فەرماندەی یەكەی هەشتای هێزی پێشمەرگەی كوردستان رایگەیاند، بە فەرمانی سەرۆك بارزانی، هەنگاوەكانی یەكخستنەوەی هێزەكانیان بۆ سەر وەزارەتی پێشمەرگەی هەرێمی كوردستان بەردەوامە و تا ئێستاش بە كرداری دوو لیوا خراونەتە سەر وەزارەتەكە.
نەجات عەلی، فەرماندەی یەكەی هەشتای پێشمەرگە لە میانی بەڕێوەچوونی ڕێوڕهسمی كۆتاییهاتنی مەشق و ڕاهێنانی بەشێكی یەكەی هەشتا، بە رۆژنامەنووسانی راگەیاند، مەشقەكانی ئێستایان بۆ ئەوەیە كە هێزەكانیان هاوشێوەی پەیكەربەندیی وەزارەتی پێشمەرگە ڕێك بخرێتەوە.
ڕوونیشی كردەوە، بە فەرمانی سەرۆك بارزانی هەنگاوەكانی یەكخستنەوەی هێزەكانیان بەردەوامە و هەنگاو بە هەنگاو پرۆسەی یەكخستنەوەكە بەردەوام دەبێت.
گوتیشی: ”تا ئێستا دوو لیوای یەكەی هەشتا بە كردەیی خراونەتە سەر وەزارەتی پێشمەرگە و تەنیا رێكارە كارگێڕییەكانیان ماوە“.
نەجات عەلی جەختی كردەوە، كە سەرۆك بارزانی رۆڵێكی گەورە لە یەكخستنەوەی هێزەكانیاندا دەبینێت و لەسەر فەرمانی سەرۆك بارزانی هەنگاوەكانی یەكخستنەوەی هێزەكانی پێشمەرگە بەڕێوە دەچن.