میدیای فەرمیی یەكێتی: بە بڕیاری چەند كەسێك زیاتر لە ١٢ هەزار ناسنامەی دژەتیرۆر بە نایاسایی دروستكراون
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

میدیای فەرمیی یەكێتی: بە بڕیاری چەند كەسێك زیاتر لە ١٢ هەزار ناسنامەی دژەتیرۆر بە نایاسایی دروستكراون

”بە بڕیاری بافڵ تاڵەبانی هەر كەسێك بۆ مەرامی یاساشكێنی ئیمتیازاتی پێدرابێت، لێی وەردەگیرێتەوە“

میدیای فەرمیی یەكێتیی نیشتمانیی كوردستان ئاشكرای كرد، بە بڕیاری چەند كەسێك، زیاتر لە ١٢ هەزار ناسنامەی دژەتیرۆری یەكێتی بە نایاسایی دروست كراون و بڕیار دراوە كاركردن بە سەرجەم ناسنامەكان رابگیرێت و هەر كەسێك بۆ مەرامی یاساشكێنی ئیمتیازاتی پێدرابێت، لێی وەردەگیرێتەوە.

بە گوێرەی هەواڵێكی میدیای فەرمیی یەكێتی، بافڵ تاڵەبانی، هاوسەرۆكی یەكێتی كە چەند رۆژێك لەمەوبەر سەرجەم دەسەڵاتەكانی هەردوو هاوسەرۆكی وەرگرت، ”بڕیاری لێپێچینەوەی ئەو كەسانەی داوە كە بەنایاسایی ناسنامەی دژە تیرۆریان بۆ كراوە، سەرجەم ناسنامەكانی پێشووی ئەو هێزەش وەردەگیرێتەوە و ڕادەگیرێت“.

ئەوەش ڕوون كراوەتەوە كە سەرجەم ئەو ناسنامە ساختانەی لە لایەن دژەتیرۆرەوە دەركراون، هەڵبوەشێندرێنەوە و ”هەر كەسێك بە یاسایی لە دەزگای دژەتیرۆر كارمەند نەبووبێت و سوودمەند بووبێت لە زەوی و ئۆتۆمبێل و چەك، بۆ مەرامی شەخسی و یاساشكێنی ئیمتیازاتی پێدرابێت، لێی وەربگیرێتەوە. هەر كەسێكیش پابەند نەبێت، ڕووبەڕووی دادگا دەكرێتەوە“.

ماڵپەڕەكە ئەوەشی ئاشكرا كردووە كە ”بە بڕیاری چەند كەسێك، زیاتر لە 12 هەزار ناسنامەی دژەتیرۆر بە نایاسایی دروستكراوە، كە بۆ مەرامی تایبەتی و چەندین كاری نایاسایی و یاساشكێنی بەكارھێنراون“.

باسیش لەوە كراوە كە ناسنامەی نوێ بە دیزاینێكی نوێ بۆ ھێزەكانی دژتیرۆر دروست دەكرێت و سەرجەم ئەو ناسنامانە پێشتر وەردەگیرێنەوە و ڕادەگیرێت.