حكوومەت پێشتان كەوتووە، جا بێدەنگ مووچەكانتان بخۆن باشترە!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
جەمال عەبدوڵا 12/08/2021

حكوومەت پێشتان كەوتووە، جا بێدەنگ مووچەكانتان بخۆن باشترە!

عومەر گوڵپیی ئەندامی پەرلەمانی كوردستان، بۆ چارەسەری كێشەی كەمئاوی لە ھەندێك لە شوێنەكانی ھەرێمی كوردستان، تازە بە تازە خەبەری دەبێتەوە و داوای كۆبوونەوەی نائاسایی پەرلەمانی كوردستان دەكات و دەڵێت: ”لە 111 ئەندامی پەرلەمان، تەنیا 24 ئەندام پەرلەمان ئیمزایان بۆ ئەو كۆبوونەوە نائاساییەی پەرلەمان كردووە“.

ھەر ئەم عومەرە دەشڵێت: ”تەنیا لە گومرگەکانەوە، بڕی‌ ئەو پارەیەی‌ کە مانگانە بە ڕێگەی‌ جیاجیا دەبێتە زیان بۆ هەرێمی‌ کوردستان زیاترە لە (150 ملیار) دینار، ئەمە لەکاتێکدا چارەسەری‌ کێشەی‌ ئاوی‌ هەموو قەزای‌ چەمچەماڵ تەنیا بە (100 تا 120) ملیار دینار بە هەمیشەیی‌ دەکرێت، کێشەی‌ کەمئاویی‌ هەولێریش بە نزیکەی‌ دوو هێندەی‌ ئەو پارەیە، دەچێتە قۆناغێکی‌ زۆر باشتر، هەر پیاچوونەوەیەکیش بە دۆسیەی‌ نەوتدا، دەنوانێت نزیکەی‌ (100 ملیار) دینار داهاتی‌ مانگانە بۆ هەرێم زیاد بکات“، بەڵام ئەم ئەندامی پەرلەمانە لە ھەموو ئەو بابەتانەی باسی دەكات، بیری چووە یان بیر خۆی بردووەتەوە كە حكوومەتی ھەرێمی كوردستان، زۆر پێش ئەوان كەوتووە چونكە:

1- ئایا ئەم عومەرە نازانێت كە مەسرور بارزانی، سەرۆكی حكوومەتی ھەرێمی كوردستان 7 ملیار و 680 ملیۆن دیناری بۆ چارەسەركردنی ڕیشەیی كێشەی كەمئاویی چەمچەماڵ تەرخان كرد و قایمقامی چەمچەماڵیش ڕوونكردنەوەی دا كە چۆن و لە چەند پرۆژەدا ئەو بڕە پارەیە خەرج دەكرێت؟

2- ئەی ئایا ئەم عومەری ئەندامی پەرلەمانە، ئاگاداری ئەوە نیە كە چەند ڕۆژە و ھێزەكانی دەزگای ئاساییشی گشتیی ھەرێمی كوردستان ھەر لە چوارچێوەی بەرنامە و سیاسەتەكانی حكوومەتی ھەرێمی كوردستان و بە سەرپەرشتیی جێگری سەرۆكی حكوومەت و بۆ بنبڕكردنی قاچاخچێتی و یاساشكێنی لە مەرزەكانی باشماخ و پەروێزخان، جێگیر كراون؟ ئەی ئاگاداری ئەو لێدوانە فەرمیە نیە كە دەڵێت لەو ڕۆژەوە هیچ قاچاخچێتی و یاساشكێنیەك لەو مەرزانەدا نەكراوە؟

3- دیسان ئایا ئەم عومەرەی ئەندامی پەرلەمان، ئەو ڕۆژەی بیر چووەتەوە كە وەزیری سامانە سرووشتیەكان چوو بۆ پەرلەمانی كوردستان و لەناو قسەكانیدا گوتی: ”ئێستا ڕێژەی گەندەڵی لەو وەزارەتەدا سفرە؟“ ئەی چەپڵەڕێزانەكەی ئەندامانی پەرلەمانی كوردستانی بۆ وەزیری سامانە سرووشتیەكان لە كۆبوونەوەی ئەو ڕۆژەدا بیر چووەتەوە؟

4- ئەی ئایا ئەم كاك عومەرە، ئەو گوتەیەی مەسرور بارزانیی سەرۆكی حكوومەتی ھەرێمی كوردستانی بیر چووەتەوە كە لە بۆنەی جیاجیادا دووبارەی كردووەتەوە بەوەی كە ڕاستە كاری لەپێشینەی حكوومەت لە چاكسازییەكاندا بۆ دابینكردنی مووچەیە، بەڵام ئیشی حكوومەت ھەر بە تەنیا دابینكردنی مووچە نیە، بەڵكوو ئەنجامی ئەو چاكسازییانەی كە زیادكردنی داھاتی لێ دەكەوێتەوە بۆ پڕۆژە خزمەتگوزاریاكانیشە كە گشت ھاووڵاتیان سوودی لێ وەردەگرن؟

كەواتە لەكاتێكدا ئەو ئەندامی پەرلەمانە داوای كۆبوونەوەی پەرلەمان بۆ ھەندێك بابەت دەكات كە حكوومەت خۆی بۆ چارەسەر لەمێژە پێش ئەو 24 ئەندامەی پەرلەمان كەوتووە كە ئێستا ئیمزایان بۆ كۆبوونەوەی نائاسایی پەرلەمان و بۆ ھەمان ئەو بابەتانە كۆ كردووەتەوە، بۆیە دەڵێم ئەو جۆرە ئەندامانەی پەرلەمان بێدەنگ مووچەكانیان بخۆن زۆر باشترە لەم جۆرە داوا و موزایەدانە.