ئاو و كارەبای شاسوار
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
بەرهەم عەلی 06/07/2021

ئاو و كارەبای شاسوار

شاسوار عەبدولواحید گوتی: ”هەزار تانكەر ئاو بۆ دانیشتوانی هەولێر دەنێرم!“ رۆژێك دوای ئەوە، میدیای گۆڕان، بەڵگەنامەیەكی بڵاو كردەوە و نووسی: ”دانیشتوانی گوندی ئەڵمانی كە پرۆژەی شاسوار عەبدولواحیدە و لە سلێمانیشە، داوای دابینكردنی ئاویان بۆ ماڵەكانیان لە شاسوار كردووە، ئەویش وەڵامی داونەتەوە كە ناتوانێ ئاویان بۆ دابین بكات و پێویستە ماڵەكانی گوندی ئەڵمانی خۆیان، لەسەر حسابی خۆیان ئاو بكڕن“، من لەو هەواڵەدا بڕوام بە میدیای گۆڕانە نەك شاسوار، دەزانن بۆ؟ ئەم بەسەرهاتە بخوێننەوە:

چەند ساڵێك لەمەوبەر، نووسەرێكی هاوڕێم، كە ئەوكات و ئێستاش لە سلێمانی دەژی، هاتە هەولێر بۆ سەردانم، لە شەوێكی زستانی باراناوی و سارد و تەڕوتووشی هەولێردا، لە كافیترایەك میوانداریی ئەو هاوڕێ خۆشەویستەمم كرد، بەدەم قاوە خواردنەوە و قلیان كێشانەوە كەوتینە گفتوگۆ، ئیدی زۆر سەرەبابەتمان كردەوە و زۆریش لەبارەیانەوە دواین.

دەوروبەری كاتژمێر ١١:٠٠ی شەو، زەنگی مۆبایلی هاوڕێ نووسەرەكەم لێی دا، یارۆی هاوڕێ، لەبەرئەوەی دەنگی بڵندگۆی قاوەخانەكە زیاد لە رادە بەرز بوو، بەدەم وەڵامدانەوەی زەنگەكەوە، چووە دەرەوە بۆ ئاخاڤتن، پاش چەند خولەكێك، هاوڕێكەم بە سەربادان و نیگەرانیەوە گەڕایەوە سەر مێز، دڵنیا بووم لەوەی هەواڵێكی ناخۆشی بیستووە!

لێم پرسی: هاوڕێ چی بوو؟ چی رووی دا؟ خۆ خوانەخواستە لەو پەیوەندییە تەلەفۆنیەدا هەواڵێكی ناخۆشیان پێ رانەگەیاندیت!
وەڵامی دایەوە: وەڵا شتێكی ناخۆشە، بەڵام هیچ چارەشم نیە، نازانم چی بكەم!
گوتم: ئەگەر پێت ئاساییە بۆم باس بكەیت، پێم خۆشە بزانم.
گوتی: شتێكی نهێنی نیە، ئەو زەنگە (محەمەد عومەر عوسمان)ی شاعیر بوو، لەگەڵ ئەو قسەم دەكرد.

گوتم: مەبەستت ژەنەراڵی پاییزە؟
گوتی: ئەرێ حەمە عومەری ژنراڵی پاییز بوو، ئەو نەگبەتە لە شوقەیەكی گوندی ئەڵمانیی شاسوار عەبدولواحیددا دەژی، لەبەر ئەوەی هەژار و دەستكورت و بێدەرەتانە، دوو سێ مانگە پارەی كارەبای گوندی ئەڵمانیی پێ نەدراوە، بەو هۆیەوە شاسوار عەبدولواحید كارەبای شوقەكەی بڕیوە و فەقیرە بەو سەرمایە بە تاریكی و بە تەنیا، لەو شوقە سارد و سڕ و تارەدا دەژی، شەوانە لە سەرمانا چرقەی دانی دێت، دوو سێ بەتانی دەدا بە خۆیدا و بەدیار رۆشنایی مۆمەوە دەنووسێت و دەخوێنێتەوە.
لەبەرخۆمەوە گوتم: ئای لەم وڵاتە و لەم زرووفە قۆڕە! وەرە كارەبای شاعێرێكی گەورە و داهێنەری وەكوو محەمەد عومەر عوسمان (ژەنەراڵی پاییز) كە لە سلێمانی پەیكەری بۆ دروست كراوە، بە دەست پیاوێكی نەخوێندەوار و دەستبڕی وەكوو شاسوارەوە بێت!

ئەو هەواڵە زۆر كاری لێ كردم، هەر لە قاوەخانەكە دەمودەست بە مۆبایل پەیوەندیم بە ژەنراڵی پاییزەوە كرد و تێم گەیاند كە ئاگاداری كێشەكەیم، لێم پرسی:
- ژەنراڵ گیان، تۆ پێم بڵێ، چەند پارەی كارەبای شاسوار قەرزاریت؟
گوتی: یەك ملیۆن و ٧٠٠ هەزار دینار
گوتم: ئەی هیچ هەوڵت لەگەڵ نەدا لێت خۆش بێت، یەعنی تۆی ژەنراڵی پاییز هێندە رێز و خۆشەویستیت لای ئەو شاسوارە نیە كە بتبوورێت لەو پارەیە؟
گوتی: زۆر تكام لێ كرد، بەڵام شاسوار هێندە جوامێر نیە شتی وای لەدەست بێت.
گوتم: ئەی مەجمووعەیەك (نووسەر و رۆشنبیر!) هەن، بەردەوام شەوانە لە مێزی شاسوار دادەنیشن، بۆچی بەوانت نەگوت تا بە شاسوار بڵێن لێت خۆش بێت؟
گوتی: ئەوانیش هێندە جوامێر نین!

بە هەرحاڵ، بە ژەنراڵی پاییزم گوت: ”ژەنراڵ گیان چەند شەوێكی تر ئارامت بێ و تەحەمول بكە، بزانم لێرە شتێكت بۆ ناكەم“، خواحافیزیم كرد و دەستبەجێ پەیوەندیم بە ئۆفیسی كەسایەتیەكی سیاسیی هەولێرەوە كرد و رەوشەكەم تێگەیاند، بە سوپاسەوە، پاش دەمێك لە هەمان ئۆفیسەوە پەیوەندییان پێوە كردم و گوتیان: ”سبەی یەكێك بنێرە، بڕی دوو هەزار دۆلارت بۆ دەنێرین، تۆش لای خۆتەوە بیگەیەنە بە محەمەد عومەر عوسمان (ژەنراڵی پاییز)“. هەر رۆژی دواتر پارەكەم وەرگرت، پاشنیوەڕۆ بە ئامادەبوونی هاوڕێ نووسەرەكەم، ئەمانەتیەكەم گەیاندە سلێمانی و دامە دەست ژەنراڵی پاییز.

بەدڵنیاییەوە ئەگەر ژەنراڵی پاییز، پاش ماوەیەك بەو كارەساتە كۆچی دوایی نەكردایە، من ئەم رووداوەم نەدەگێڕایەوە، چونكە ئەوە نهێنییەكی نێوان خۆم و خۆی و ئەو هاوڕێیەم بوو. لێ مەهزەلەی گەورە ئەوە بوو، ماوەیەك دوای ئەو رووداوە، لە كەناڵی (ئێن ئاڕ تی)ی مانشێتێكم بینی، نووسرابوو: ”شاسوار عەبدولواحید، سەرۆكی جووڵانەوەی نوێ، كارەبا بۆ گوندێكی سلێمانی دابین دەكات“، لێتان ناشارمەوە فشەم بەو هەواڵە هات و زانیم لە غەیری دەستبڕین و موزایەدە و بانگەشەی هەڵبژاردن، هیچی تر نیە، ئاخر شاسوارێك دەستی تێ بچێت لە سەرمای پاییزدا كارەبای ژەنراڵی پاییز ببڕێت، چۆن لە هاویندا كارەبای گوندێكی پێ دابین دەكرێت!