مەنجەڵی سیاسەت!
كوردی عربي فارسى
Kurdî Türkçe English

هه‌واڵ وتــار ڕاپۆرت چاوپێكه‌وتن ئابووری مه‌ڵتیمیدیا لایف ستایل كولتوور و هونه‌ر
x
هەرمن ئەحمەد 27/06/2021

مەنجەڵی سیاسەت!

ئاستی نزمی مەعریفی و نه‌بوونی عەقڵی سیاسی له‌ وتاربێژیدا لای هه‌ندێك لە كه‌سایه‌تیەكانی نێو سیاسەت، كه‌ وه‌ك كا‌ره‌كته‌رێكی سیاسیی بێئه‌زموون دەردەكەون، وا لە گوێگر و تەماشاڤان دەكات، هه‌ر زۆر به‌ سانایی ئاستی شڵەژان و دۆخی خراپی سایكۆ‌لۆژی و ساویلكەیی ئەو كاراكتەرە بخوێننەوە، ئیدی گوێگر و سەیركەری رۆشنبیر و تەنانەت سادەش، دەزانن ئەو جۆرە سسیاسەتمەدارانە! بارودۆخێكی ناجۆر فڕێی داونەتە نێو گۆڕەپانی سیاسییەوە، ئەو بارودۆخە هەلێكی بۆ هێناونەتە پێش بەڵام ناتوانن عاقڵمەندانە سوود لەو دەرفەتە وەربگرن.

كاتێ سیاسییەكی خۆ بە سه‌ركردە زان! دەیەوێ راستەوخۆ و لەڕێی تۆڕەكانی پەیوەندییەوە، وەڵامی خەڵك بداتەوە، دەبێ جۆرێك لە ئامادەیی مەعریفی و رۆشنبیری و سایكۆلۆژی و بەئاگایی لە كێشەكانی وڵاتەكەی هەبێت، دەبێ لانی كەم ئاگاداری دیرۆك و چیرۆكی میللەتەكەی بێت، بە پێچەوانەوە كە خەڵك بینی بازاڕییانە بەرگری لە خۆی دەكات و بازاڕییانە رەخنە لە بەرامبەرەكەی دەگرێت، ئیدی بینەر و بیستەر زوو دەزانن، ئەمە نە سیاسەتڤانە و نە سەركردە، بەڵكوو كەسایەتیەكە قەزا و قەدەر و ئەجیندای دەرەكیی نەیار، خستوویانەتە نێو مەنجەڵێكی مەتبەخی سیاسەتەوە.

ئاخر بەرگریكردن لە سیاسەتی خۆت و رەخنەگرتن لە بەرامبەرەكەت لەنێو مەیدانی سیاسەتدا، ئیتیك و لۆژیكی خۆیی هەیە، ئەمە جیا لەوەی خودی ئاخافتن و وتاربێژیش هەردووكیان هونەرن و توانایان دەوێت، تۆ چۆن دەتوانیت بە قسەكردن و گفتوگۆ، سەرنجی بەرامبەر رابكێشیت؟
- ئایا دەتەوێ تەنیا درۆ بكەیت؟
- خەڵك بە نەزان دەزانیت و دەتەوێ چەواشەیان بكەیت؟
- دەتەوێ لە نزمترین ئاستی ئیتیك و قسەكردندا، پەرێزی خۆت پاك بكەیتەوە؟
- دەتەوێ بە ئاستێكی نزمی مەعریفیەوە، رەخنە لە هەموان بگریت و خۆت بكەیتە فریشتە؟

نا چاوەكەم، ئاوها ناودار دەبیت، بەڵام قەت نابیتە سەركردە، نابیتە كاریزما، بیرمانە لە شەڕی كەنداودا محەمەد سەعید سەحافی وەزیری راگەیاندنی رژێمی سەدام، تا دوایین چركەی رووخانی رژێم، زۆرترین درۆی كرد، ئەو ناوبانگێكی زۆری پەیدا كرد، بەڵام نەبووە سەركردە، بەڵكوو بووە گاڵتەجاڕی هەموو دونیا، لێ لەگەڵ ئەوەشدا ئەگەر تۆ بتەوێ ببیتە محەمەد سەعید سەحافی كوردستان، رەنگە بتوانیت لە سەحاف درۆ زیاتر بكەیت، بەڵام پێم وا نیە ئاستی رۆشنبیری و تەنانەت قسەكردنیشت، گەیشتبێتەوە بە ئاستی سەحاف كە تا ساڵانێك كەرەستەی نوكتەی سیاسی بوو لە هەموو جیهاندا، كەواتە گەیشتن بە ئاستی سیاسییەكی وەكوو سەحافیش خەونێكی وەدینەهاتووە.

زۆربەی خەڵكی كوردستان ئێستا هۆشیارن، نەوەی ئەنتەرنێت و تۆڕە كۆمەڵایەتیەكان و نەوەی دروستكەری نوكتە سیسیاسییەكانی نێو فەیسبووكن، كاتێك سیاسییەك یان سه‌ركرده‌یه‌ك بۆ پروپاگه‌ندەی هەڵبژاردن ‌درۆیان بۆ دەكات، زوو هەست بە درۆكەی دەكەن، ئاخر خۆ درۆی سیاسییش توانای تایبەتی دەوێ، ئەزموون و مەعریفە و ئاستی ئاگاهی و وریایی بەرزی دەوێ، ئەدای باشی دەوێ، چونكە ئیدی زەمەنی ئەو درۆ كۆن و سواوانەی تۆ بە زمانێكی بازاڕییانە دەیكەیت، گوزەشت، نیتچه‌ ده‌ڵێ: ”له‌ هەموو ئەو كەسانە بێزارم كە درۆیان لەگەڵ كردووم، بەڵام هەمبەر بەو كەسانەی وایان لێ كردووم ئیتر متمانەیان پێ نەكەم، بێزاریم لێیان لە لوتكەدایە“.

سەرنجێكی پێویست: لە بەكارهێنانی وشەی (بازاڕییانە)دا، مەبەستم خوانەخواستە كەمكردنەوەی پێگە و رەفتاری كاسبكارانی ماندوو و زەحمەتكێشی بازاڕ نیە، چونكە ئەوانم زۆر خۆش دەوێت و رێزدارن لای من، بەڵام لە سیاسەت و ئاخاڤتندا وشەی (بازاڕییانە) مانا و مەغزای خۆیی هەیە، دڵنیام ئەهلی ئەو دوو بوارە دەزانن چی دەڵێم.