۆنە، داوا دەكەین دەنگدەران ئەو كارتانە وەربگرنەوە، چونكە تەنیا بەو كارتە دەتوانن دەنگ بدەن، هەركات كۆمسیۆن بڕیاری دا، ئەوە كارتەكان دەگەڕێندرێنەوە بۆ كۆمسیۆن".

لە وەڵامی ئەو پرسیارەی، هیچ لیستێک دەتوانێ ناوی کاندیدان و سەرۆکی لیست بگۆڕێت؟ بەڕێوەبەری ئۆفیسی هەلبژاردنەكانی سلێمانی گوتی: "هیچ حزب و قەوارەیەك ناتوانێت كاندید بگۆڕێت، 20ی 6 دوا وادە بوو بۆ گۆڕینی كاندید و پاشەكشەی پارتی سیاسی لە هەڵبژاردن، پاڵێوراوەكان ناویان جێگیر كراوە و هەموو پاڵێوراوێك ژمارەی تایبەت بە خۆی وەرگرتووە، ئەو ناو و ژمارەیە دەچێتە سەر وەرەقەی دەنگدان، بەڵام سەرۆك لیست پەیوەندیی بەو هەڵبژاردنەوە نییە، ئەم هەڵبژاردنە هەڵبژاردنی دەنگدانە بە پاڵێوراو، نەك دەنگدان بە حزب، چونكە سیستمی هەڵبژاردن گۆڕاوە و وەكوو ساڵی 2018 نییە".

جەختیشی كردەوە، دەبێ دەنگدەران هۆشیار بن، دەنگدانی ئەمجارە جیاوازە، گوتیشی: "لە هەڵبژاردنی رابردووی پەرلەمانی عێراق، دەنگدەر دەنگی بە لیست و بە پاڵێوراویش دەدا، بەڵام ئەمجارە دەبێ تەنیا دەنگ بە پاڵێوراو بدات، چونكە تەنیا ناو و ژمارەی پاڵێوراو لەسەر كارتی دەنگدان هەیە، ناوی حزب و قەوارەی سیاسی نییە".

لەو ماوەیەدا زۆر باس لە دواخستنی هەڵبژاردن دەكرێت، لەبارەی ئەو دەنگۆیانە ئامانج عەزیز گوتی: "وەكوو كۆمسیۆن پابەندین بە خشتەیەكی زەمەنی و زۆربەی خشتە زەمەنییەكەش گەیشتووەتە قۆناغی كۆتایی، ئێستا لە كۆتاییدایین، ئێمە وەها ئامادەكاری دەكەین كەوا هەڵبژاردن لە كاتی خۆی لە 10ی 10 دەكرێت، هیچ ئاماژەیەكیش لە لایەن كۆمسیۆنەوە نییە، كە هەڵبژاردن نەكرێت، هەموو ئامادەكارییەكانمان بۆ ئەوەیە كە هەڵبژاردن لە كاتی خۆیدا بكرێت، ئەوەی كە لەدەرەوەی كۆمسیۆن هەیە، لە راگەیاندن و پارتی سیاسی بۆ دواخستنی هەڵبژاردن، ئەوە پەیوەندیی بە كۆمسیۆنەوە نییە، كۆمسیۆن راسپێردراوە ئەو هەڵبژاردنە لە كاتی خۆیدا بكات، ئێستا خەریكی ئەوەین تاوەكوو دوای تیروپشك ناوی كارمەندانی رۆژی هەڵبژاردن دیاری بكرێت، بۆ ئەوەی راهێنانیان پێ بكرێت و بە باشترین شێوە هەڵبژاردنەکە بكرێت".