ئایا هەدەپە و ئاكەپە هاوپەیمانیی ژێربەژێریان هەیە؟
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتور و هونه‌ر
×

ئایا هەدەپە و ئاكەپە هاوپەیمانیی ژێربەژێریان هەیە؟

پەروین بوڵدان هاوسەرۆكی پارتی دیموكراتی گەلان (هەدەپە)، لە وتارێكدا لە عەنتاب گوتی: "ئیدی با هاوپەیمانیی میللەت چاوەڕێی دەنگی هەدەپە نەكەن، ئیتر دەنگی هەدەپە بۆ هیچ پارتێك ناڕوات". ئەم گوتەیە چەند شرۆڤەیەكی بۆ كراوە، دیارترینیان ئەوەیە، ئاخۆ هەدەپە و پارتی داد و گەشەپێدان (ئاكەپە) هاوپەیمانیی ژێر بەژێریان هەیە بۆ هەڵبژاردنی داهاتووی توركیا؟

بە گوێرەی زانیارییەكانی رۆژنامەنووس توغجە تاتاری، چەند سەركردەیەكی سەر بە پارتی گەلی كۆماری (جەهەپە)، گوتوویانە ئەم گوتەیە مانای چییە و ئەو هەموو زوڵمەی ئاكەپە لە هەدەپەی دەكات و ئەو فشارە زۆرانە و ئەو رەتكردنەوانە، ئەی چۆن ئێستا هەڵوێست بەرامبەر بە ئاكەپە وەرناگرن و پشتگیری لە كاندیدی ئۆپۆزسیۆن ناكەن بۆ هەڵبژاردنی سەرۆكایەتیی داهاتووی توركیا؟

لە درێژەدا ئاماژەی بەوەش کردووە: "بە دڵنیاییەوە دیارە ئاكەپە و هەدەپە بە نهێنی رێككەوتوون و ژێربەژێر هاوپەیمانی دەبەستن؟

تاكوو ئێستا لە لایەن هیچ كام لە سەركردەیەكی ئەو دوو پارتەوە باس لە هاوپەیمانیی ژێر بەژێری هەدەپە و ئاكەپە نەكراوە، تەنیا لەسەر گوتەكەی بوڵدان شرۆڤەی جیاجیا دەكرێت.

توغجە تاتاری لە نووسینێكدا كە لە ماڵپەڕی (T24)ی توركی بڵاوی كردووەتەوە، دەڵێت هەدەپە بۆچی دەنگ بە ئۆپۆزسیۆنی توركیا بدات؟ ئایا هەموو ئەو زوڵمەی لە كورد كراوە تەنیا ئاكەپە كردوویەتی؟ ئەی پێشتر كێ بووە كوردی چەوساندووەتەوە؟

ئەو رۆژنامەنووسە پێیوایە، بەر لە دروستبوونی هەدەپە، ئەوە جەهەپە بووە بە درێژایی چەندین ساڵ پەلاماری سیاسییە كوردەكانی داوە كاتێك ویستوویانە سیاسەت بكەن، بۆیە منەتی چی بەسەر هەدەپەوە دەكەن كاتێك دەنگ بەوان نەدات؟

چەند نووسەرێكی تریش لە توركیا پشتگیری لە هەڵوێستی بوڵدان دەكەن، چونكە هەر زوڵمێك و فشارێك ئاكەپە لە هەدەپەی كردبێت، جەهەپە تەنیا ئیدانەی كردووە و هیچ هەڵوێستێكی كرداری نەبووە، بۆیە ئەم گوتەیەی بوڵدان وا دەكات، جەهەپە بە خۆیدا بچێتەوە و ئیدی كار بۆ چارەسەركردنی كێشەی كورد بكات، ئەوكات دەتوانێت منەت بەسەر هەر پارتێكی سیاسی كوردی بكات بۆ پشتگیریكردنیان لە هەڵبژاردنی سەرۆكایەتیی توركیادا.