سەر هەڵبڕە، تۆ كوردیت
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
بەرهەم عەلی 12/08/2021

سەر هەڵبڕە، تۆ كوردیت

ئەی كورد، دەزانم چەندین ساڵە چ ماشێنێكی میدیایی گەورە هەر بە زمانەكەی خۆت، بە ملیۆنان دۆلارەوە لەلایەن دوژمنان و داگیركەران و نەیارانتەوە لە دژی تۆ و فەرهەنگ و زمان و مێژوو و سەروەریەكانت خراوەتە گەڕ بۆ ئەوەی تۆ خۆت بە هیچ نەزانیت، تا خۆت بە شایانی هیچ مافێكی نەتەوەیی و هیچ قەوارە و دەوڵەت و نیشتمانێك نەزانیت. بۆ ئەوەی مێژووی هەزاران ساڵەی خۆت لەبیر بكەیت و ئێستای خۆیشت بە پووچ بزانیت و لەوپەڕی رەشبینیەوە لە ئایندەی خۆت بڕوانیت، دەزانم ئەو هێزانەی خاكیان داگیر كردوویت و دەیانەوێ ملت پێ كەچ بكەن و سەرت پێ شۆڕ بكەن، چەند گەورە و كاریگەر و دڕندەن، بەڵام تكایە سەر هەڵبڕە و سنگ دەرپەڕێنە چونكە تۆ كوردیت.

ئەی كورد، دەزانم بە سەدان بەناو (رۆشنبیر و نووسەر و بیرمەند و میدیاكار و پەرلەمانتار و سیاسەتوان!) هەر لە نەتەوەی خۆت و بە زمانی خۆت، بەردەوام دەیانەوێ بچووكت بكەنەوە، خەونە مەزنەكانت دەتۆرێنن و خەیاڵی جوانی خۆ بەشت زانینت بەتاڵ دەكەنەوە و ئاسۆت لێ لێڵ دەكەن و ئامانجەكانت دەكەن بە هیچ، بەڵام دڵنیا بە، ئەوانە بەشێكیان خۆفرۆشن، بەشێكی تریان ویژدانفرۆش و قەڵەمفرۆشن، بەشێكیان خۆیان بوودەڵە و ترسنۆك و هیچ لەبارانەبوون، بەشەكەی تریان ئاگاداری مێژووی هەزاران ساڵەی تۆ نین، بەشێكیشان هیچ متمانەیان بە خۆیان نیە و لاواز و خۆڕادەستكەرن و وەك ئەو باڵندانەی نێو قەفەسەكان بیر دەكەنەوە كە پێیان وایە ”فڕین لەدەرەوەی قەفەس كوفر و تاوانە“، بۆیە دەیانەوێ تۆش وەكوو ئەوان خۆت تەسلیم بكەیت و سەرت لەئاست خەڵكی تردا شۆڕ بكەیت... نەخێر تۆ بە قسەیان مەكە و ئەوە مەكە، سەر هەڵبڕە چونكە تۆ كوردیت.

ئەی كورد، دەزانم بەدرێژایی مێژوو، هەر لە گوزەرەكەی خۆت و لەنێو نیشتمانەكەی خۆتدا (كوردی ناپاك)ت دیوە و گەلێ جار برای خۆت لەپشتەوە خەنجەری ژەهراویی لێ داویت، ژیانی ئازادی پێ ڕەوا نەبینیویت و پێی وا بووە كە تۆش وەك ئەو، جانەوەرێكی پووچ و بچووكیت، دەزانم ئێستاش خەڵكانێكی جاش و خۆفرۆشت تێدایە، بەڵام تكایە ئەمانە لەسەر كوردستانی نیشتمان و هەموو نەتەوەی خۆت حساب مەكە، ئاخر گرنگە ئەوەت لەبیر بێت كە هەر لەنێو نەتەوە و كوردستانی تۆدا، بە سەدان هەزار رۆڵەی بەئەمەكی خاكەكەت ژیانی خۆیان بەخشیوە لەپێناو سەروەریی تۆدا، چونكە تۆ كوردیت و هەر بە كورد دەمێنیتەوە، كەواتە خۆ نەچمێنە و سەر هەڵبڕە.

ئەی كورد، من داوای ئەوەت لێ ناكەم خۆت لە هەموو گەلانی دونیا بە بەرزتر و گرنگتر و باڵاتر ببینیت، نامەوێ فەرهەنگ و زمان و مێژوو و بیروباوەڕت لە هی هەموو گەلانی دونیا بە باشتر و گونجاوتر و پیرۆزتر بزانیت، چونكە ئەوەیان نەخۆشی و دەردێكی گەورەیە بۆ نەتەوە و كارەسات دێنێ بۆت، بەڵام تكایە هاوشانی گەلانی دونیا خۆت بە شت بزانە، تۆش خودان مێژوویەكی هەزاران ساڵەی لەسەر ئەم خاكەی خۆت، خودان چەندین شارستانیەت و ئیمپراتۆریەت و مەملەكەت و میرنشین و سەردار و سەركردەی دلێریت، تۆش خاوەن زمانێكی فراوان و دەیان شێوەزار و شێوە ئاخافتنیت، تۆش لە نیشتمانی خۆتدا، خاوەن كولتوورێكی دەوڵەمەند و قووڵی باڵایت، بە درێژایی مێژوو چەندین ئایین و باوەڕ و رێبازی جوانی مرۆڤدۆستی و ژیاندۆستی، لەسەر خاكی تۆ و بە بیر و ئەندێشەی پێشڕەوان و عاقڵمەندانی سەر ئەم خاكەت داهێنراون، بیرت بێت تۆ یەكەمین نەتەوە بوویت خودای تاك و تەنیات ناسی، كەواتە بۆ لەئاست بێگانەیەكدا خۆت بە كەمتر دەزانیت و سەر دادەنەوێنیت؟ نا تكایە، سەر هەڵبڕە، چونكە تۆ كوردیت.

ئەی كورد، تۆ خاوەنی چیای زاگرۆسی لانكی مرۆڤایەتییت، تۆ نەتەوە زاگرۆسنشینە ناودارەكەی مێژووی بەشەرییەتیت، ئەشكەوتەكانی كە پرووسكی مرۆڤی نیاردەرتالیان تیا دۆزراوەتەوە وان لەنێو قووڵایی خاكی تۆدا، شارستانیەتەكانی هوری و گۆتی و لولۆبی و كاشی و سۆمەری و میتانی و زاموا و ئیمپراتۆریای ماد و دامەزرێنەرانی ئیمپراتۆریای ساسانی و بەشێك لە سەركردە كاراكانی سەدەكانی ناوەڕاست و دەوڵەتی ئەیووبی و سەدان میرنشین و قەڵا و شووراكانیان، تا دەگات بە بزاڤە نەتەوەییەكان و یاخیبوونە گەورەكان و شۆڕش و راپەڕینەكان و مەملەكەتی مەلیك مەحموود كۆماری كوردستانی سوور و و كۆمارەكەی كوردستان لە مهاباد و هەرێمە دەستووریەكەی باشووریش، هەر هەمووی هەر لەسەر خاكی تۆن و مێژووی تۆن، ئیدی بۆچی پێتوایە تۆ مێژوویەكت نیە شانازیی پێوە بكەیت؟ كەواتە ئەگەر قسە لەسەر مێژووش بوو، سەر هەڵبڕە، چونكە تۆ كوردیت.

ئەی كورد، تۆ خاوەنی دەیان هەزار شوێنەواری مێژووییت لە خاكەكەتدا، تۆ خاوەنی یەكەمین تیشك و پەیامی ئایینی میترایی و میهرپەرستیت، تۆ خاوەنی رابەر و فەیلەسووف و پەیامهێنێكی وەك زەردەشتیت، تۆ خاوەنی كتێبی ئاڤێستایت كە تا ئێستاش رۆژئاواییەكان توێژینەوە لەسەر گاتا و پەیامەكانی دەكەن، تۆ خاوەنی ئایینی ئێزدیت كە یەكێكە لە قووڵترین و كۆنترین ئایینەكانی مرۆڤایەتی و یەكێكە لە دەوڵەمەندترین ئاییبنەكانی دونیا لەڕووی فەرهەنگ و سرووتەكانیەوە، تۆ خاوەنی ئایینی مانییت، تۆ خاوەنی ئایینی یارسان (كاكەیی) و هەموو رێبەرەكانی ئەو ئایینەیت، هەر لەڕێی ئەم ئایینانەوە كە زێدەكەیان خاكی كوردستانە، خودان میرات و كەلەپوورێكی دەوڵەمەندی مۆزیك و ئاواز و شیعر و گۆرانی و سرووتی تایبەتی خۆكردەیت، تۆ خاوەنی چەندین رێبەری رێباز و تەریقەتەكانی ئایینی ئیسلام و سۆفی و زانای ئایینی و عارفیت، تۆ خاوەنی دەیان دیوانی گەورەی شاعیرانی كلاسیكیت، ئەدەبی كلاسیكیی تۆ، بەشێكی گرنگە لە میراتی فكریی مرۆڤایەتی، ئەوە كولتوورەكەی تۆیە كە هەموان لەسایەیدا بەئارامی پێكەوە دەژین، ئیتر تۆ بۆ سەر هەڵنابڕیت و بۆ شانازی بە خۆتەوە ناكەیت؟ بۆ خۆت بە هاوتای گەلانی دونیا نازانیت؟ ئازیزم، سەر هەڵبڕە چونكە تۆ كوردیت.

ئەی كورد، دەزانم لە ناكۆكیی سیاسی و ناتەبایی و خیانەت و گەندەڵی و گەندەڵكاران تووڕەیت، دەزانم لەسایەی ئەو كێشە و قەیران و تەنگژانەی بەشێكی بە هۆكاری ناوخۆیی و بەشێكی بە هۆكاری دەرەكی بەردەوام بۆت دروست دەكرێت، ژیان و گوزەرانت سەخت و قورس بووە و گەلێ جار خەریكە بڕستت لێ دەبڕن و كەنەفتت دەكەن، دەزانم لەپای ئەمانە زۆر تووڕەیت، نیگەرانیت، بێئۆقرەیت، نائارامیت، دەزانم دوژمنەكانت بە بیركردنەوە و بە چەك و بە هێز و بە ئابوورییش، لە تۆ گەورەتر دێنە بەر چاو، بەڵام ئەوەت لەبیر بێت كە بەدرێژایی مێژوو و لە سەرانسەری دونیادا، هیچ گەل و نەتەوەیەك نیە هێندەی كورد بەدرێژایی هەزاران ساڵ، زەبری كوشندەی پێ كەوتبێت، هێندەی كورد ئازار درابێت، هیچ نەتەوەیەك نیە هێندەی كورد هەوڵی پاكتاو و سڕینەوە و لەبەینبردنی خۆی و كولتوور و زمان و مێژووی درابێت، هیچ نەتەوەیەك نیە لە سەردەمی خەنجەر و شمشێرەوە تا چەكی كیمیایی و درۆن و دەبابەی ئەبرامز هەر پەلامار درابێت و هەر بە پێوە مابێت، كەواتە سەر هەڵبڕە، چونكە تۆ كوردیت.

ئەی كورد، تۆ ئێستا ماویت، زمانت بە زۆربەی شێوەزارەكانیەوە ماوە، خاكەكەت ماوە ئەگەرچی بەشێكی هەر داگیركراوە، بەشێكی بەرچاو لە كولتوورت ماوە، مۆزیك و شیعر و گۆرانی و سەما و هەڵپەڕكێ و كتێب و نووسین و میدیات ماوە، ئایینەكانت بە سرووتەكانیەوە ماوە، لەوانەش گرنگتر ئەوەیە كە پاش ئەو هەموو جینۆساید و كۆمەڵكوژییەش، نەتەوەكەت هەر ماوە، بۆیە بە سەری بەرز و سنگی دەرپەڕیوەوە، بە گەشبینیەكی پڕ ئاگاییەوە، روو لە ئاسۆ بۆ ئایندە هەنگاو بنێ، تێكەڵ بە دنیای زانست بە و فریای پێشكەوتنەكانی تەكنۆلۆجیا بكەوە و خۆت بكە بە بەشێكی زیندوو لە كاروانی پێشكەوتنی مرۆڤایەتی و بەشدار بە تیایدا وەك چۆن پێشتر بەشدار بوویت، تۆ نزیكەی پەنجا ملیۆن مرۆڤی بێدەوڵەتیت كەواتە تۆ ناتوێیتەوە، تۆ دەمێنێت بەڵام بەوردی حسابی ئەوە بكە كە تەنیا مانەوە هونەر نیە، بەڵكوو دەبێ هەموان بزانن كە تۆ هەیت، كەواتە بیسەلمێنە كە هەیت، دامەبڕێ و بێئومێد مەبە، لە هەر كوێ دەژیت، گرنگ ئەوەیە سەر هەڵبڕیت، چونكە تۆ كوردیت.