گرووپی پەرلەمانتارانی شۆو، كەی كارێك لەپێناو خەڵكدا دەكەن؟
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
هەرمن ئەحمەد 08/07/2021

گرووپی پەرلەمانتارانی شۆو، كەی كارێك لەپێناو خەڵكدا دەكەن؟

ساڵانی هەشتاكانی سەدەی رابوردوو، له‌ گه‌ڕه‌كه‌كەماندا، دوكانێكی فرۆشتن و بەكرێدانی كاسێتی ڤیدیۆ هەبوو، شمەكی ئەو دوكانە، هه‌میشه‌ جێی باس و خواسی مێرمنداڵان و هەرزەكاران و گەنجانی گەڕه‌ك بوو، ڕۆژانه‌ یان هه‌فتانه، هه‌ر جاره‌ی ریكلامی فلمێكی نوێی هندی یان چینی و توركیی به‌ جامی دوكانه‌كه‌یدا هه‌ڵده‌واسی، ئیدی هه‌موان مه‌راقی بینینی ئه‌و فیلمانه‌یان هەبوو كه‌ پڕ بوون له‌ زێده‌ڕه‌وی و ناواقیعیه‌ت و ئه‌كشن و شۆی ئەكتەران.

زۆر باشیش ده‌مانزانی كه‌ ناوه‌ڕۆكی رووداوەكانی فلیمه‌كان، فشه‌یه،‌ به‌ڵام وامان له‌ خۆمان ده‌كرد كه‌ ڕاستیه‌ و بیرمان له‌ زیاده‌ڕەو‌یی نواندن و جووڵەی ئه‌كته‌ره‌كان نه‌ده‌كرده‌وه‌، ئه‌وه‌ گرنگ بوو بۆ ئێمه‌ كه‌ بۆ ئه‌و ساته‌ به‌دیاریانه‌وه‌ دانیشین و پێبكه‌نین و گەلێ جار گاڵتەشیان پێبكه‌ین، گرنگ كاتمان لەگەڵ دەبردنە سەر‌.

جا خولاسەی كه‌لام، ئێستا بەشێك لە پەرلەمانتارانی كوردستانیش، رێك وەكوو ئەكتەری فیلمە هندییەكان یان توركیەكانی جاران، رەفتار دەكەن، هەمیشە لە خەمی نواندن و شۆو و خۆبەناوبانگكردندان و لە ناخەوە ئەوەی بە خەیاڵیاندا نایەت كێشە و خەمەكانی هاووڵاتیانی كوردستانە، تەنیا جیاوازییەكەیان ئەوە بوو، جاران كاسێتی فیلمی ئەو ئەكتەرانەمان بۆ شەوێك بە كرێ دەهێنا، لێ ئێستا ئاكت و نواندن و شۆی پڕ فشە و موزایەدە و زێدەڕۆیی و خۆدەرخستنی، ئەو گرووپە پەرلەمانتارە، سۆشیال میدیامان لێ پڕ دەكات!

تەنانەت بەشێك لەو پەرلەمانتارانە ئیشەكەیان وا سووك و ریسوا كردووە، كاتێ دەقیڕێنن و هاوار دەكەن و تەپڵ دەكوتن و پێڵاو دەهاون، بە مۆبایلی خۆیان و هاوڕێكانیان، لەنێو هۆڵی پەرلەمانەوە (رەفتارە جوانەكانیان!) بە لایف پەخش دەكەن، هەندێكیشیان هۆڵی دانیشتن لە كاتی گفتوگۆدا، بەجێ دەهێڵن و رادەكەن بۆ بەردەم مایكی تی ڤیەكان، عەزیزم ئەگەر تۆ شۆ ناكەیت و بۆ خۆدەرخستنت نیە، بۆچی ناچیت لەنێو هۆڵی پەرلەماندا ئەو شەكرانە بشكێنیت و واز لە مایكەكان ناهێنیت!

من یەك بە باری خۆم، كاتێ ئەو جۆرە پەرلەمانتارنە یان با ناویان بنێم (گرووپی پەرلەمانتارانی شۆو) دەبینم، لەجێی خۆم تەریق دەبمەوە، چونكە بێمتمانەیی خەڵك هەمبەر بەو جۆرە پەرلەمانتارانە گەیشتووەتە رادەیەك، تەنانەت كاتێ باسی مووچەی مووچەخۆرانیش دەكەن، خەڵك دەزانن كە خەمی مووچەی خۆیانە كە سەدا پەنجای لێ بڕاوە نەك مووچەی خەڵك.

ئەوانە لەو شۆ و هاتوهاوارە تەنیا یەك مەبەستیان هەیە، ئەویش ئەوەیە دەیانەوێ خوولی داهاتووی پەرلەمان، خەڵك دەنگیان پێ بداتەوە و مووچە و ئیمتیازیان بەردەوام بێت. بەداخەوە لە هەرێمی كوردستان فلتەری كاندیدكردنی كەسێك بۆ پەرلەمان، فلتەرێكی گونجاو و دروست و پیشمەندی و پسپۆڕی نیە، بۆیە زۆر لەو پەرلەمانتارانە، وەك ئەكتەری فیلمە هندییە پڕ زێدەڕۆییەكان دێنە بەر چاو.

توو ئه‌و خوا گەورەیە‌ پێم مه‌یێژن گرووپی پەرلەمانتارانی شۆو، لەپێناو قووتی ئه‌و میلله‌تەدا‌ وا ده‌كه‌ن، ئاخر ئەو فیلمانەمان زۆر بینی و ئەو قسانە زۆر كۆن بوون‌ و باویان نه‌ماوه‌. خەڵك ئێستا كە سەیری دانیشتنەكانی پەرلەمان دەكات و سەرنج لە هاتوهاوار و موزایەدە و شۆی ئەو جۆرە پەرلەمانتارانە دەدات، ئەوەی خەیاڵی بۆی ناچێت ئەوەیە كە ئەو جۆرە پەرلەمانتارانە كار بۆ خەڵك بكەن.

وەنەبێ سەركردەی حزبەكانی ئەو گرووپە پەرلەمانتارەش، لە پەرلەمانتارەكان دڵسۆزتر بن، بەڵكوو هەست دەكەم زۆر جار ئەو پەرلەمانتارانە بۆ رازیكردنی سەركردەی حزبەكانیان ئەو شۆیە دەكەن، ئەوانیش پێیان خۆشە پەرلەمان وەك ستۆدیۆكانی بۆلیوود بێت، نەك خەریكی چاودێری و داڕشتنی یاسای گونجاو و كەمكردنەوەی كێشە و خەمەكانی خەڵك بێت، بەڕاستی شەرمە بەم جۆرە پەرلەمانتارانە بگوترێت: (نوێنەرانی گەل!! حاشا ئەو گررووپە شایستەی ئەوە نین، نوێنەری خەڵكی قوربانیدەر و خەباتگێڕ و پشوودرێژی كوردستان ین، ئەوانە تەنانەت پێگەی كاری پەرلەمانتارییشیان لەگەڵ خۆیاندا بێبەها كردووە، دڵسۆزی كەس نین، جگە لە گیرفانی خۆیان.